Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxii. Capittel.

1

⁺ENde Dauid heeft gheseydt. Dit is thuys Godts, ende desen outaer is tot den brantoffer van Israel,

+ A

2

Ende hy heeft gheboden datmen vergaderen soude alle die bekeerde heydenen totter Ioetscher wet, vanden lande van Israel, ende hi heeft van dien ghemaect steenhouwers om steenen te houwen ende effen te maken, om thuys Godts te timmeren.

3

Ooc heeft Dauid seer veel ysers bereydt tot die naghelen der doren ende tot die herren ende voechselen, ende van metael een ontellijck ghewicht,

4

Ende die cederen houten en mochtmen niet scatten welck die Sydoniters ende die van Tyro ghebracht hadden tot Dauid.

5

Ende Dauid heeft gheseyt. Salomon mijn sone is een cleyn kindeken ende teeder, ende thuys dat ick den Heere timmeren wille moet sulck wesen, dat in allen landen vernaemt worde, Hierom sal ick hem te voren bereyden dat daer toe nootelijck is, Ende om dese sake heeft hy voor sijn doot alle die costen bereydt,

6

⁺Ende hy heeft Salomonen sijnen sone gheroepen ende hem gheboden dat hy een huys timmeren soude den Heere den God van Israel,

+ B

7

Ende Dauid heeft tot Salomon gheseydt. Mijn sone het was mijnen wille dat ic soude timmeren een huys den naem vanden Heere mijnen God,

8

Maer dwoort des Heeren is tot mi ghedaen seggende. Ghi hebt veel bloets ghestort ende seer veel strijden ghestreden, ghi en sult mijnen naem gheen huys moghen timmeren, so veele bloets ghestort hebbende voor my,

9

Die sone die v gheboren sal worden, sal een seer gherust man wesen want ic sal hem doen rusten van allen sijnen vianden int ronde, ende om dese sake sal hy vreedsamich ghenoemt worden ende vrede ende ruste sal ick in Israhel gheuen alle sijn daghen,

10

Hy sal een huys mijnen naem timmeren, ende hy sal mi tot eenen soen sijn, ende ic sal hem tot eenen vader sijn, ende ic sal den stoel van sijn conincrijck vast maken ouer Israhel inder eewicheyt,

11

⁺Hierom nv mijn sone die Heere si met v ende weest voorspoedich, ende timmert een huys den Heere uwen Godt ghelijc hy van v ghesproken heeft,

+ C

12

Ende die Heere gheue v ooc wijsheyt ende verstant, dat ghi Israel moecht regeren, ende bewaren die wet des Heeren ws Gods,

13

Want dan suldi moghen voerspoedich sijn, eest dat

[p. *324]

ghy bewaert die gheboden ende die ordeelen welck die Heere gheboden heeft Moysi dat hy die soude leeren Israel, wert vroem ende doet manlijck, en vreest niet, noch en veruaert v niet.

14

Siet ick heb in mijn armoede te voren bereyt die costen van des Heeren huys, hondert duysent talenten gouts, ende duysentich duysent talenten siluers. Maer des metaels ende des ysers en es gheen ghewicht want die grootheyt gaet bouen tghetal. ⁺Steenen ende houten heb ick bereydt tot alle die behoeften des wercs,

+ D

15

Ghy hebt ooc seer veel constighe werckluyden, steenhouwers ende metsers, ende constighe timmerlieden des houts, ende van allen constighen ambachten seer verstandich, om dwerck te maken van

16

gout ende siluer ende metael, ende yser des welcs gheen ghetal en es. Hier om staet op ende maket, ende die Heere sal met v sijn.

17

Ende Dauid heeft oock beuolen alle den princen van Israel dat sij Salomonen sijnen sone helpen souden,

18

Segghende, Ghy siet dat die Heere v Godt met v lieden es, ende dat hy v ruste ghegheuen heeft al om int ronde, ende dat hy allen v vianden gheleuert heeft in uwen handen, ende dat dlant onderworpen es voor den Heere ende voor sijn volck.

19

Hier om soe gheeft v herten ende v zielen dat ghy den Heere uwen Godt soecket, ende staet op, ende timmert een heyleghe wooninghe Gode den Heere dat die arcke van des Heeren verbont ghebracht worde, ende die vaten die den Heere gheheylijcht sijn int thuys dat den naem des Heeren ghetimmert wort.