Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xx. Capittel.

1

⁺ENde tis ghebuert nae tverloop van eenen iare te dien tijde als die coninghen pleghen ten strijde wt te trecken, dat Ioab heeft vergadert een heyr ende die macht der strijtbaer mannen, ende hy heeft bedoruen dlant der kinderen van Ammon, ende hy is voorts ghereyst ende heeft Rabba beleydt, Maer Dauid bleef te Ierusalem doen Ioab Rabba versloech ende verdorf,

+ A

2

Ende Dauid heeft ghenomen Melchoms croone van sijnen hoofde, ende hy heeft daer in vonden tghewicht van een talent gouts, ⁺ende seer costelijcke steenen, ende hy heeft voor sij seluen daer af ghemaect een coninclijcke croone, ende hy heeft ooc seer veel roofs vander stadt ghenomen,

+ B

3

ende tvolc dat daer binnen was heeft hy wtgheleyt ende hy heeft ouer hen doen gaen dorschwaghens ende sledden, ende kerren met scerpen yseren beslaghen, alsoo dat sij van een ghesneden ende in stucken ghewreuen worden, alsoo heeft Dauid ghedaen alle den steden der kinderen van Ammon, ende hy is wederom ghekeert met alle sijnen volcke in Ierusalem.

4

⁺Nae desen is eenen strijt opghestaen tot Gazer teghen die Philistijnen, inden welcken heeft Sobochai die Husathiter gheslaghen Saphai van Raphaims gheslachte, ende hy heeftse vernedert.

+ C

5

Ende daer is noch eenen anderen strijt ghesciet teghen die Philistijnen inden welcken heeft Adeodatus Saltus sone die Bethlehemiter gheslaghen den broeder van Goliath den Gethiter, die een spiese hadde welcs hout was ghelijc eenen weuers weefboom.

6

⁺Maer daer is noch eenen anderen strijt gheschiet te Geth, daer in een seer lanc man was, hebbende ses vingheren, dat is te samen vierentwintich, die welcke ooc mede was gheboren wt dat gheslachte van Rapha,

+ D

7

Dese blasphemeerde Israel, ende Ionathan die sone van Samaa Dauids broeder heeft hem gheslaghen, Dit sijn die kinderen van Rapha in Geth, die gheuallen sijn door Dauids hant ende sijnder knechten.