Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xix. Capittel.

1

⁺ENde tis ghesciet dat Naas der kinderen van Ammon coninck sterf, ende dat sijn sone in sijn stede regneerde,

+ A

2

Ende Dauid heeft geseyt. Ic sal bermherticheyt doen met Hanon Naas sone, want sijn vader heeft my gratie ghedaen, Ende Dauid heeft boden ghesonden om hem te troosten van sijns vaders doot, Ende doen die comen waren int lant der kinderen van Ammon om te troosten Hanon,

3

soo hebben die princen der kinderen van Ammon gheseyt tot Hanon. Ghy meynt by auontueren dat Dauid ter eeren van uwen vadere dese ghesonden heeft die v troosten souden, ende ghy en beuroedt niet dat sijn knechten tot v comen om te bespieden ende te ondervraghen, ende te doorsoecken v lant,

4

Hierom heeft Hanon Dauids knechten cael ghemaect ende ghescoren, ende hy heeft hen cleederen af ghesneden vanden billen totten voeten toe ende hen laten gaen,

5

⁺Ende als sij wech ghegaen waren, ende dit Dauiden ontboden hadden, so heeft hy hen te ghemoete ghesonden (want sij hadden een groote versmaetheyt gheleden) ende hy heeft gheboden, dat sij blijuen souden te Iericho tot dat haren baert ghewassen ware, ende dat sij dan wederquamen.

+ B

6

Maer die kinderen van Ammon siende, dat sij Dauiden onghelijc ghedaen hadden, soo wel Hanon als dander volc hebben ghesonden duysent talenten siluers dat sij voor voor hen seluen hueren souden van Mesopotamien, ende van Sirien Maacha, ende van Soba waghenen ende rosvolc,

7

Ende sij hebben ghehuert tweendertich duysent waghenen ende den coninck van Maacha met sijnen volcke, Ende als sij ghecomen sijn soo hebben sij haren heyrlegher ghemaect teghenouer Medaba, Ende die kinderen van Ammon vergadert wt haren steden sijn ooc ten strijde ghecomen,

8

Als Dauid dit ghehoort hadde, so heeft hy ghesonden Ioab ende alle theyr der vromer mannen

9

Ende die kinderen van Ammon wtcomende, ⁺hebben hen slachoorden ghestelt by die poorte vander stadt, Maer die coninghen die tot haerlieder helpe ghecomen waren stonden ter sijden alleen int velt,

+ C

10

Hierom Ioab verstaende dat den strijt teghen hem ende achter rug gheworde, heeft dalder vroemste mans ghecoren wt gheheel Israel, ende hy is ghetrocken teghen die Siriers,

11

ende dander deel des volcs heeft hy ghegheuen onder Abisai sijns broeders hant, ende sij sijn ghetrocken teghen die kinderen van Ammon,

12

Ende hi seyde. Eest dat die Siriers my verwinnen, soo suldy my helpen, maer eest dat die kinderen van Ammon v verwinnen, soo sal ick v tot een bescerminghe sijn,

13

Hebt vromen moet, ende laet ons manlijck doen voor ons volc, ende voor ons Gods steden, Die Heere sal doen dat in sijn aenschijn goet is,

14

⁺Hierom is Ioab ende tvolck dat met hem was ghereyst teghen die Siriers ten strijde, ende hy heeftse doen vlieden,

+ D

15

Ende die kinderen van Ammon siende dat die Siriers gheuloden waren, hebben oock die vlucht ghenomen voor Abisai sijnen broeder, ende sij sijn in die stadt gheghaen, ende Ioab is oock wederom ghekeert in Ierusalem.

16

Maer die Siriers siende dat sij neder gheuallen waren voor Israel hebben boden ghesonden, ende sij hebben ouer ghebracht die Siriers die ouer den vloet waren, ende Sophach die ouercapiteyn der orloghen van Adarezer was hen veltheere,

17

Ende als dit Dauiden ghebootscapt was, so heeft hy geheel Israel vergadert ende is ouer die Iordane ghetrocken, ende hy heeftse oueruallen, ende hy heeft recht teghen hen ouer sijn slachoorden ghestelt daer sij teghen streden

18

Maer die Siriers sijn voor Israel gheuloden, ende Dauid heeft dootgheslaghen vanden Siriers seuen duysent waghenen ende veertich duysent voetvolcs ende Sophach den hooftman des heyrs,

19

Ende Adarezers knechten siende dat sij van Israel verwonnen waren sijn ouer gheuloden tot Dauid, ende sij hebben hem ghedient, ende die Siriers en hebben voortaen niet meer willen helpe doen den kinderen van Ammon.