Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xviii. Capittel.

1

⁺ENde tis ghesciet hier nae dat Dauid die Philistijnen sloech, ende dat hy die vernederde, ende nam Geth ende haer dochteren wt der Philistijnen hant,

+ A

2

ende dat hy Moab sloech, ende dat die Moabiten Dauids knechten worden, gheuende hem ghiften.

3

Opden seluen tijt heeft Dauid oock gheslaghen Adarezer den coninc van Soba des lantscaps van Hemath, als hy reysde dat hy sijn rijck soude verbreyden tot aenden vloet Euphrates,

4

Aldus heeft Dauid ghenomen duysent van sijnen waghenen met vier peerden ende seuen duysent peerdevolcs, ende twintich duysent voet volcks, ende hy heeft verminct alle die waghen peerden wtghenomen een hondert waghenen met vier peerden, ⁺die welcke hy voor sij seluen heeft behouden.

+ B

5

Ende Syrus van Damasco is oock daer ouer ghecomen, dat hy Adarezer den coninc van Soba helpen soude, Maer van des conincks volck sloech Dauid tweentwintich duysent mannen,

6

Ende hy heeft ruyters ghestelt in Damasco dat hem Sirien oock dienen soude, ende ghiften brenghen, Ende die Heere heeft hem gheholpen in alles daer hy henen ghereyst was,

7

Ende Dauid heeft ghenomen die gulden pijlkokers welck die knechten van Adarezer ghehadt hadden, ende hy heeft die ghebracht in Ierusalem,

8

Ende ooc van Tebath ende Chun Adarezers steden seer veel metaels, waer af dat Salomon die metalen zee ghemaect heeft, ende die columnen ende die metalen ghereetscappen.

9

⁺Dwelc als Thou die coninc van Emath ghehoort hadde, te weten dat Dauid geslaghen hadde alle theyr van Adarezer des conincs van Soba,

+ C

10

soo heeft hy Adoram sijnen soon ghesonden aenden coninc Dauid, dat hy van hem soude vrede begheren, ende dat hi hem mede verblijden soude, om dat hy Adarezer gheslaghen ende verwonnen hadde, want Thou was Adarezers viant,

11

Maer alle die gulden ende silueren ende metalen ghereetscappen heeft Dauid die coninc den Heere gheheylicht, met dat gout ende siluer dwelc hy ghehaelt hadde van alle die heydenen, soo wel wt den lande van Idumeen, ende Moab, ende der kinderen van Ammon als vanden Philistijnen ende Amalec.

12

⁺Maer Abisai die sone Saruie heeft Edom gheslaghen in die valleye der soutgroeuen, achthien duysent mannen,

+ D

13

ende hy heeft in Edom ghestelt een lants gheweer dat der Idumeen lant dienen soude Dauid, ende die Heere heeft Dauid bewaert in alles daer hy henen reysde,

14

Aldus heeft Dauid geregneert ouer gheheel Israel, ende hy dede recht ende rechtuerdicheyt alle sijnen volcke,

15

Ende Ioab die sone Saruie was ouer theyr, ende Iosaphat Ahiluds sone was greffier,

16

Maer Sadoc Achitobs sone, ende Ahimelech Abiathars sone waren priesteren, ende Susa was die scrijuer

17

ende Banaias Ioiadas sone was ouer die legioenen van

[p. *322]

Cerethi ende Phelethi, Ende Dauids sonen waren dierste aen des conincks hant.