Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xvii. Capittel.

1

⁺ENde doen Dauid woonde in sijn huys, soo heeft hy gheseyt tot Nathan den propheet. Siet ick woone in een cederen huys ende die arcke van des Heeren verbont is onder die vellen,

+ A

2

Ende Nathan heeft tot Dauid gheseyt. Al wat in v herte is dat doet, want Godt is met v.

3

Daerom soo is op dien nacht het woort des Hee-

[p. *321]

ren ghedaen tot Nathan den propheet segghende.

4

Gaet henen ende spreect tot Dauid mijnen knecht. Dit seyt die Heere. Ghy en sult my gheen huys timmeren om te woonen,

5

Want ic en heb in gheen huys ghewoont van dien tijt dat ick Israel wtgheleyt hebbe tot op desen dach toe, Maer ick heb altijt gheweest veranderende die plaetsen des tabernakels, ende woonende in een tente

6

met gheheel Israel, Heb ic oyt ghesproken tot eenighen vanden rechters van Israel den welcken ick beuolen hadde, dat sij mijn volck voeden souden ende gheseyt. Waerom en hebdi my gheen cederen huys ghetimmert?

7

⁺Daerom suldi nv aldus spreken tot mijnen knecht Dauid. Dit seyt die Heere der heyrscaren. Ic heb v ghenomen doen ghy in die weyde dat cudde volchdet, dat ghy een prince mijns volcs van Israel sijn soudt,

+ B

8

Ende ick heb met v gheweest werwaerts dat ghi ghereyst hebt, Ende ic heb alle v vianden dootgeslaghen voor v, ende ick heb v eenen naem ghemaect ghelijc een vanden grooten die grootelijcke vermaert sijn opder aerden,

9

Ende ick heb mijnen volcke Israel plaetse ghegheuen, het sal gheplant worden, ende tsal daer in woonen, ende ten sal voortaen niet meer beroert worden, noch die kinderen der boosheyt en sullense niet verdrucken,

10

ghelijc dat was int beginsel van dien daghen doen ick mijnen volcke Israhel rechters ghaf, ende ick heb alle uwe vianden vernedert Hier om soo vercondighe ick v dat die Heere v een huys timmeren sal,

11

Ende als ghy v daghen sult volbracht hebben om tot uwen vaderen te gaen, soo sal ick v saet nae v verwecken, dwelck sal van uwen sonen sijn, ende ic sal sijn rijck vestighen,

12

Hy sal my een huys timmeren, ende ick sal sijnen rijckstoel vast maken tot inder eewicheyt.

13

Ick sal hem tot eenen vader sijn, ende hy sal my tot eenen sone sijn, ⁺ende mijn bermherticheyt en sal ick van hem niet nemen, ghelijck ick die wech ghenomen hebbe van hem die voor v gheweest is,

+ C

14

Ende ick sal hem in mijn huys stellen, ende in mijn rijc inder eewicheyt, ende sijnen throon sal den alder stantvastichsten wesen inder eewicheyt,

15

Nae alle dese woorden, ende nae alle dit visioen so heeft Nathan tot Dauid ghesproken,

16

Ende als die coninck Dauid ghecomen was ende gheseten was voor den Heere, soo heeft hy gheseyt. Wie ben ick o Heere Godt ende wat is mijn huys, dat ghy my sulcke dinghen soudt gheuen?

17

Maer ooc heeft v dit luttel ghedocht voor v aenscijn ende daerom hebdi ooc ghesproken van ws dienaers huys tot in toecomende tijden, ende ghy hebt my seer heerlijck ghemaect bouen alle menchen Heere Godt

18

Wat mach Dauid voortaen meer daer toe doen, als ghy uwen dienaer alsoo glorioos ghemaect hebt, ende hem ghekent hebt?

19

Heere om uwen dienaer nae v herte hebdi alle dese grootdadicheyt ghedaen, ende ghi hebt alle die grootdadighe dinghen willen kenlijc maken,

20

Heere daer en is niemant ws ghelijc, ende daer en is gheen ander God dan ghy, van alle die wij met onsen ooren ghehoort hebben,

21

Want wat ander volc isser als v volck Israel een volck op aertrijck, ⁺tot den welcken Godt ghegaen is dat hy dat verlossen soude ende voor sij seluen een volck maken door sijn grootheyt ende vreeselijcheden wtworpen die natien van sijn aensicht dwelck hi wt Egipten verlost hadde?

+ D

22

ende ghy hebt het volck van Israel ghestelt v tot eenen volcke, tot inder eewicheyt, Ende ghy Heere sijt sijn Godt gheworden.

23

Nu dan Heere hierom laet het woort dat ghy uwen knecht ghesproken hebt, ende op sijn huys vast ghemaect worden inder eewicheyt, ende doet ghelijck ghy ghesproken hebt,

24

Ende laet blijuen ende groot ghemaect worden uwen naem tot inder eewicheyt, ende men segghe. Die Heere der heyrscharen is die Godt van Israhel, ende Dauids sijns knechts huys blijuende voor hem,

25

Want ghi Heere mijn God hebt gheopent die oore ws knechts dat ghy hem een huys soudt timmeren, ende hierom heeft v dienaer betrouwen gheuonden om te bidden in uwer teghenwoordicheyt.

26

Nv hierom Heere ghy sijt Godt, ende ghy hebt tot uwen dienaer ghesproken soo grooten weldaden,

27

Ende ghy hebt begonst te benedijden dat huys van uwen dienaer, dat eewelijck soude voor v sijn, Want als ghy Heere dat ghebenedijt, soo salt ghebenedijt sijn inder eewicheyt.