Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xvi. Capittel.

1

⁺ALdus hebben sij die arcke Gods ghebracht ende ghestelt int midden des tabernakels dat Dauid haer wtghespannen hadde, ende sij hebben heelbrantofferanden ende vreedofferanden gheoffert voor Gode,

+ A

2

Ende doen Dauid sijn heelbrantofferanden ende vreedofferanden offerende al voldaen hadde, soo heeft hy den volcke ghebenedijt inden naem des Heeren,

3

Ende hy deelde hen allen elcken besonder vanden mans totten vrouwen, een ghewronghen stuck broots ende een stuck ghebraden ossen vleeschs, ende bloem van meel met olie gheroost.

4

Ende hy heeft voor die arcke des Heeren ghesteldt vanden Leuiten die dienen souden, ende sijnder wercken ghedencken souden, ende glorificeren ende louen den Heere den Godt van Israel,

5

Asaph den prince, ende den tweeden naest hem Zachariam, Maer Iahiel ende Semiramoth, ende Iehiel, ende Mathathiam, ende Eliab, ende Banaiam, ende Obededom, ende Iehiel, ouer die instrumenten der psalteren ende lieren, Ende Asaph dat hy met cimbalen soude gheluyt maken,

6

Maer Banaiam ende Iaziel priesters heeft hy ghestelt, om met trompetten altijt te spelen voor die arcke van des Heeren verbont.

7

⁺Op dien dach heeft Dauid tot eenen prince om den Heere te louen ghemaect Asaph ende sijn broeders.

+ B

8

Looft den Heere ende aenroept sijnen naem, maect condich in die volcken sijn vindinghen.

9

Singhet hem ende speelt hem, ende vertelt alle sijn wonderlijcke dinghen.

10

Looft sijnen heylighen naem, het herte der gheender die den Heere soecken verblijde hem.

11

Soect den Heere ende sijn cracht, soect sijn aensicht altoos.

12

Weest ghedachtich sijnder wonderlijcker dinghen die hy ghedaen heeft, sijnder teeckenen ende der ordeelen sijns monts.

13

Het saet van Israel sijnen dienaer Iacobs kinderen sijns wtuercorenens.

14

Hy is die Heere onse Godt, in alle eertrijck sijn, sijn ordeelen.

15

Wilt inder eewicheyt sijns verbonts ghedachtich wesen des woorts dat hy gheboden heeft tot duysentich generatien.

16

Dwelc hy vast ghemaect heeft met Abraham ende sijns eedts met Isaac.

17

Ende hy heeft dat ghestelt Iacob tot een ghebot, ende Israel tot een eewich verbont.

18

Segghende v sal ick gheuen dlant van Chanaan, het coordeken van uwer erffelijcheyt.

19

Doen sij luttel in ghetale waren, cleyn ende vreemdelinghen daer af.

20

Ende sij sijn ouer ghereyst van deen volck tot dat andere ende van deen rijck tot een ander volc.

21

Hy en heeft niet toeghelaten dat hen iemant onrecht doen soude, maer hy heeft om haren wille coninghen ghestraft.

22

En wilt mijn ghesalfde niet raken, ende mijnen propheten en wilt gheen quaet doen.

23

⁺Singhet den Heere alle dlant vercondicht van daghe te daghe sijn salicheyt.

+ C

24

Vertelt in die Heydenen sijn glorie, in allen volcken sijn wonderlijcke wercken.

25

Want die Heere is groot, ende loffelijck bouen maten, ende grouwelijc bouen allen goden.

26

Want alle die goden der Heydenen sijn afgoden, maer die Heere heeft die hemelen ghemaect.

27

Belijdinghe ende grootdadicheyt is voor hem, stercheyt ende blijscap is in sijn plaetse.

28

Brenghet tot den Heere ghy familien der volcken brenghet tot den Heere glorie ende ghebodt.

29

Gheeft den Heere glorie sijnen naem, heft op tsacrificie ende coemt in sijn aenschijn, ende aenbidt den Heere int heylich cieraet.

30

Alle dat landt worde beroert van sijn aenschijn, want hy heeft ghefundeert die onberuerlijcke werelt.

31

Laet die hemelen verblijden, ende die aerde haer verhueghen, ende laet in die Heydenen segghen, die Heere heeft gheregneert.

32

Die zee dondere, ende haer volheyt ende die velden verblijden hen ende alle datter in is.

33

Dan sullen die houten des wouts voor den Heere louen, want hy coemt die aerde ordeelen.

34

Belijdet den Heere want hy is goet, want inder eewicheyt is sijn bermherticheyt.

35

Ende segghet behoudt ons Godt onse behoudere ende vergadert ons ende verlost ons van die Heydenen, dat wij moghen uwen heylighen naem belijden, ende dat wij moghen verhueghen in v sanghen.

36

⁺Ghebenedijt is die Heere die Godt van Israhel vander eewicheyt tot inder eewicheyt, ende alle tvolc segghe Amen, ende lofsanck den Heere.

+ D

37

Hierom heeft hy daer voor die arcke van des Heeren verbont ghelaten Asaph ende sijn broeders, dat si dienen souden int aenschijn der arcken altijt tot allen daghen, ende hen buerten,

38

Maer Obededon ende sijn broeders waren achtentsestich, ende Obededon Idithuns sone ende Hosa heeft hy doorwaerders ghestelt,

39

Maer Sadoc den priester ende sijn broederen priesters heeft hy ghestelt voor des Heeren tabernakel in die hoochde welck te Gabaon was,

40

dat sij den Heere brantofferanden offeren souden, opden outaer des brantoffers tot allen tijden smorghens ende tsauonts nae alle datter ghescreuen is in des Heeren wet, die welcke hi Israel gheboden heeft,

41

Ende nae hem Heman ende Idithun ende die ander wtghecoren een ieghelijc by sijnen naem, om den Heere te belijden, Dat sijn bermherticheyt inder eewicheyt is,

42

Heman oock ende Idithun singhende metten trompette, ende te clincken op die cimbalen ende alle die instrumenten der musiken, om den Heere te singhen, Ende Idithuns sonen heeft hy doen poortiers sijn,

43

Ende alle tvolc is weder om ghekeert in sijn huys, ende Dauid dat hy sijn huys oock ghebenedijden soude.