Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xv. Capittel.

1

⁺ENde hy heeft oock huysen in Dauids stadt ghemaect, ende hy heeft opghetimmert die plaetse van Gods arcke, ende voor die een tabernakel wtghespannen,

+ A

2

Doen seyde Dauid, tis ongheorloft dat die arcke Godts van een ieghelijcken ghedraghen worde dan alleen vanden Leuiten die welcke die Heere vercoren heeft om die te draghen, ende om hem te dienen tot inder eewicheyt,

3

Ende hi heeft gheheel Israel vergadert binnen Ierusalem, dat Gods arcke soude ghehaelt worden tot op haer plaetse, die hy haer bereyt hadde,

4

Ende oock mede Aarons sonen ende die Leuiten

5

van Caaths kinderen was Uriel die prince, ende sijn broeders waren hondert twintich

6

Van die sonen Merari was Asaia die prince, ende sijn broeders twee hondert twintich,

7

Van Gersons sonen was Iohel die prince, ende sijn broeders hondert dertich,

8

Van Elisaphans sonen was Semeias die prince ende sijn broeders twee hondert,

9

Van Hebrons sonen was Eliel die prince, ende sijn broeders tachtentich,

10

Van Oziels sonen was Aminadab die prince ende sijn broeders hondert twaelue,

11

Ende Dauid heeft gheroepen Sadoc, ende Abiathar die priesters, ende die Leuiten Vriel, Asaiam, Ioel, Semeiam, Eliel, ende Aminadab,

12

ende hy heeft tot hen gheseyt. ⁺Ghi die princen sijt van der Leuiten familien heylicht v met uwen broederen, ende haelt die arcke des Heeren des Gods van Israel tot op die plaetse die haer bereyt is,

+ B

13

op dat ons iet doende dat ongheorlooft is nv niet en ghesciede ghelijc ierstmael dede doen ons die Heere sloech om dat ghi daer niet teghenwoordich en waert.

14

Aldus sijn die priesters gheheylicht ende die Leuiten dat sij die arcke des Heeren des Gods van Israel draghen souden,

15

Ende die kinderen van Leui hebben Godts arcke ghedraghen ghelijc Moyses gheboden hadde na des Heeren woort, op hen scouderen, met hantboomen

16

Ende Dauid heeft der Leuiten princen gheseyt dat sij van haren broederen souden stellen sanghers met instrumenten van musike, te weten met nablen, ende lieren, ende cimbalen, also dat tgheluyt der blijscap int hooghe soude gheclanc gheuen,

17

Ende si hebben ghestelt die Leuiten Heman Ioels sone ende van sijnen broederen Asaph den sone Barachie, Maer van die van Merari haren broederen Iethan den sone Casaie,

18

Ende met hen haerlieder broederen, ⁺in die tweede ordinancie Zachariam ende Ben, ende Iaziel, ende Semiramoth, ende Iahiel, ende Ani, Eliab, ende Banaiam, ende Maasiam, ende Mathathiam, ende Eliphalu, ende Maceniam, ende Obededom, ende Iehiel doorwaerders,

+ C

19

Maer die sanghers waren Heman, Asaph, ende Ethad, met metalen cimbalen gheluyt makende,

20

Maer Zacharias, ende Oziel, ende Semiramoth, ende Iahiel, ende Ani, ende Eliab, ende Maasias, ende Banaias songhen verholentheden op nablen,

21

Maer Mathathias, ende Eliphalu, ende Macenias, ende Obededom, ende Iehiel, ende Ozaziu, songhen met herpen voor die octaue den lof der victorien,

22

Ende Chone-

[p. *320]

nias der Leuiten prince, was ouer die prophecie, om die melodie voorte singhen, want hy was seer wijs,

23

Ende Barachias ende Elcana waren doorwachters vander arcken,

24

Maer Sebenias, ende Iosaphat, ende Nathanael, ende Amasai, ende Zacharias, ende Banaias, ende Eliezer die priesters, bliesen met trompetten voor Gods arcke ende Obededom ende Iehias waren doorwachters vander arcken.

25

⁺Aldus sijn Dauid ende alle die ouders van Israel ende die hooftmannen, gegaen om te verdraghen die arcke van des Heeren verbont van Obededoms huys met blijscappen,

+ D

26

Ende doen God die Leuiten gheholpen hadde die darcke van des Heeren verbont droeghen, so offerde men seuen stieren, ende seuen rammen,

27

Ende Dauid was ghecleedt met een eerlijc ouercleedt van costelijck wit lijnwaet, ende alle die Leuiten die darcke droeghen, ende die sangers, ende Chonenias die prince der prophecien onder die sangers, Maer Dauid was ooc ghecleedt met eenen lijnen lijfrock,

28

Ende geheel Israel hebben die arcke van dat verbont des Heeren wtgheley ghedaen, met gheluyt van basoenen, ende met trompetten, ende cimbalen, ende nablen, ende herpen tsamen gheluyt makende,

29

Ende als die arcke van dat verbont des heeren tot Dauids stadt comen was, so heeft Michol Sauls dochter wter vinster siende, den coninc Dauid ghesien springhende ende spelende, ende sij heeft hem versmaet in haer herte.