Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiiij. Capittel.

1

⁺ENde Hiram die coninc van Tirien heeft ooc boden ghesonden aen Dauid, ende cederen houten, ende muer metsers ende timmerlieden, dat sij hem een huys maken souden,

+ A

2

Ende Dauid heeft ghekent dat hem die Heere gheuesticht hadde tot eenen coninck ouer Israel, ende sijn rijck is verhauen bouen des Heeren volck van Israel.

3

Ende Dauid heeft oock ander huysvrouwen ghenomen in Ierusalem, ende hy heeft sonen ende dochteren ghewonnen,

4

Ende dit sijn hen namen die hem in Ierusalem gheboren sijn, ⁺Samua, ende Sobad, Nathan, ende Salomon,

+ B

5

Iebahar, ende Elisua, ende Eliphalet,

6

Noga ooc ende Napheg, ende Iaphia,

7

Ehsama ende Baaliada, ende Eliphalet.

8

Ende die Philistijnen hoorende dat Dauid ghesalft was tot een coninc ouer gheheel Israhel sijn alle op comen, om hem te soecken, Ende doen Dauid dit ghehoort hadde, soo is hy hen te gemoete wt ghereyst,

9

Ende die Philistijnen comende, waren breet wt ghestroyt in die valleye Raphaim,

10

Ende Dauid heeft raet vanden Heere gheuraecht segghende. Sal ick opwaerts ghaen tot die Philistijnen, ende suldi die in mijn handt leueren? Ende die Heere heeft hem gheseyt. Gaet opwaerts ende ick sal die in v hant leueren,

11

⁺Ende doen sij opghetrocken waren in Baalpharasim, soo heeftse Dauid daer gheslaghen ende ghesceydt. Godt heeft mijn vianden ghesceyden door mijn hant, ghelijck die wateren ghesceyden worden, ende daerom is den naem van die plaetse ghenoemt Baalpharasim,

+ C

12

Ende sij hebben aldaer hen goden achterghelaten, die welcke Dauid heeft doen verbranden.

13

Op een ander reyse hebben die Philistijnen eenen oploop ghemaect, ende sij hebben hen breedt wt ghespraeyt in die valleye,

14

Ende Dauid heeft wederom van Godt raet gheuraecht, ende Godt heeft hem gheseyt. En wilt achter henlieden niet opclimmen, gaet wech van henlieden, ende ghy suldt teghen hen comen teghen ouer die peerboomen,

15

Ende als ghy hooren sult dat gheruysch van eenen gaende op die toppen der peerboomen, dan suldy ten strijde wt trecken, want Godt is wtghegaen voor v, dat hy theyr der Philistijnen slaen soude,

16

Hierom heeft Dauid ghedaen alsoo hem Godt beuolen hadde, ende heeft den heyrlegher der Philisteen gheslaghen van Gabaon aen tot Gazera toe,

17

Ende Dauids naem is seer vermaert gheworden in alle lantscappen, ende die Heere heeft sijn vreese ghegheuen ouer alle die Heydenen.