Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiij. Capittel.

1

⁺ENde Dauid heeft raet ghehouden met die honderste ende duysenste mannen, ende met alle die princen,

+ A

2

ende hi heeft gheseyt tot alle die vergaderinghe van Israel, Eest dat v lieden behaecht, ende dat van den Heere onsen Godt dat woort coemt dat ick spreke, soo laet ons senden tot onse ander broeders, in alle die lantscappen van Israel, ende tot die priesters ende Leuiten die in die voorsteden van die steden woonen, dat si tot ons vergadert worden,

3

ende dat wij ons Godts arcke wederom halen tot ons, Want wij en hebben die niet versocht in Sauls daghen,

4

Ende die gheheele menichte heeft gheantwoort dat also ghescieden soude, want dat woort hadde alle den volcke wel behaecht.

5

⁺Hierom heeft Dauid gheheel Israel vergadert van Sihor van Egipten aen

+ B

[p. *319]

tot datmen coemt in Emath, dat hy Gods arcke soude van Cariathiarim brenghen

6

Ende Dauid ende alle die mannen van Israel sijn opgegaen tot den hoeuele van Cariathiarim, welc in Iuda is, dat sij van daer souden halen die arcke des Heeren des Godts sittende op die Cherubims, daer sijnen naem aengheroepen is,

7

Ende sij hebben die arcke Gods ghestelt op eenen nieuwen waghen, van Abinadabs huys, Ende Oza ende sijn broeder menden den waghen,

8

⁺Maer Dauid ende gheheel Israel speelden voor God wt gheheelder macht, met singhende liedekens, ende met herpen, ende psalteren, ende bommen, ende cimbalen, ende trompetten,

+ C

9

Ende doen sij comen waren by den dorschuloer van Chidon, soo reycte Oza sijn hant wt, om die arcke te houden, twant die ossen van weelden hen pijlick makende, hadden die een luttel neder gheneycht,

10

Hierom is die Heere gram gheworden teghen Ozam ende hi heeft hem gheslaghen om dat hi die arcke aenghetast hadde, ende hy is daer ghestoruen voor den Heere,

11

Ende Dauid is bedroeft gheweest, om dat die Heere Ozam van een ghesceyden hadde, ⁺ende hy heeft die plaetse ghenoemt die versceydinghe van Oza tot op den dach van heden toe,

+ D

12

Ende hy heeft Godt ghevreest doen ter tijt segghende. Hoe mach ick Godts arcke tot my inbrenghen?

13

Ende om die sake en heeft hi die arcke tot hem niet ghebracht, dat is in Dauids stadt, maer hy heeftse ter herberghen ghedraghen int huys van Obededom den Gethiter,

14

Hierom is Gods arcke bleuen in Obededoms huys drij maenden, ende die Heere heeft sijn huys ghebenedijt, ende alle dat hy hadde.