Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xij. Capittel.

1

⁺DEse quamen ooc tot Dauid te Siceleg doen hy noch vluchtich was voor Saul Cis sone die welcke waren seer vrome ende wtnemende vechters,

+ A

2

boghen spannende, ende met beyde hen handen steenen met slingheren worpende, ende met schichten recht schierende van Sauls broeders wt Beniamin,

3

Die prince Ahiezer, ende Ioas die sonen van Samaa Gabaathiters, ende Iaziel, ende Phellet Azmoths sonen, ende Baratha, ende Iehu Anathothiters,

4

Ende Samaias die Gabaoniter die stercste onder dertich ende ouer die dertich Ieremias, ende Ieheziel, ende Iohanan, ende Iezabad Gaderothiters,

5

ende Eluzai, ende Ierimuth, ende Baalia ende Samaria, ende Saphatia Haruphiters,

6

Elcana, ende Iesia, ende Azareel, ende Ioezer, ende Iesbaam van Carehim,

7

Ioela ooc, ende Zabadia Ierohans sonen van Gedor,

8

⁺Ende ooc van Gaddi sijn tot Dauid ouergheloopen doen hy verborghen lach in die woestijne, seer vrome mannen ende die seer goede vechters houdende scilt ende spiesse, hen aensicht was als daensicht van eenen leew, ende sij waren rasch als die reebocken op die berghen,

+ B

9

Ezer die prince, Obdias die tweede, Eliab die derde,

10

Masmana die vierde, Ieremias die vijfste,

11

Ethi die seste, Eliel die seuenste,

12

Iohannan die achtste Elzebad die neghenste,

13

Ieremias die thienste, Machabanai die elfste,

14

Dese waren van Gads kinderen princen des heyrs die laetste was hooftman ouer hondert orloochs mannen ende die meeste ouer duysent,

15

Dese sijn die ghene die door die Iordane ghegaen sijn in dierste maent, als die pleech ouer te vloeden bouen sijn oeuers, ende sij hebbense alle veriaecht die daer in die valleyen woonden aen die oostsijde ende westsijde.

16

⁺Ende daer isser ooc comen van Beniamin ende van Iuda, tot dat des lants stercte daer Dauid in woonde,

+ C

17

Ende Dauid is hen te ghemoete ghegaen ende heeft gheseyt. Eerst dat ghi vreedsamelijc tot my ghecomen sijt om dat ghi my helpen soudt, soo werde mijn herte met v gheuoecht. Maer eest dat ghi my listighe laghen legget, voor mijn vianden, aenghesien dat ic gheen booshyt in mijn handen en hebbe, so moet onser vaderen Godt dat aensien ende ordeelen,

18

Maer den gheest heeft aenghedaen Amasai den prince onder die dertich ende hy heeft gheseyt. Wij sijn uwe o Dauid, ende met v o sone van Isai, vrede, vrede si met v, ende vrede sij uwen helpers want v God helpt v. Hierom heeftse Dauid ontfanghen, ende heeftse ghestelt tot princen der scharen,

19

Maer van Manasse sijn tot Dauid ouergheulucht, doen hy met die Philistijnen quam teghen Saul om te strijden, ende hy en heeft met hem niet gestreden want die princen der Philistijnen hebbende raet ghenomen, sonden hem wederom segghende. Met onser hoofden perikel, sal hy wederom tot sijnen heere Saul keeren,

20

⁺Als hy aldus van Siceleg wederom comen was, soo sijn tot hem ouergheulucht van Manasse Ednas, ende Iozabad, ende Iedihel, ende Michael, ende Ednas, ende Iosabad, ende Eliu, ende Salathi princen der orloochs mannen in Manasse,

+ D

21

Dese hebben Dauid gheholpen teghen die roouerkens, Want sij waren alle seer stercke mannen, ende sij sijn ghemaect princen int heyr,

22

Maer oock alle daghe quamender sommighe tot Dauid om hem te helpen tot dat een groote menichte worde, als een heyr Gods

23

Ende dit is tghetal van die princen des heyrs, die tot Dauid quamen doen hy te Hebron was, om dat sij Sauls conincrijc tot hem souden ouersetten, nae des Heeren woort,

24

Die sonen van Iuda draghende scilt ende spiesse waren ses duysent ende acht hondert bereyt ten strijde.

25

Van Symeons kinderen der vroemster mannen om te strijden, waren seuen duysent, ende hondert,

26

⁺Van die kinderen van Leui vier duysent ses hondert,

+ E

27

Ioiada ooc mede die prince van Aarons gheslachte, ende met hem drij duysent ende seuen hondert

28

Sadoc oock een ionghelinck van wtnemenden goeden aert ende sijns vaders huys tweentwintich princen

29

Ende van Beniamins sonen Sauls broeders drij duysent, want een groot deel van dien volchde noch Sauls huys,

30

Maer van Ephraims kinderen, twintich duysent ende acht hondert, seer sterc van machte, vernaemde mannen in hen gheslachten,

31

Ende wt dat half gheslachte van Manasses sijnder ghecomen achthien duysent alle besonder by haerlieden namen om Dauid coninck te maken,

32

Ende van Issachars sonen sijn ghecomen gheleerde mannen, die wisten alle die tijden, om te ghebieden wat Israel doen moeste, twee hondert princen, ⁺ende alle dandere van dat gheslachte volchden haren raet,

+ F

33

Maer van Zabulon die te strijde wt trocken, ende stonden in die slachoorden des heyrs, ghewapent met orloochsche wapenen sijn ter helpen comen vijftich duysent mannen niet met een dobbel herte,

34

Ende van Nephthali sijn comen duysent princen, ende met hemlieden met scilde ende spiesse ghewapent seuenendertich duysent,

35

Van Dan oock bereydt ten strijde achtentwintich duysent ses hondert,

36

Ende van Aser die ten strijde wt trocken, ende in die slachoorden beroepende veertich duysent

37

Ende van ouer die iordane van Rubens kinderen ende van Gad, ende van die helicht van Manasses gheslachte toegemaect met orloochsche wapenen, hondert twintich duysent,

38

Alle dese orloochs mannen, ⁺bereydt te strijden sijn ghecomen met een volcomen herte in Hebron dat sij Dauid souden coninck maken ouer gheheel Israel, Maer oock mede alle dandere van Israel waren van eender herten dat Dauid coninck worden soude,

+ G

39

Ende sij waren daer by Dauid drij daghen etende ende drinckende, want hen broeders haddent hen bereyt,

40

Ende ooc mede die omtrent hen waren tot Issachar, ende Zabulon, ende Nephthali, brochten brooden met esels, ende kemelen, ende muylen, ende ossen om te eten, meel, vijghen, rosijnen, wijn, olie, rinderen, rammen, in groter menichten, want daer was blijschap in Israhel.