Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xi. Capittel.

1

⁺HIer om es gheheel Israel vergadert tot Dauid in Hebron, segghende, Wy sijn v vleesch ende v bloet.

+ A

2

Oock ghisteren ende eerghisteren doen Saul noch regneerde soe waerde ghy die Israel wt ende in leydde, want tot v heeft v Godt gheseyt, Ghy sult mijn volck Israel voeden, ende ghy sult een prince ouer hen wesen.

3

Hierom sijn alle die outste van gheboorten van Israel comen totten coninck in Hebron, ende Dauid heeft een verbont met hen voor den Heere ghemaect ende sij hebben hem ghesalft tot eenen coninck ouer Israel, nae des Heeren woert dat hy ghesproken heeft door Samuels hant.

4

Ende Dauid es wech ghegaen ende gheheel Israel te Ierusalem, dese es Iebus, daer die Iebuseen waren des lants bewoonders,

5

Ende die te Iebus woonden hebben tot Dauid gheseyt, ⁺Ghy en sult hier binnen niet comen. Maer Dauid heeft die borcht van Syon inghenomen, welck es Dauids stadt.

+ B

6

Ende hy heeft gheseyt, Soe wie den Iebusiter ten iersten slaen sal, die sal een prince, ende een hooftman sijn. Daer om es Ioab die sone van Saruie ierstmael op gheclommen, ende hy es prince gemaect.

7

Ende Dauid heeft in die borcht ghewoont, ende daer om es die ghenoemt Dauids stadt.

8

Ende hy heeft die stadt int ronde op ghetimmert van Mello tot den heelen omganc toe. Maer Ioab heeft die ander plaetsen der stadt opghetimmert.

9

Ende Dauid nam toe gaende ende wassende, ende die Heere der heyrscaren was met hem.

10

⁺Dit sijn die princen van Dauids stercke mannen die hem gheholpen hebben dat hy coninck werde ouer gheheel Israel nae des Heeren woert dat hy ghesproken heeft tot Israel.

+ C

11

Ende dit es tghetal der machtighen van Dauid, Iesbaam die sone van Hachamoni een prince onder dertich, dese heeft sijn lancie ghehauen ouer drij hondert ghequetste op een reyse.

12

Ende nae hem Eleazar sijns ooms sone, een Ahohiter welc onder die drye machtige was,

13

dese was met Dauid in Phesdomim doen die Philistijnen te dier plaese vergadert waren ten strijde, ende den acker des lantscaps was vol ghersten, ende tvolck was gheuloden van daensicht der Philistijnen,

14

Dese hebben ghestaen int midden des ackers, ende hebben dien bescermt, ende doen sij die Philisteen gheslaghen hadden soe heeft die Heere een grote salicheyt sijnen volcke ghegheuen.

15

Ende drij vanden dertich princen sijn neder ghecomen tot die steenrootse daer Dauid in was aen die speluncke van Odollam, als die Philistijnen haeren heyrlegher ghemaect hadden, int dal Raphaim.

16

⁺Maer Dauid was in des lants stercte ende den legher der Philistijnen was te Bethlehem.

+ D

17

Aldus heeft Dauid lust ghehadt, ende gheseyt, Och oft my iemant water gaue wt den put van Bethlehem welck in die poorte es.

18

Hier om sijn dese dry mannen ghereyst doert midden vander Philistijnen heyrlegher, ende hebben water ghescept wt den put van Bethlehem, welcke in die poorte was ende sij hebbent tot Dauid ghebracht, dat hijt drincken soude die welcke dat niet en heeft ghewilt, maer hy heeft dat meer den Heere gheoffert tot een vochtighe offerande,

19

segghende, Verre sij dat van mij dat ick in mijns Gods aensicht dit doen soude, ende deser mannen bloet drincken, want doert perikel van haren sielen hebben sij my dwater ghehaelt. Ende om dese sake en heeft hy dat niet willen drincken dit hebben die drij vroemste ghedaen.

20

⁺Ende Abisai ooc Ioabs broeder die was een prince van die drie ende hy heeft sijn lancie opgehauen teghen drij hondert ghewonde, ende hy was onder die drij dalder vernaemste,

+ E

21

ende onder die drie, die tweede heerlijc, ende hen prince. Maer nochtans en was hy tot die drie ierste niet comen.

22

Banaias, een sone Ioiade des alder vroemste mans, die veel wercken bedreuen heeft, van Cabseel, dese heeft twee Ariels van Moab gheslaghen, ende es nederwaerts ghegaen ende heeft eenen leuw verslaghen int midden van eenen put inden sneu tijt.

23

Ende hy heeft eenen egypschen man gheslaghen, wiens lingde was van vijf cubitus, ende hy hadde een lancie ghelijck eenen weuers boom. Hier om quam hij af tot hem met een roede, ende hy ontnam hem die spiesse die hy in sijn hant hielt, ende hy heeft hem ghedoot met sijns selfs spiesse.

24

⁺Dit heeft Banaias die sone Ioiade ghedaen die onder die drie vrome dalder vernaemste was,

+ F

25

dierste onder dertich, Maer nochtans en was hy tot die drije niet comen, ende Dauid heeft hem aen sijn oore ghestelt,

26

Maer dalder stercste mannen int heyr waren Asahel Ioabs broeder, ende Elchanan sijns ooms sone van Bethlehem,

27

Sammoth die Aroriter Helles die Phaloniter,

28

Ira Acces sone die Thecuiter, Abiezer die Anathothiter,

29

Sobbochai die Husatiter, Ilai die Ahohiter

30

Maharai die Netophathiter, Heled die sone Baana een Netophathiter

31

Ethai die sone van Ribai van Gabaath die kinderen van Beniamin Banaia die Pharatoniter,

32

Hurai van die beke Gaas Abiel die Arbathiter Azmoth die Bauramiter, Eliaba die Salaboniter,

33

Die sonen van Assem Geloniter Ionathan een sone van Sage een Arariter,

34

Ahiam Sachars sone die Arariter,

35

Eliphal Vrs sone

36

Hepher die Mecherathiter Ahia die Pheloniter

37

Hesro die Carmeliter Naarai die sone van Azbai

38

Ioel Nathans broeder, ⁺Mibahar die sone van Agarai

+ G

39

Selec die Ammoniter Naharai die Berothiter die wapendragher van Ioab des soens Saruie

40

Ira die Ietheiter Gareb die Ietheiter,

41

Vrias die Hetheiter Zabab die sone van Oholi

42

Adina een sone Ziza die Rubeniter, een prince der Rubeniters, ende met hem waern dertich

43

Hanan die sone van Maacha ende Iosaphat die Mathaniters

[p. *318]

44

Ozia die Astarothiter, Samma, ende Iehiel Hothans sonen Aroriters,

45

Iediel die sone van Samri, ende Ioha sijn broeder Thosaiters,

46

Eliel die Mahumiter, Ende Ieribai, ende Iosaia die sonen van Elnaem ende Iethma die Moabiters, Eliel ende Obed, ende Iasiel van Masobia.