Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .x. Capittel.

1

⁺ENde die Philistinen streden teghen Israel, ende die mannen van Israel sijn voor die Philistinen ghevloden ende sij sijn neder gheuallen ghewont opden berch Gelboe.

+ A

2

Ende doen die Philistijnen aencomen waren veruolghende Saul ende sijn sonen, soe hebben sij gheslaghen Ionathan ende Abinadab ende Melchisua Sauls sonen.

3

Ende den strijt es swaer gheworden teghen Saul ende die scutters hebben hen vonden, ende sij hebben hem met scichten ghewont.

4

Ende Saul heeft gheseyt tot sijnen wapendragher, Trect v sweert wter sceyden ende slaet my doot, ⁺op dat dese onbesneden menschen by auontueren niet en comen, ende my bespotten. Maer sijn wapendragher en wilde dat niet doen, van vreesen verscrict sijnde, hier om heeft Saul een swaert ghenomen ende es daer in gheuallen.

+ B

5

Dwelck als sijn wapendrager ghesien hadde, te weten dat Saul doot was, soe es hy seluer oock in sijn swaert gheuallen, ende ghestoruen.

6

Aldus es Saul ghestoruen, ende sijn drie sonen, ende alle sijn huys es tsamen gheuallen.

7

Dwelck als die mannen van Israel ghesien hebben, die op die platte landen woonden, soe sijn sij gheuloden, ende doen Saul ende sijn sonen doot waren, soe hebben sij hen steden verlaten, ende sijn herwaerts ende derwaerts verstroyt, ende die Philistinen sijn ghecomen ende hebben daer in ghewoont.

8

⁺Ende des anderen daechs die Philistijnen aftreckende die roouen der verslaghenen, hebben ghe-

+ C

[p. *317]

vonden Saul ende sijn sonen ligghende op den berch Gelboe.

9

Ende doen sij hem berooft hadden ende thooft af ghehouwen, ende hem van sijnen wapenen ghebloot hadden, soe hebben sijt ghesonden in hen lant, datment omdraghen soude, ende vertoonen in der afgoden tempelen ende volcken,

10

ende sijn wapenen hebben sij tot een heylichdom gheoffert inden tempel van haren God ende sijn hooft hebben sij ghenaghelt in Dagons tempel.

11

⁺Als dat ghehoort hadden die mannen van Iabes Galaad, te weten alle dat die Philistijnen ouer Saul ghedaen hadden,

+ D

12

soe sijn besonder op ghestaen alle die vrome mannen, ende sij hebben ghehaelt Sauls ende sijnder sonen doode lichamen, ende hebben die ghebracht in Iabes, ende sij hebben hen ghebeente begrauen onder een eycke die daer was te Iabes, ende sij hebben seuen daghen gheuast.

13

Aldus es Saul ghestoruen om sijn boosheden, om dat hy des Heeren ghebodt ouertreden heeft dat hy beuolen hadde, ende om dat hijt niet bewaert en heeft, Maer daer bouen oock heeft die duyuelsche waersegghersse te rade ghegaen,

14

ende niet en heeft ghehoept inden Heere, waer om dat hy hem ghedoot heeft, ende heeft sijn rijck ouerghestelt tot Dauid den sone van Isai.