Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .v. Capittel.

1

⁺ENde die sonen Ruben des ierste gheboren van Israel (want hi was sijn ierste gheboren) maer doen hy sijns vaders bedde besmet hadde, so sijn die rechten van die ierste gheboorte ghegeuen den sonen van Ioseph Israels sone, ende hy en is niet gherekent gheweest voor den iersten gheboren sone.

+ A

2

Maer Iudas die dalder stercste was onder sijn broeders, van sijnen stamme sijn princen comen, maer die voor deelen van dierste gheboorte sijn Ioseph toeghescict.

3

Aldus waren die sonen van Ruben Israels ierste geboren sone, Enoch, ende Phallu, Esrom ende Charmi.

4

Ioels sonen waren Samaia sijn sone, Gog sijn sone, Semei sijn sone,

5

Micha sijn sone, Reia sijn sone, Baal sijn sone,

6

Beera sijn sone, den welcken heeft gheuanghen gheleyt Thelgath-phalnasar die coninc van Assyrien, ende hy was een prince int gheslachte van Ruben,

7

maer sijn broeders ende alle sijn gheslachte (doen sij ghetelt worden by haren familien) hadden tot princen Iehiel ende Zachariam.

8

Maer Bala Azaz sone des soons Samma, des soons Ioel, hy heeft ghewoont in Aroer tot aen Nebo ende Beel-meon.

9

Ende teghen die oostsijde heeft hy oock ghewoont, tot by den inganck vander woestijnen ende den vloet Eu-

[p. *313]

phraten, Want sij besaten een groot ghetal van arbeydende beesten int lant van Galaad.

10

Maer in Sauls daghen hebben sij ghestreden teghen die Agarenen, ende sij hebben die dootgheslaghen ende sij hebben voor hen ghewoont in hen tabernakelen, in alle die sijde die daer is teghen ouer dat Oosten van Galaad.

11

Maer Gads sonen hebben teghen hen ouer ghewoont int lant van Basan tot Selcha

12

Ioel int hooft, ende Sapham die tweede, maer Ianai ende Saphat te Basan.

13

Ende hen broeders nae haer der ghe slachten huysen, waren Michael, ende Mosollam, ende Sebe, ende Iorai, ende Iachan, ende Zie, ende Reber, dese seuen.

14

Dit sijn Abigails sonen des soons Huri, des soons Iara, des soons Galaad, des soons Michael, des soons Iesesi, des soons Ieddo, des soons Bus.

15

Ende die broeders Abdiels sonen, des soons Guni die prince des huys in haren familien.

16

Ende sij hebben ghewoont in Galaad, ende in Basan, ende in sijn cleyn dorpkens, ende in alle die voorsteden van Saron tot aen die palen.

17

⁺Alle dese sijn ghetelt in Ioathans des conincs van Iuda daghen, ende in die daghen van Ieroboam den coninck van Israel.

+ C

18

Ruben ende Gads sonen ende van die helicht van Manasses gheslachte, Orloochs mannen scilden ende swaerden draghende, ende booghen spannende, ende gheleert ten strijde, vierenveertich duysent, ende seuenhondert ende tsestich, treckende ten strijde.

19

Ende sij hebben ghestreden teghen die Agarenen. Maer die Itureen ende Naphis ende Nodab

20

hebben hen helpe gedaen. Ende die Agarenen sijn in hen handen gheleuert, ende alle die met hen gheweest hadden, om dat sij Godt aengheroepen hebben doen sij streden, ende hy heeftse verhoort, om dat sij in hem ghelooft hadden.

21

Ende sij hebben ghenomen alle dat sij beseten hadden, vijftich duysent kemelen, ende tweehondert ende vijftich duysent scapen ende twee duysent ezels ende menschen zielen hondert duysent,

22

ende daer isser seer veel ghequetst dootbleuen, want het was des Heeren strijdt, ende sij hebben in hen plaetse ghewoont tot die oueruoeringhe inder gheuanghenissen.

23

⁺Ende die sonen van thalf gheslachte van Manasses hebben beseten dlant van die palen Basan tot Baal Hermon ende Sanir, ende den berch Hermon, want sij waren een seer groot ghetal.

+ D

24

Ende dit waren die princen van haerder gheslachten huys, Epher ende Iesi, ende Eliel, ende Ezriel, ende Ieremia, ende Odoia, ende Iediel seer stercke mannen ende machtich ende vermaerde vorsten in hen familien.

25

Maer sij hebben haerder vaders Godt verlaten, ende sij hebben hen ontsuyuert nae die goden des volcs vanden lande die welcke God voor hen wech ghenomen hadde.

26

Ende Godt van Israel heeft verwect den gheest van Phul den coninck van Assyrien, ende den gheest van Thelgat-phalnasar den coninck van Assur, ende hi heeft Ruben ende Gad ende thalf gheslachte van Manasses onuergheuoert, ende hy heeftse ghebracht in Lahela ende in Habor, ende Ara, ende aen den vloet van Gozan tot op desen dach toe