Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxij. Capittel.

1

⁺ACht iaren out was Iosias doen hy begonste te regneren, ende eenendertich iaren regneerde hy in Ierusalem, sijns moeders naem was Idida die dochter Hadaia van Besecath,

+ A

2

Ende hy heeft gedaen dat voor den Heere behaechlijc was, ende hy heeft gewandelt door alle Dauids sijns vaders wegen, hi en keerde daer af niet ter rechter oft ter slincker sijden.

3

Ende int achthienste iaer des conincs Iosias, heeft die coninc ghesonden Saphan den sone Asia Messulams sone den scrijuer van des Heeren tempel, hem segghende.

4

Gaet henen tot Helciam den grooten priester, dat het ghelt te hoope ghebrocht worde, dwelck in des Heeren tempel ghebracht is, het welcke des tempels doorwaerders vergadert hebben vanden volcke,

5

ende laet dat gheuen den timmerlieden door die ouersten van des Heeren huys, die welcke dat sullen deylen den ghenen die in des Heeren tempel wercken, om die veruallinghen des tempels te vermaken

6

te weten den timmerlieden ende den metsers, ende den ghenen die toemaken datter veruallen is, ende datmen coope houten ende steenen van die steengroeuen, om des Heeren tempel te vermaken,

7

⁺Maer nochtans en salmen hen dat ghelt niet tellen dat sij ontfanghen sullen, maer laet hen dat hebben onder hen macht ende op tghelooue

+ B

8

Ende Helcias die ouerste priester heeft gheseyt tot Saphan den scrijuer. Ick heb den boeck der wet vonden in des Heeren huys, Ende Helcias heeft Saphan den boeck ghegeuen ende hy heeft dien gelesen

9

ende Saphan die scrijuer is totten coninc comen, ende heeft hem wederom ghebootscapt van tghene dat hy beuolen hadde ende seyde. V dienaers hebben tghelt te hoope ghebracht datter in des Heeren huys gheuonden is, ende sij hebben dat ghegheuen om dat soude bedeylt worden den wercluyden by den ouersten van des Heeren tempel,

10

Oock soo heeft Saphan die scrijuer den coninc vertelt segghende. Helcias die priester heeft my eenen boeck ghegheuen, Ende doen Saphan dien ghelesen hadde voor den coninc,

11

ende die coninc ghehoort hadde die woorden van des Heeren wet, so heeft hy sijn cleederen ghescoort,

12

Ende hy heeft gheboden Helcie den priester, ende Ahicam Saphans sone, ende Achobor Michas sone, ende Sapham den scrijuer, ende Asaie des conincs dienaer, segghende.

13

Ghaet henen, ende vraecht raet vanden Heere voor my, ende voor tvolck, ende voor tgheheel Iuda, van dees boecs woorden die daer gheuonden is, ⁺Want een groote gramscap des Heeren is teghen ons ontsteken, om dat ons vaders nae die woorden van desen boeck niet en hebben ghehoort, dat sij doen souden alle dat ons ghescreuen is,

+ C

14

Hierom sijn Helcias die priester, ende Ahicam, ende Achobor, ende Saphan, ende Azaia ghegaen tot Holdam die prophetersse die huysvrouwe van Sellum, des soons Thecue, des soons Aaras der cleederen bewaerders, die te Ierusalem woonden in dat tweede deel, ende sij hebben tot haer ghesproken,

15

Ende sij heeft henlieden gheantwoort. Dit seyt die Heere die Godt van Israel. Segt den man die v lieden aen my ghesonden heeft,

16

Dit seyt die Heere. Siet ick sal quade plaghen op dese plaetse brenghen, ende op haer bewoonders, alle die woorden des wets welck die coninck van Iuda ghelesen heeft,

17

Want sij hebben my verlaten ende den vreemden goden sacrificie ghedaen, creytende my door alle haerder handen wercken, ende mijn verbolghentheyt sal in dese plaetse ontsteken worden, ende niet wtgheblusschen worden,

18

⁺Maer den coninck van Iuda die v ghesonden heeft om vanden Heere raet te vraghen, suldi aldus segghen, Dit seyt die Heere die Godt van Israel. Om dat ghi die woorden des boecs ghehoort hebt,

+ D

19

ende dat v herte veruaert is gheweest, ende sijt verootmoedicht voor den Heere, als ghy die woorden ghehoort hadt tseghen dese plaetse ende haer inwoonders, te weten dat sij souden worden tot een verbaestheyt ende tot een veruloeckinghe, ende hebt v cleederen ghescoort, ende gheweent voor my, ende ick hebt ghehoort, seyt die Heere.

20

Daerom sal ick v versamen tot uwen vaderen, ende ghy sult tot uwen graue vergadert worden in vreden, op dat v ooghen niet en sien allen tquaet dat ick op dese plaetse brenghen sal.