Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxi. Capittel.

1

⁺TWaelf iaren out was Manasses doen hy begonste te regneren, ende vijftich iaren regneerde hi in Ierusalem, sijns moeders naem was Haphsiba.

+ A

2

Ende hy heeft quaet ghedaen voor des Heeren aensicht nae die afgoden der heydenen, welc die Heere vernielt heeft van daensicht der kinderen van Israel.

3

Ende hy is ommeghekeert ende heeft die hoochden opghetimmert welck Ezechias sijn vader afghebroken hadde, ende hi heeft Baals outaren opghericht ende bosschelkens ghemaect, ghelijc Achab die coninck van Israel, ende hy heeft alle dat heyr des hemels aenbeden, ende dien ghedient.

4

Ende hy heeft outaren opghericht in des Heeren huys, daer die Heere af gheseyt heeft, In Ierusalem sal ic mijnen naem stellen.

5

Ende hy heeft alle den heyre des hemels outaren ghemaect in die twee voorhouen van des Heeren tempel.

6

Ende hy heeft sijnen sone doort vier gheleydt, ende hi oeffende waerseggherie, ende hy mercte op der voghelen sanc ende hy heeft duyuelsche waersegghers ghemaect, ende die teeken bedieders wten inghewant heeft hy vermenichfuldicht om quaet te doen voor den Heere, ende hem te creyten.

7

⁺Oock heeft hy den afgodt des bosschelkens (welck hi ghemaect hadde) ghestelt in des Heeren tempel, waer af dat die Heere gheseyt heeft tot Dauid ende tot Salomon sijnen sone, In desen tempel ende in Ierusalem die ic vercoren hebbe wt alle die gheslachten van Israel sal ic mijnen naem inder eewicheyt stellen,

+ B

8

Ende ic en sal Israels voet voortaen niet meer laten gheroert worden vanden lande dat ic haren vaderen ghegeuen hebbe, by alsoo nochtans dat sij metten wercken onderhouden alle dat ic hen gheboden hebbe, ende alle die wet welc Moyses mijn dienaer hen beuolen heeft,

9

Maer si en hebben daer nae niet ghehoort maer sijn verleydt van Manasses, dat sij quaet deden meer dan die Heydenen, welck die Heere vernielt hadde voor die kinderen van Israels aensicht.

10

Ende die Heere heeft ghesproken door die hant van sijnen dienaers den propheten, segghende,

11

Aenghesien dat Manasses die coninck van Iuda dese alderquaetste afgrijselijcheyden ghedaen heeft, meer dan alle tghene dat die Amorrheen voor hem ghedaen hebben, ende want hy Iudam oock heeft doen sondighen door sijn onsuyuerheden,

12

Daerom seyt dit die Heere die Godt van Israel, Siet ic sal sulcke quaden op Ierusalem ende Iudam brenghen, dat soo wie dit hooren sal, dien sullen beyde sijn ooren tuyten.

13

⁺Ende ic sal ouer Ierusalem het seelken van Samarien trecken, ende den last van Achabs huys, ende ick sal Ierusalem wtpleynen, ghelijck men die scrijftafelen pleecht wt te pleynen, ende ic salse wtpleynende omme-

+ C

[p. *306]

keeren, ende sal die greffie dicmael ouer haer aensicht trecken,

14

Maer ick sal mijnder erffelijcheden bleuelinghen laten, ende ick sal die leueren in haerder vianden handen, ende sij sullen wesen tot een verwoestinghe ende tot eenen roof allen haren vianden,

15

om dat sij quaet voor mij ghedaen hebben, ende hebben volhert my creytende, tot dien daghe dat haer vaderen wt Egipten ghinghen, tot op desen dach toe,

16

Daer bouen heeft Manasses ooc bouen maten seer veel onnoosel bloets ghestort, tot dat hy Ierusalem veruulde totten mont toe sonder sijn sonden, daer hy Iudam mede hadde doen sondighen dat die quaet doen soude voor den Heere,

17

Maer datter meer is van Manasses woorden ende alle dat hi ghedaen heeft, ende sijn sonde die hy ghesondicht heeft, en sijn dese niet gescreuen int boec der woorden van die daghen der coninghen van Iuda?

18

Ende Manasses is ontslapen met sijnen vaderen, ende hy is begrauen inden hof van sijn huys, in Ozas hof Ende Amon sijn sone heeft in sijn stede gheregneert.

19

⁺Tweentwintich iaren out was Amon doen hy begonste te regneren, ende twee iaren regneerde hi in Ierusalem, sijns moeders naem was Messalemeth Harus dochter van Ieteba,

+ D

20

Ende hy heeft quaet ghedaen voor des Heeren aensicht, ghelijc syn vader Manasses ghedaen hadde,

21

Ende hy heeft ghewandelt in allen die weghen, daer sijn vader door ghewandelt hadde ende hy heeft ooc dien onsuyuerheden ghedient, den welcken sijn vader ghedient hadde, ende hy heeft die aenbeden,

22

ende hy heeft den Heere sijnder vaderen God verlaten, ende hy heeft in des Heeren wech niet ghewandelt,

23

Ende sijn knechten hebben hem laghen gheleydt, ende sij hebben den coninc doot gheslaghen in sijn huys

24

Maer het volck des lants heeft gheslaghen alle die ghene, die de ghesworen muyterie ghemaect hadden, teghen den coninck Amon, ende sij hebben voor hen seluen Iosiam sijnen sone in sijn stede coninc ghemaect

25

Maer datter meer is van Amons woorden, die hi ghedaen heeft, en sijn dese niet ghescreuen int boeck der woorden van die daghen der coninghen van Iuda?

26

Ende sij hebben hem begrauen in sijn graf, inden hof van Oza, ende Iosias sijn sone heeft in sijn stede gheregneet.