Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xx. Capittel.

1

⁺IN dien daghen was Ezechias totter doot toe sieck, ende Esaias Amos sone die propheet es tot hem ghecomen, ende heeft hem gheseyt. Dit seyt die Heere Godt. Beueelt uwen huyse, want ghy sult steruen ende niet leuen.

+ A

2

Die welcke heeft zijn aensicht ghekeert ten want waerts, ende badt den Heere segghende.

3

Ick bidde v Heere. Weest doch ghedachtich hoe dat ick voer v ghewandelt hebbe in die waerheyt, ende met een volmaect herte, ende dat ic ghedaen hebbe tghene dat voor v behaghelijc is. Hierom heeft Ezechias gheweent met een groot ghescrey.

4

Ende eer Isaias ghegaen was wt dat middelste deel van tvoorhof, soo is des Heeren woort tot hem ghedaen segghende,

5

Keert wederom ende seght Ezechie den prince mijns volcs, Dit seyt die Heere Dauids ws vaders Godt, Ick heb v ghebedt ghehoort, ende v tranen ghesien, ende siet ick heb v ghenesen, ten derden daghe suldi opclimmen in des Heeren tempel,

6

Ende ick sal tot uwen daghen noch vijfthien iaren doen, ⁺Oock soo sal ick v verlossen wt des conincs van Assyrien hant, ende dese stadt. Ende ick sal dese stadt bescermen om mijnen willle, ende om Dauid mijns knechts wille.

+ B

7

Ende Isaias heeft gheseydt, Haelt eenen clont vijghen. Ende doen sij dien ghehaelt hadden ende gheleyt op sijnen sweere, soo is hi ghenesen.

8

Maer Ezechias hadde tot Isaias gheseyt, Wat salt teeken sijn dat my die Heere ghenesen sal, ende dat ic ten derden daghe sal opgaen in des Heeren tempel?

9

Isaias heeft hem gheseyt, Dit sal het teeken sijn vanden Heere, dat die Heere doen sal dwoordt dat hy ghesproken heeft, Wildi dat die scaduwe voorts opwaerts ghae thien linien, oft dat sij soo veel graden achterwaerts weder keere?

10

Ende Ezechias heeft gheseyt, Tis licht doenlijck dat die scaduwe thien linien opgae, ende ick en wil niet dat dit gesciede, maer dat hi achterwaerts wederom keere thien graden.

11

⁺Hierom heeft Isaias die propheet den Heere aenroepen, ende hy heeft die scaduwe wederom ghebracht ouer die linien daer sij nv nederwaerts ghegaen was, in Achaz sonnewijser thien graden achterwaerts.

+ C

12

In dien tijde heeft Berodach Baladan Baladans sone die coninc van Babilonien eenen brief ende ghiften ghesonden tot Ezechiam, want hy hadde ghehoort dat Ezechias sieck hadde gheweest.

13

Ende Ezechias heeft hem verblijt in hen coemste, ende hy heeft hen ghetoont het huys der specerien, ende tgout ende siluer ende versceyden costelijcke specerien, ende welriekende olien, ende thuys van sijnen ghereetscappen, ende al dat hy hebben mocht in sijn tresoiren. Daer en was niet in sijn huys ende in alle sijn macht dat Ezechias henlieden niet en thoonde.

14

Maer die propheet Isaias is totten coninck Ezechias comen ende heeft hem gheseyt, Wat hebben dese mannen gheseyt? oft van waer sijn sij tot v comen? Ende Ezechias seyde tot hem, Van verren lande sijn sij tot my comen van Babilonien.

15

Ende hy antwoorde, Wat hebben sij in v huys ghesien? ⁺Ezechias heeft gheseyt, Alle dat in mijn huys is hebben sij ghesien, daer en is niet dat ic hen niet ghetoont en hebbe in mijn tresoiren.

+ D

16

Hierom heeft Isaias tot Ezechiam gheseyt, Hoort des Heeren woordt,

17

Siet die daghen sullen comen, ende al dat in v huys is, ende dat v vaders in die scatten opgheleyt hebben tot op desen dach toe, sal wech gheuoert worden in Babilonien, daer en sal niet ouerblijuen seyt die Heere,

18

Maer oock sommighe van uwen kinderen die wt v comen sullen die ghi winnen sult, sullen wech ghenomen worden, ende sij sullen ghesneden camerlinghen sijn in des conincs van Babilonien palays.

19

Ezechias heeft tot Isaiam gheseyt, Het woordt des Heeren dat ghy ghesproken hebt is goet, vrede ende waerheyt sij in mijnen daghen.

20

Ende datter meer is van Ezechias woorden, ende alle sijn vromicheyt ende hoe hy die vischerie maecte, ende den waterloop ende hoe hi die wateren in die stadt ghebracht heeft, en sijn dese niet ghescreuen int boeck der woorden van die daghen der coninghen van Iuda?

21

Ende Ezechias is ontslapen met sijnen vaderen, ende Manasses sijn sone heeft in sijn stede gheregneert.