Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xix. Capittel

1

⁺ALs die coninc Ezechias dese woorden ghehoort hadde, soo heeft hy sijn cleederen ghescoert, ende dede eenen sack aen, ende hy is in in des Heeren huys ghehaen,

+ A

2

Ende hy heeft Eliacim den prouoost des huys ghesonden, ende Sobnam den scrijuer, ende die ouders van den priesters ghecleedt met sacken tot Isaiam den propheet Amos sone,

3

Die welcke hebben gheseyt, Dit seyt Ezechias, Eenen dach der tribulacien ende der straffinghen ende der Gods lasteringhen is desen dach, die sonen sijn totter baeringhen comen, ende die barende vrouwe en heeft gheen cracht.

4

Oft die Heere v Godt by auontueren hoore alle Rapsaces woorden, den welcken die coninck van Assyrien sijn heere ghesonden heeft, dat hi den leuenden Godt bescimpen souden, ende dat hy dien soude lasteren met woorden welck die Heere v Godt ghehoort heeft, ende doet een ghebedt voor die ouerghebleuene die gheuonden sijn.

5

⁺Aldus sijn Ezechias des conincs dienaers comen tot Isaiam.

+ B

6

Ende Isaias heeft hen gheseyt, Dit suldi uwen Heere segghen, Dit seyt die Heere, En wilt niet vreesen voor daensien deser redenen die ghy ghehoort hebt, daer mede dat die knechten des conincs van Assyrien my gheblasphemeert hebben.

7

Siet ic sal hem eenen gheest toesenden, ende hy sal een tydinghe hooren, ende wederom in sijn lant keeren, ende ic sal hem metten swaerde ter neder worpen in sijn lant.

8

Aldus is Rapsaces wederom comen, ende hy heeft den coninck van Assyrien vonden bestormende Lobnam, want hy hadde ghehoort dat hy van Lachis af ghetrocken was.

9

Ende doen hy ghehoort hadde die ghene die hem seyden van Tharaca den coninck vander Morianen lant, Siet hy is wtghetrocken dat hy teghen v strijden soude, ende doen hy teghen dien ghinck, soo heeft hy boden aen Ezechiam ghesonden segghende,

10

⁺Dit suldi Ezechie den coninck van Iuda segghen, En laet v niet verleyden van uwen Godt daer ghi betrouwen in hebt, noch en seght niet, Ierusalem en sal in des conincs van Assyrien hant niet gheleuert worden,

+ C

11

Want ghy hebt seluer ghehoort, wat die coninghen van Assyrien allen den landen ghedaen hebben, Hoe dat sij die verwoest hebben, Hoe meynde ghy dan alleen verlost te worden?

12

Hebben der Heydenen goden elc haer volck verlost die welcke mijn vaders verdoruen hebben? Te weten Gosan, ende Haran, ende Reseph, ende die kinderen van Eden, die in Thelassar waren?

13

Waer is die coninck van Emath, ende die coninck van Arphad, ende die coninc der stadt van Sepharuaim, Ana ende Aua?

14

Hierom doen Ezechias den brief ontfanghen hadde wt der boden hant, ende dien ghelesen, soo is hy opghegaen tot des Heeren huys, ende hy dede dien brief breet open voor den Heere,

15

ende badt voor sijn aensicht segghende, O Heere Godt van Israel, die daer sidt op die cherubims, ghy sijt alleen Godt van alle die coninghen des aertrijcs, ghy hebt hemel ende aerde ghemaect,

16

Neycht v oore neder ende hoort, doet Heere v ooghen open ende siet, ende hoort alle die woorden van Sennacherib, die welcke ghesonden heeft, om dat hy ons den leuende Godt soude lasteren.

17

Tes waer Heere die coninghen van Assyrien hebben die Heydenen te niet ghedaen ende allen hen landen.

18

⁺Ende sij hebben haerlieden goden int vier gheworpen, want ten waren gheen goden, maer der menschen handtwercken van hout ende steen, ende sij hebben die te niet ghebrocht.

+ D

19

Hierom O Heere onse Godt verlost ons nu wt sijn hant, op dat alle die conincrijcken des lants weten moghen, dat ghy die Heere Godt alleen sijt.

20

Ende Isaias Amos sone heeft ghesonden tot Ezechiam segghende, Dit seyt die Heere de Godt van Israel, Dat ghy my ghebeden hebt van Sennacherib den coninck van Assyrien, heb ick ghehoort,

21

Dit is het woort dat die Heere van hem ghesproken heeft, Die maghet dochter van Syon heeft v versmaedt ende bescimpt, die dochter van Ierusalem heeft haer hooft achter v ghescudt.

22

Wien hebdi bescimpt, ende wien hebdi gheblasphemeert? teghen wien hebdi v stemme opghehauen, ende v ooghen hooghe ghehauen? teghen den heylighen van Israel.

23

⁺Door uwer dienaeren hant hebdi den Heere bescimpt, ende hebt gheseyt, Door die menichte van mijnen waghenen ben ic op die hoochden der berghen gheclommen, opt opperste van Libanon, ende ic heb sijn hooghe cederboomen afghehouwen, ende sijn wtghelesen abeelboomen. Ende ic ben ghegaen tot sijn wterste palen, ende dat wout van sijnenCarmelus

+ E

24

heb ic afghehouwen. Ende ic heb vreemde wateren ghedroncken, ende ic heb met die voetstappen mijnder voeten alle die besloten wateren wt ghedroocht.

25

En hebdi niet ghehoort wat ic van den beghinsel ghedaen hebbe? Vanden ouden daghen heb ic dat ghescapen, ende nv heb ict voorts bracht, ende die besloten steden sullen sijn tot eenen val der tsamenstrijdender hoeuelen.

26

Ende die daer in sitten cranc van handen hebben ghebeeft ende sijn bescaemt, sij sijn gheworden als het gras des velts, ende dat groeynde cruyt der daken, dwelck verdroocht is eer dat tot rijpicheyt comen was,

27

⁺V woonstede ende uwen wtganck, ende uwen inganck, ende uwen wech heb ic te voren gheweten, ende v rasernie teghen my.

+ F

28

Ghi hebt teghen my gheraest, ende v houerdie is in mijn ooren opcomen. Hier om sal ic eenen rinck in uwen nuese stellen, ende eenen breydel in v lippen, ende ic sal v weder om brenghen inden wech daer ghy door ghecomen sijt.

29

Maer v Eezechia sal dit een teeken sijn, Etet dit iaer dat ghy vindt, ende int tweede iaer dat van selfs wassen sal, maer voorts int derde iaer soo saeyt ende maeydt, plant wijngaerts, ende eet die vrucht van dien

30

Ende al watter ouerbleuen sal sijn van thuys van Iuda dat sal sijn wortel nederwaerts scieten, ende sijn vrucht opwaerts gheuen,

31

Want van Ierusalem sullen certeyn bleuelinghen wtgaen, ende dat behouden sal worden. Die ialoursheyt des Heeren der heyrscaren sal dit doen.

32

Hier omme soo seyt die Heere vanden coninck van Assyrien, Hy en sal in dese stadt niet comen, noch hi en sal daer gheenen pijl in schieten, ⁺noch gheenen schilt en sal daer plaetse nemen noch gheen bolwerck en sal om haer ligghen.

+ G

33

Door den wech aldaer hy comen is sal hy wederkeeren, ende in dese stadt en sal hy niet comen seyt die Heere.

34

Ende ick sal dese stadt bescermen, ende ic salse behouden om mijnen wille ende om Dauid mijnen dienaere.

35

Aldus soo eest ghebuert op dien nacht dat dien Enghel des Heeren is comen, ende heeft verslaghen inden heyrlegher vanden Assyrien hondert ende vijfentachtentich duysent mannen. Ende als hy des morghens vroech opghestaen was, soo heeft hi ghesien alle die lichamen der dooden.

36

Ende Sennacherib die coninck van Assyrien vertreckende es wech ghegaen ende wederghekeert, ende ghebleuen in Niniue.

37

Ende als hij inden tempel Nesroch sijnen Godt aenbadt, soe hebben Adramelech ende Sarasar sijn sonen hem met-

[p. *305]

ten swaerde gheslaghen, ende sij sijn gheuloden in dlandt van Armenien, ende Asar haddon zijn sone heeft voer hem gheregneert.