Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xviij. Capittel.

1

⁺INt derde iaer van Osee Ela des conincs van Israel sone heeft gheregneert Ezechias Achas des conincs van Iuda sone,

+ A

2

Vijfentwintich iaren out was hy doen hy begonste te regneren ende hy regneerde neghen ende twintich iaren in Ierusalem. Sijns moeders naem was Abi Zacharias doch-

[p. *303]

ter,

3

ende hy heeft ghedaen dat voor den Heere goet was, nae alle die dinghen die Dauid sijn vader ghedaen hadde,

4

hy heeft die hoochden te niet ghedaen, ende die staende beelden ghebroken, ende die bosschelkens afghehouwen, oock heeft hy dat metalen serpent ghebroken dwelck Moyses ghemaect hadde. Want tot op dien tijt toe ontstaken die kinderen van Israel daer voor ruecofferande, ende hy heeft diens naem ghenoemt Nohestan.

5

Hy heeft ghehoept in den Heere den Godt van Israel. Aldus en wasser niemant nae hem sijns ghelijck van alle die coninghen van Iuda, nocht ooc onder die ghene die voor hem gheweest hadden,

6

Ende hy bleef vast aen den Heere, ende hy en is niet afghegaen van sijnen voetstappen, ende hy heeft sijn gheboden ghedaen welck die Heere Moysi beuolen hadde.

7

Waerom dat die Heere oock met hem was, ⁺ende in alles daer hy toeghinck, droech hi hem wijselijck. Oock so stelde hy hem teghen den coninc van Assyrien, ende hy en heeft hem niet ghedient.

+ B

8

Hy sloech die Philistinen tot Gaza toe, ende allen haerlieden palen, van den wachters torre, tot die besloten stede toe.

9

Int vierde iaer des conincs Ezechie, dwelck was tseuenste iaer Osee des soons Ela des conincs van Israel, soo is Salmanasar die coninck van Assyrien opghecomen in Samarien, ende hi heeft die bestreden

10

ende inghenomen. Want nae drij iaren, int seste iaer Ezechie, dat is int neghenste iaer Osee des conincs van Israel, so is Samaria inghenomen

11

ende die coninck van Assyrien heeft Israel ouergheuoert in dlant van Assyrien, ende hy heeftse ghestelt te Hala ende te Habor op die vloeden Gozan, in die steden vanden Meden,

12

om dat si nae die stemme van den Heere haren Godt niet en hebben willen hooren, maer hebben sijn verbont ouertreden. Alle dat Moyses des Heeren dienaer beuolen hadde en hebben sij niet ghehoort noch ghedaen.

13

⁺Int veerthienste iaer des conincs Ezechie is Sennacherib die coninck van Assyrien opghetrocken tot alle die besloten steden van Iuda, ende hy heeft die inghenomen.

+ C

14

Doen heeft Ezechias die coninck van Iuda boden ghesonden totten coninck van Assyrien in Lachis segghende, Ic heb misdaen, gaet van mi, ende al dat ghy my oplegghen sult dat sal ick draghen. Hierom heeft die coninc van Assyrien Ezechie den coninc van Iuda een scattinghe ghestelt van drij hondert talenten siluers, ende dertich talenten gouts,

15

ende Ezechias heeft ghegeuen alle tsiluer dat in des Heeren huys gheuonden was ende in des conincs scatten.

16

Op dien tijt heeft Ezechias ghebroken die dooren van des Heeren tempel, ende die gouden platen die hy daer aen vast gheslaghen hadde, ende heeft die den coninck van Assyrien ghegheuen.

17

Ende die coninck van Assyrien heeft ghesonden Tharthan, ⁺ende Rabsaris, ende Rabsacen van Lachis totten coninck Ezechias met een machtighe hant nae Iherusalem, ende als sij opghetrocken waren, soo sijn sij tot Ierusalem comen, ende sij stonden aen den waterganck van den oppersten poel welck is in den wech van des volders acker,

+ D

18

ende si hebben den coninc gheroepen, ende tot hen is wtghegaen Eliacim Helcies sone die prouoost des huys, ende Sobna die scrijuer, ende Ioahe Asaphs sone die greffier.

19

Ende Rapsaces heeft tot hen geseyt, Segghet Ezechie, Dit seyt die groote coninck die coninc der Assyrien, Wat betrouwen is dit daer ghy v op verlaet?

20

By auontueren hebdi raet ghenomen, dat ghy v ten strijde soudt bereyden, Waer op hebdi betrouwen dat ghy v derret teghen stellen,

21

hebdi hope op den ghebrokenen rietstock Egipten, opden welcken eest dat een mensch rustet soo salt breken ende in sijn hant gaen ende die doorsteken? alsoo is Pharao die coninck van Egipten allen den ghenen die in hem betrouwen.

22

⁺Maer eest dat ghi my segghet, Wij hebben betrouwen in den Heere onsen Godt, en is hy niet die ghene wiens hoochden ende outaren Ezechias af ghebroken heeft, ende heeft beuolen Iude ende Ierusalem, Voor desen outaer suldi aenbidden in Ierusalem,

+ E

23

Daerom coemt ouer tot mijnen Heere den coninc van Assyrien, ende ic sal v twee duysent peerden gheuen, ende besiet oft ghy soudt connen hebben soo veel ruyters daer op climmende.

24

Ende hoe soude ghy connen wederstaen, voor eenen drossaert van mijns Heeren minste knechten? Oft hebdi v betrouwen op Egipten, om hen waghenen ende rosvolck.

25

Meyndi dat ic sonder des Heeren wille op ghecomen ben tot deser plaetsen, om die te bederuen? Die Heere heeft my gheseyt, Trect opwaerts tot dit lant ende verderft dat.

26

Maer Eliacim Helcie soon ende Sobna, ende Ioahe hebben tot Rabsaces gheseyt, Wij bidden v dat ghy ons uwe dienaers wilt aenspreken in Syrischer talen, want wij verstaen die tale wel, ende en spreect ons niet aen in die Iootsche tale dattet volck hoore welck op die mueren is.

27

Ende Rabsaces heeft gheantwoordt segghende, ⁺Meyndi dat mijn Heere my ghesonden heeft aen uwen Heere ende aen v, dat ic dese woorden segghen soude, ende niet veel meer tot die mannen die opden muer sitten dat sij haren dreck eten, ende haer pisse drincken souden met v lieden?

+ F

28

Hier om heeft Rapsaces ghestaen ende gheroepen met luyder stemmen, in Ioetscher talen, ende gheseyt, Hoort die woorden des grooten conincs, des conincs van Assyrien,

29

Dit seyt die coninck, En laet v niet verleyden van Ezechias, want hy en sal v niet connen verlossen wt mijn hant,

30

Noch en laet hem v gheen betrouwen gheuen, opden Heere segghende Die Heere sal ons verlossende verlossen, ende dese stadt en sal in des conincs van Assyrien hant niet gheleuert worden.

31

En wilt Ezechiam niet hooren, Want dit seyt die coninck van Assyrien, Maect met my dat v profijtelijck is ende coemt wt tot my, ende een ieghelijc sal van sijnen wijngaert eten, ende van sijnen vijgheboom, ende ghy sult die wateren wt uwen putten drincken,

32

tot dat ic comen sal ende v wech halen in een lant dwelck is ghelijc v lant, in een vruchtbaer lant, ende dat wijn voorts brengt, een lant des broots ende der wijngaerden, een lant der olijfboomen, ende der olien ende des honichs, ende ghy sult leuen, ende niet steruen. ⁺En wilt Ezechiam niet hooren die v bedriecht segghende, Die Heere sal ons verlossen,

+ G

33

Hebben die goden der Heydenen hen lant verlost wt des conincs van Assyrien hant?

34

Waer is die Godt van Emath ende van Arphad? Waer is die Godt van Sepharuaim, Ana, endeAua? Hebben sy Samarien wt mijn hant verlost?

35

Wie sijnse doch onder alle der landen goden die haer lantschap wt mijn hant verlost hebben, dat die Heere soude Ierusalem moghen verlossen wt mijn hant?

36

Ende het volck heeft ghesweghen, ende sij en hebben hem niet met allen gheantwoordt, Want sij hadden des conincs ghebodt ontfanghen dat sij hem niet antwoorden en souden.

37

Ende Eliacim Helcie soon die prouoost des huys, ende Sobna die scrijuer, ende Ioahe Asaphs sone die greffier sijn ghecomen tot Ezechiam met ghescoerde cleederen, ende hebben hem Rabsacis

[p. *304]

woorden te kennen ghegheuen.