Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xvij. Capittel.

1

⁺INt twaelfste iaer Achab des conincks van Iuda, heeft Osee die sone van Ela in Samarien gheregneert ouer Israel neghen iaren.

+ A

2

Ende hy heeft quaet voor den Heere ghedaen, maer niet ghelijck die coninghen van Israel die voor hem gheweest hebben.

3

Teghen desen is Salmanasar die coninck van Assyrien opcomen, ende Osee is sijn knecht gheworden, ende hy gaf hem iaerlijcs tribuyt.

4

Ende doen die coninck van Assyrien beuonden hadde, dat Osee arbeydende was om wederspannich te sijne, ende dat hy boden ghesonden hadde aen Sua den coninc van Egipten, dat hy den coninc van Assyrien gheen tribuyt meer gheuen en soude, ghelijck hy tallen iaren plach te doene, so heeft hy hem omleydt, ende ghebonden in den kercker ghesteken.

5

Ende hy is alle dlant door ghereyst, ende optreckende nae Samarien heeft hijt beleghen drij iaren lanck.

6

Ende int neghenste iaer van Osee heeft die coninck van Assyrien Samarien ghewonnen, ende hy heeft die van Israel ouer gheuoert in dlant van Assyrien, ende hy heeftse ghestelt in Hala ende in Habor by den vloet Gozan in die steden vanden Meden.

7

⁺Want het is ghebuert doen die kinderen van Israel teghen den Heere haren Godt ghesondicht hadden die hen wt dlant van Egipten gheleydt hadde, wt die hant van Pharao den coninck van Egipten dat sij hebben vreemde goden aenbeden.

+ B

8

Ende sij hebben ghewandelt nae die maniere der heydenen, welck die Heere vernielt hadde int aenschijn der kinderen van Israel, ende der coninghen van Israel want sij hadden des ghelijck ghedaen.

9

Ende die kinderen van Israel hebben den Heere haren Godt vertornt, met onrechte woorden, ende sij hebben voor hem hoochden ghetimmert in allen hen steden, van den

[p. *302]

torre der wachters, tot die besloten stadt toe.

10

Ende sij hebben voor hen seluen ghemaect afgods beelden ende bosschelkens, op alle hooghe hoeuelen, ende onder alle bosschachtighe boomen,

11

ende sij ontstaken daer rueckoffer op die outaeren nae die maniere der heydenen welck die Heere van haerlieden aensicht wech ghenomen hadde, ende sij hebben alte seer quade woorden ghedaen verweckende tot gramscap den Heere,

12

ende sij hebben den onsuyuerheden ghedient daer die Heere hen af gheboden hadde dat sij dat woort niet doen en souden.

13

Ende die Heere heeft ghetuycht in Israel ende in Iuda door die hant van alle die propheten ende sienders segghende, keert wederom van v alderquaetste weghen, ende bewaert mijn gheboden ende ceremonien, nae alle die wet die ic uwen vaderen gheboden hebbe, ⁺ende ghelijck ic tot v ghesonden hebbe door die hant van mijnen dienaren den propheten.

+ C

14

Die welcke niet ghehoort en hebben, maer sij hebben haren neck verhart ghelijc haerder vaders necken, die den Heere haren Godt niet en wilden onderdanich sijn.

15

Ende sij hebben sijn wettighe gheboden verworpen ende tverbont dat hy met haren vaderen ghemaect hadde, ende die ghetuyghenissen waer mede hy hen ghetuycht heeft, ende sij hebben die ydelheden gheuolcht ende ydelijck ghedaen, ende sij sijn gheuolcht die heydenen die rontsomme hen waren, waer af hen die Heere gheboden hadde dat sij niet doen en souden ghelijc die deden.

16

Ende sij hebben verlaten alle die gheboden des Heeren haers Gods, ende sij hebben voor hen seluen twee ghegoten calueren ghemaect, ende bosschelkens, ende hebben alle dat heyr des hemels aenbeden, ende sij hebben Baal ghedient,

17

ende haer sonen ende haer dochteren doort vier gheheylicht, ende sij ghinghen om met toouerien ende waerseggherien, ende sij hebben hen seluen daer toe ghegheuen dat sij quaet doen souden voor den Heere, dat sij hem gram maken souden.

18

Ende die Heere is op Israel machtelijcken gram gheworden, ende hy heeftse wech ghedaen wt sijnen aensicht ende daer en bleef niet ouer dan alleen dat gheslachte van Iuda.

19

Maer noch en heeft Iuda selue oock die gheboden des Heeren sijns Gods niet bewaert, maer sij hebben ooc ghewandelt in Israels dolinghen die sij ghedaen hadden.

20

⁺Ende die Heere heeft alle tsaet van Israel wech gheworpen, ende hy heeft hen seer veel verdriets aen ghedaen, ende hy heeftse gheleuert in die handen der roouers, tot dat hy die van sijnen aensicht verworpen hadde,

+ D

21

van dien tijden af dat Israel van Dauids huyse af ghesneden is, ende dat sij voor hem seluen maecten eenen coninck Ieroboam Nabats sone Want Ieroboam sceyde Israel van den Heere, ende hy heeftse doen sondighen een groote sonde,

22

ende die kinderen van Israel hebben ghewandelt in alle die sonden van Ieroboam die hi ghedaen hadde, ende sij en sijn daer niet afghegaen,

23

tot dat die Heere Israel wech dede wt sijnen aensicht, ghelijck hy ghesproken hadde door die hant alle sijnder dienaers der propheten, ende Israel is ouergheuoert wt sijnen lande in Assyrien tot op desen dach toe.

24

Ende die coninck van Assyrien heefter ghebracht van Babilonien, ende van Cutha, ende van Auach, ende van Emath, ende van Sepharuaim, ende hy heeft die ghestelt in die steden van Samarien in die stede der kinderen van Israel die welcke hebben Samarien beseten, ende in haer steden ghewoont.

25

Ende doen sij daer hadden begonst te woonen, soe en vreesden sij den Heere niet, ende die Heere heeft leuwen op hen ghesonden diese doodden.

26

Ende het es den coninck van Assyrien ghebootschapt ende gheseyt. ⁺Die luyden die ghy ouerghevoert hebt, ende hebt die doen woonen in die steden van Samarien die en weeten die wetten van den Godt des lants niet. Ende die Heere heeft leuwen teghen hen ghesonden, ende siet sij doodense, om dat sij den dienst van des lants Godt niet en weten.

+ E

27

Ende die coninck van Assyrien heeft beuolen segghende, Leydt derwaerts een vanden priesters die welcke ghy van daer hebt gheuanghen brocht, ende laet dien gaen ende met hen woonen, ende dat hy hen leere die wettelijcke manieren van des lants Godt.

28

Als dan een van dien priesters die gheuanghen wech gheleyt waren van Samarien daer om comen was, soo heeft hy ghewoont te Bethel, ende hi leerde dat volck, hoe sij den Heere dienen souden.

29

Ende elcke natie van volcke heeft sijnen Godt ghemaect, ende sij stelden die in die tempels der hoochden, welc die Samaritanen ghemaect hadden elc natie van volck besonder in haer steden daer sij inne woonden,

30

Want die Babilonische mannen maecten Sochot-benoth, ende die Cutheussche mannen maecten Nergel, ende die mannen van Emath hebben Asima ghemaect,

31

Voorts hebben die Heueen ghemaect Nebahaz ende Tharthac, maer die van Sepharuaim waren, ⁺verbranden haer kinderen metten viere Adramalech ende Anamelech den goden van Sepharuaim,

+ F

32

ende niet te min dienden sij oock den Heere. Ende sij hebben voor henlieden priesters der hoochden ghemaect van die wterste des volcs, ende sij stelden die in die hooghe tempels,

33

Ende die wijle dat sij den Heere dienden, soo dienden sij oock haren goden mede nae die ghewoonte der heydenen, wt die welcke sij ouer ghebracht waren in Samarien.

34

Tot op desen dach toe volghen sij noch hen oude maniere, sij en vreesen den Heere niet, noch sij en bewaren sijn ceremonien niet, ende sijn wet, ende sijn ghebodt, welck die Heere beuolen hadde den kinderen van Iacob, den welcken hy gaf den toenaem Israel,

35

ende hy hadde met hemlieden een verbont ghemaect ende hen beuolen, segghende, En wilt die vreemde goden niet vreesen ende en aenbidt die niet, noch en dient die niet, noch en doet hen gheen offerande.

36

Maer den Heere uwen Godt die v gheleydt heeft wten lande van Egipten met grooter stercheyt ende door eenen wtghestrecten arm, dien vreest, ende dien aenbiddet, ende desen doet offerande.

37

⁺Ende bewaert die ceremonien, ende die rechten, ende die wet, ende tghebodt welck hy v ghescreuen heeft, dat ghy dat doet tot allen daghen, ende dat ghy die vreemde goden niet en vreest,

+ G

38

ende tverbont dat hi met v ghemaect heeft en wilt niet vergheten, noch en eert die vreemde goden niet

39

maer vreest den Heere uwen Godt, ende hy sal v verlossen wt die handen van allen uwen vianden,

40

maer sij en hebben niet ghehoort, maer sij bedreuen nae haer oude ghewoonte.

41

Aldus waren dese heydenen waerlijck oock Godt vreesende, maer niet te min waren sij oock dienende haren afgoden, want hen kinderen, ende kints kinderen doen noch tot opden dach van heden toe ghelijck hen vaders ghedaen hebben.