Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxiij. Capittel.

1

⁺ENde sij hebben den coninck weder om ghebootscapt, dat sij gheseyt hadde, Die welcke heeft ghesonden, ende alle die ouders van Iuda ende Ierusalem sijn tot hem vergadert,

+ A

2

Ende die coninc is opgegaen in des Heeren tempel, ende alle die mannen van Iuda, ende alle die te Ierusalem woonden met hem, priesters ende propheten, ende alle tvolc vanden minsten totten meesten, ende hy heeft ghelesen dat sijt alle hoorden, alle die woorden vanden boeck des ver-

[p. *307]

[afbeelding]bonts die in des Heeren huys gheuonden is,

3

Ende die coninck stont opden graet, ende hy heeft een verbont ghemaect voor den Heere, dat sij nae den Heere wandelen souden, ende dat sij sijn gheboden sijn ghetuyghenissen, ende ceremonien bewaren souden met gheheelder herten, ende met gheheelder zielen, ende dat sij die woorden van dit verbont souden verwecken, die welcke in dien boeck ghescreuen waren, ende het volck consenteerde in dat verbont.

4

Ende die coninck heeft Helcie den ouersten priester, ende den priesters van die tweede ordinancie, ende den doorwachters gheboden dat sij wt des Heeren tempel worpen souden alle die vaten die ghemaect waren ten dienste van Baal, ende in dat bosch, ende alle den heyre des hemels, ende hy heeft die buyten Ierusalem verbrant, in die valleye Cedron, ende hy heeft dat puluer van dien ghedraghen in Bethel,

5

Ende hi heeft die waersegghers te niet bracht die de coninghen van Iuda ghestelt hadden om sacrificie te doen op die hoochden door die steden van Iuda, ⁺ende rontsomme Ierusalem, ende die ghene die wieroock ontstaken Baal, ende der sonnen ende der manen ende den twaelf teekenen, ende alle den heyre des hemels

+ B

6

Ende hy heeft dat boschken doen wtdraghen wt des Heeren huys buyten Ierusalem in die valleye Cedron, ende hy heeft dat daer verbrant, ende tot puluer ghebracht, ende dat gheworpen op die grauen der ghemeynder luyden,

7

Ooc soo heeft hy afghebroken die huyskens der verwijfder mannen die in des Heeren huys waren, waer vore die vrouwen gheulochten hebben ghelijck huyskens des bosschelkens,

8

Ende hi heeft alle die priesters vergadert wt die steden van Iuda, ende hy heeft die hoochden onsuyuer ghemaect, daer die priesters sacrificie op deden, van Gabaa tot Bersabee toe, ende hy heeft die outaren der poorten afghebroken aenden inganck der doren van Iosue den prince der stadt, welcke dore was ter slincker sijden vander stadt poorten,

9

Maer nochtans en ghinghen die priesters der hoochden niet opwaerts tot des Heeren outaer binnen Ierusalem, maer alleen aten si onghedeesemt broot int midden van haren broederen,

10

⁺Ende hy heeft ooc onsuyuer gemaect Topheth welc is in die valleye des soons van Ennom dat niemant sijnen sone oft dochter en soude door tvier doen gaen ten dienste van Moloch,

+ C

11

Ende hy heeft ooc wech genomen die peerden, welc die coninghen van Iuda der sonnen ghegheuen hadden, inden inganc van des Heeren tempel by Nathanmelech des gesneden camerlincs setel die te Pharurim was, Maer der sonnen waghenen heeft hy metten vier verbrant,

12

Ende die outaren die opt dack van Achaz eetcamer waren, welck die coninghen van Iuda ghemaect hadden, ende die outaren die Manasses ghemaect hadde in die twee voorhouen van des Heeren tempel, heeft die coninc afghebroken, ende hy is van daer gheloopen ende heeft die asschen van dien gheworpen in die beke van Cedron,

13

Ende die hoochden die binnen Ierusalem waren, aen die rechte sijde vanden berch der vertornissen, die welcke Salomon die coninck van Israel ghetimmert hadde Astaroth den afgod vanden Sydoniters, ende Chamos der vertornissen van Moab, ende Melchom der afgrijselijcheyt der kinderen van Ammon heeft die coninc onsuyuer ghemaect,

14

⁺Ende hy heeft die staende beelden in stucken ghebroken ende die bosschelkens af ghehouwen, ende hy heeft hen plaetsen met ghebeente van dooden veruult,

+ D

15

Daer bouen soo heeft hy ooc den outaer die te Bethel was, ende die hoochde die Ieroboam Nabats sone ghemaect hadde, die Israel heeft doen sondighen, ende dien hooghen outaer heeft hy afghebroken ende verbrant ende te puluer ghebracht, ende hi heeft oock dat bosschelken verbrant,

16

Ende Iosias hem omme keerende heeft daer ghesien die grauen die opden berch waren, Ende hy heeft ghesonden ende ghehaelt die beenderen wt die grauen, ende die verbrant op den outaer, ende hi heeft dien onsuyuer ghemaect nae des Heeren woort dat die man Gods ghesproken heeft, die dese woorden te voren gheseyt hadde,

17

Ende hy seyde. Wat titel is dat dien ick sie? Ende die borghers van dier stadt hebben hem gheantwoort. Het is tgraf vanden man Gods, die van Iuda ghecomen is ende te voren gheseyt heeft dese woorden die ghy opden outaer van Bethel ghedaen hebt,

18

Ende hy seyde. Laet hem ligghen niemant en roere sijn ghebeenten, Ende sijn ghebeente bleef ongheroert met dat ghebeente vanden propheet die van Samarien comen was,

19

Daer bouen heeft Iosias ooc wechghedaen alle die tempels der hoochden, die in die steden van Samarien waren, welc die coninghen van Israel ghemaect hadden, om den Heere te creyten, ⁺ende hy heeft dien ghedaen nae alle die wercken die hy te Bethel ghedaen hadde,

+ E

20

Ende hy heeft alle die Priesters der hoochden die daer waren op die outaren ghedoodt, ende hi heeft menschen beenderen daer op verbrant, ende hy is wederom te Ierusalem ghecomen,

21

Ende hy heeft alle den volcke beuolen segghende. Maect Phase den Heere uwen Godt ghelijck datter ghescreuen is int boeck van dit verbont,

22

want sulck Phase en is niet ghehouden gheweest van der rechters daghen die Israel berecht hebben, ende van alle die daghen der coninghen van Israel, ende der coninghen van Iuda,

23

ghelijck dit Phase dwelck in dat achtienste iaer des conincs Iosie ghehouden is gheweest den Heere in Ierusalem,

24

Ende ooc alle die duyuelsche waersegghers ende tooueraers, ende die figueren der afgoden, ende die onsuyuerheden ende afgrijselijcheden die in dlant van Iuda gheweest hadden ende in Ierusalem heeft Iosias wech ghedaen, dat hy die woorden des wets oprechten soude die ghescreuen sijn inden boeck den welcken Helcias die priester in des Heeren tempel gheuonden heeft,

25

Voor hem en was gheen coninc sijns ghelijc, die totten Heere wederkeerde met alle sijn herte, ende met sijn gheheel ziele, ende met alle sijn cracht, na die gheheel wet Moysi, ende nae hem en is gheen sijns ghelijck opghestaen,

26

⁺Maer nochtans en is die Heere niet afgekeert van die verbolghentheyt sijnder grooter rasender gramscappen, daer sijn groote

+ F

[p. *308]

gramscap mede gestoort was teghen Iudam, om die creytinghen daer Manasses hem door verwect hadde,

27

Hierom heeft die Heere gheseyt. Ic sal Iudam ooc wech doen wt mijnen aensicht, ghelijc ic Israel wech ghedaen hebbe, ende ic sal dese stadt Ierusalem die ick vercoren hebbe verworpen, ende dit huys daer ick af gheseydt hebbe. Mijnen naem sal daer sijn,

28

Datter meer is van Iosias woorden, ende al dat hy ghedaen heeft, en sijn dese niet ghescreuen int boeck der woorden van die daghen der coninghen van Iuda?

29

In dien daghen is Pharao Nechao die coninc van Egipten opghetrocken tseghen den coninc van Assirien tot den vloet Euphrates, ende Iosias die coninc is hem te ghemoete ghegaen ende hy is dootgheslaghen te Mageddo doen hy hem ghesien hadde.

30

Ende sijn knechten hebben hem doot ghedraghen van Mageddo ende ghebracht in Iherusalem, ende hem begrauen in sijn graf, ⁺Ende tvolc des lants heeft ghenomen Ioachaz Iosias sone, ende sij hebben dien ghesalft ende coninck ghemaect voor sijnen vader,

+ G

31

Ioachaz was drijentwintich iaren out doen hy begonste te regneren, ende drij maenden heeft hy in Ierusalem gheregneert, Sijns moeders naem was Amital Ieremias dochter van Lobna,

32

Ende hy heeft quaet voor den Heere ghedaen nae alle dat sijn vaderen ghedaen hadde,

33

Ende Pharao Nechao heeft hem ghebonden te Reblata, welck is in dlant van Emath, dat hy te Ierusalem niet regneren en soude, Ende hi heeft op dlant een scattinghe ghestelt van hondert talenten siluers, ende een talent gouts.

34

Ende Pharao Nechao heeft coninck ghemaect Eliacim Iosias sone, in Iosias sijns vaders stede, Ende hi heeft sijnen naem verandert in Ioacim, Maer Ioachaz heeft hy ghenomen ende veruoert in Egipten,

35

Ende Ioacim heeft Pharoni siluer ende gout ghegheuen, doen hy op dlant een scattinghe voor elcken persoon ghestelt hadde, datmen dat tsamen opbrenghen soude nae tghebodt van Pharao, ende hy heeft een ieghelijcken nae sijn macht ghescadt, soo wel aen tsiluer als aen tgout vanden volck des lants om dat Pharao Nechao te gheuen,

36

Vijfentwintich iaren out was Ioacim doen hy begonste te regneren, ende elf iaren heeft hy in Ierusalem gheregneert, sijns moeders naem was Zebida, Phadaias dochter van Ruma,

37

Ende hy heeft quaet voor den Heere ghedaen, ghelijck alle tghene dat sijn vaderen ghedaen hadden.