Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xv. Capittel.

1

⁺INt seuenentwintichste iaer van Ieroboam des conincs van Israel, heeft Azarias Amasias des conincs van Israels sone gheregneert

+ A

2

Hy was sesthien iaren oudt doen hy begonste te regneren, ende tweenvijftich iaren regneerde hy in Ierusalem. Sijns moeders naem was Iechelia van Ierusalem.

3

Ende hy heeft ghedaen dat voor den Heere behaechlijck was, Nae alle dat Amasias sijn vader ghedaen hadde,

4

Maer nochtans en heeft hy die hoochden niet afghebroken, want het volck dede noch sacrificie ende ontstack noch ruecoffer op die hoochden.

5

Ende die Heere heeft den coninck gheslaghen, ende hy was melaetsch tot sijnen sterfdach toe, ende hi woonde in een vrij huys besijden, ende Ioatham des conincs sone regeerde dat palays, ende hy dede recht den volck des lants.

6

Datter noch meer is van Azarias woorden ende alle dat hy ghedaen heeft, ⁺en sijn dese niet ghescreuen int boeck der woorden van die daghen der coninghen van Iuda?

+ B

7

Ende Azarias is met sijnen vaderen ontslapen, ende sy hebben hem met sijn ouders begrauen in Dauids stadt, ende Ioatham sijn sone heeft voor hem gheregneert.

8

Int drijendertichste iaer van Azarias den coninck van Iuda, heeft gheregneert Zacharias Ieroboams sone ouer Israel in Samarien ses maenden,

9

ende hy heeft ghedaen dat quaet is voor den Heere, ghelijck sijn vaderen ghedaen hadden, hy en is niet afghegaen van Ieroboams Nabats soons sonden die Israel heeft doen sondighen.

10

Ende Sellum Iabes sone heeft teghen hem een ghesworen muyterie ghemaect, ende hy heeft hem openbaerlijck gheslaghen, ende ghedoot, ende heeft voor hem gheregneert.

11

Datter meer is van Zacharias woorden, en sijn dese niet ghescreuen int boeck der woorden van die daghen der coninghen van Israel?

12

⁺Dit is des Heeren woordt dat hy ghesproken heeft tot Iehu segghende, V sonen sullen tot die vierde afcoemste van v sitten opden throon van Israel. Ende het is alsoo ghesciet.

+ C

13

Sellum Iabes sone heeft gheregneert, int neghenendertichste iaer Azarie des conincs van Iuda, ende hy regneerde een maent in Samarien.

14

Ende Manahim Gadis sone van Thersa is opghetrocken ende ghecomen in Samarien, ende hy heeft Sellum Iabes soon in Samarien gheslaghen, ende heeft hem ghedoot, ende voor hem gheregneert.

15

Datter meer is van Sellums woorden, ende sijn ghesworen muyterie, waer door hy listighe laghen leyde, en sijn dese niet bescreuen int boeck der woorden van die daghen der coninghen van Israel?

16

Doen sloech Manahem Thapsam, ende alle die daer binnen waren, ende sijn palen van Thersa, want sij en hadden hem niet willen open doen, ende hy heeft allen haer beuruchte vrouwen ghedoot ende open ghesneden.

17

Int neghen ende dertichste iaer Azarie des conincs van Iuda, heeft Manahem Gadis soon gheregneert ouer Israel thien iaren in Samarien.

18

⁺Ende hy heeft ghedaen dat quaet was voor den Heere, hi en is niet afghekeert van die sonden van Ieroboam Nabats sone die Israel heeft doen sondighen alle sijn daghen.

+ D

19

Ende Phul die coninck van Assyrien quam in Thersa, ende Manahem gaf Phul duysent talenten siluers, om dat hy hem tot een helpe sijn soude, ende sijn rijck vestighen.

20

Ende Manahem heeft een scattinghe van siluer ghestelt ouer Israel alle den machtighen ende rijcken, om dat hy den coninc van Assyrien soude gheuen vijftich siclen siluers voor een ieghelijcken. Ende die coninck van Assyrien is wederom ghekeert, ende hy enis niet langhe in Thersa bleuen.

21

Datter meer is van Manahems woorden, ende al dat hy ghedaen heeft, en sijn dese niet ghescreuen int boeck der woorden van die daghen der coninghen van Israel?

22

Ende Manahem is met sijnen vaderen ontslapen, ende Phaceia sijn sone heeft voor hem gheregneert.

23

⁺Int vijftichste iaer Azarie des conincs van Iuda heeft Phaceia Manahems sone gheregneert ouer Israel in Samarien twee iaren,

+ E

24

ende hi heeft ghedaen dat quaet was voor den Heere, hi is niet afghegaen van Ieroboams Nabats soons sonden, die Israel heeft doen sondighen.

25

Maer Phacee die sone Romelie sijn orloochs capiteyn heeft een ghesworen muyterie teghen hem ghemaect, ende heeft hem gheslaghen in Samarien, in den torre van des conincs huys, by Argob, ende by Arie, ende met hem vijftich mannen vanden Galaaditers kinderen, ende hy heeft hem ghedoot, ende voor hem gheregneert.

26

Datter meer is van die woorden van Phaceia ende alle dat hy ghedaen heeft en sijn dese niet ghescreuen int boeck der woorden van die daghen der coninghen van Israel?

27

Int tweenvijftichste iaer Azarie des conincs van Iuda heeft Phacee die sone Romelie gheregneert ouer Israel in Samarien twintich iaren.

28

Ende hy heeft ghedaen dat quaet was voor den Heere, hy en is niet afghekeert van die sonden van Ieroboam Nabats sone, ⁺die Israel heeft doen sondighen.

+ F

29

In Phacee des conincs van Israel daghen, is Teglath Phalassar die coninc van Assur comen, ende heeft Aion inghenomen, ende Abel thuys van Maacha, ende Ianoe, ende Cedes, ende Asor, ende Galaad, ende Galileen, ende alle dlant van Nephthali, ende hy heeftse ouergheuoert in Assyrien.

30

Ende Osee Elas sone heeft een ghesworen muyterie ghemaect ende laghen gheleyt teghen Phacee den soon Romelie, ende hy heeft hem gheslaghen ende ghedoot, ende hi heeft voor hem gheregneert int twintichste iaer Ioatham des soons van Ozie.

31

Maer datter meer is van Phacee woorden, ende alle dat hy ghedaen heeft, en sijn dese niet ghescreuen int boeck der woorden van die daghen der coninghen van Israel?

32

Int tweede iaer Phacee des soons Romelie des conincs van Israel, heeft Ioatham Ozie des conincs van Iuda sone gheregneert.

33

Vijuentwintich iaren was hy out doen hy begonste te regneren, ende sesthien iaren regneerde hy in Ierusalem, sijns moeders naem was Ierusa Sadocs dochter.

34

⁺Ende hy heeft ghedaen dat voor den Heere behaechlijck was, nae alle dat sijn vader Ozias ghedaen hadde heeft hy oock ghedaen,

+ G

35

Maer nochtans en heeft hy die hoochden niet wech ghenomen. Het volck dede noch offerande ende ontstack noch rueckoffer in die hoochden, hy timmerde die alder hoochste poorte van des Heeren huys.

36

Datter meer is van Ioathams woorden, ende alle dat hy ghedaen heeft, en sijn dese niet ghescreuen int boec der woorden van die daghen der coninghen van Iuda?

37

In dien daghen begonste die Heere in Iudam te senden Rasin den coninck van Syrien, ende Phacee den soon Romelie.

38

Ende Ioatham is ontslapen met sijnen vaderen. ende met hen begrauen in Dauids sijns vaders stadt, ende Achaz sijn sone heeft voor hem gheregneert.