Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiij. Capittel.

1

⁺INt drijentwintichste iaer van Ioas Ochozias sone des conincs van Iuda, heeft Ioachaz Iehus sone gheregneert ouer Israhel in Samarien, seuenthien iaren,

+ A

2

Ende hi heeft quaet voor den Heere ghedaen, ende heeft gheuolcht die sonden van Ieroboam Nabats sone, die Israhel heeft doen sondighen, ende hy en is daer niet afghesceyden,

3

Ende die gramscap des Heeren is tornich gheworden teghen Israhel, ende hy heeftse gheleuert in Hazaels des conincs van Sirien hant, ende in die hant van Benadad Hazaels sone tot allen daghen,

4

Maer Ioachaz heeft des Heeren aensicht ghebeden, ende die Heere heeft hem ghehoordt, want hy heeft die benautheyt van Israel aensien, want die coninck van Sirien had dese seer cleyn ghemaect,

5

ende die Heere heeft Israel eenen verlosser ghegheuen, ende sij sijn verlost wt des conincs van Sirien hant, Ende die kinderen van Israel hebben in hen tabernakelen ghewoont, ghelijc ghisteren ende eerghisteren,

6

Maer nochtans en sijn si niet afghekeert van Ieroboam Nabats soons sonden, die Israel hadde doen sondighen, maer sij hebben daer in ghewandelt, want dat bosschelken is in Samarien bleuen,

7

⁺Ende Ioachaz den coninc en sijn vanden volcke niet meer ouerbleuen dan vijftich ruyters te peerde, ende thien waghenen, ende thien duysent voetknechten, want die coninck van Sirien had dese al ghedoodt, ende hi hadde die ghemaect als het puluer int dorschen vanden dorschuloer,

+ B

8

Dander woorden van Ioachaz die daer meer sijn, ende alle dat hy ghedaen heeft, ende sijn sterckheyt, en sijn dese niet ghescreuen int boeck der woorden van die daghen der coninghen van Israel?

9

Ende Ioachaz is met sijnen vaderen ontslapen, ende sij hebben hem begrauen in Samarien, ende Ioas sijn sone heeft voor hem gheregneert

10

Int seuenendertichste iaer Ioas des conincs van Iuda heeft Ioas Ioachaz sone gheregneert ouer Israel in Samarien sesthien iaren,

11

ende hy heeft ghedaen dat quaet was voor des Heeren aensicht, hy en is niet afgheweken van alle Ieroboam Nabats soons sonden, die Israhel heeft doen sondighen, Maer hy heeft daer in ghewandelt,

12

Dander van Ioas woorden datter meer is, ende alle dat hy ghedaen heeft, ende sijn vromicheyt, hoe dat hy ghestreden heeft tseghen Amasiam den coninck van Iuda, en sijn dese niet bescreuen int boeck der woorden van die daghen der coninghen van Israel?

13

Ende Ioas is met sijnen vaderen ontslapen, ende Ieroboam is op sijnen coninclijcken stoel gheseten, ⁺Voorts soo is Ioas in Samarien begrauen met die coninghen van Israel,

+ C

14

Ende Eliseus was van eender siecten cranc daer hy ooc afghestoruen is, ende Ioas die coninc van Israel is tot hem nederwaerts comen, ende hy weende voor hem ende seyde. Mijn vader, mijn vader den waghen van Israhel ende sijnen wagheman,

15

Ende Eliseus heeft hem gheseyt. Haelt eenen boghe ende pijlen, Ende doen hy tot hem eenen boghe ende pijlen ghebracht hadde,

16

so heeft hy tot den coninc van Israel gheseyt. Legt v hant opden boghe, Ende doen hy sijn hant daer op gheleydt hadde, soo leyde Eliseus sijn handen op des conincs handen,

17

ende seyde. Doet die vinster ten oosten open, Ende doen hy die open ghedaen hadde, soo heeft Eliseus gheseyt. Schiet wt den pijl, Ende hy schoot Ende Eliseus heeft gheseydt. Dats eenen pijl van des Heeren salicheyt, ende eenen pijl der salicheyt teghen Sirien, ende ghy sult Sirien slaen in Aphec tot dat

[p. *299]

ghy die vernielt sult hebben,

18

Ende hy seyde. Neemt die pijlen, ende doen hy die ghenomen hadde, so seyde hy wederom tot hem. Slaet die aerde met eenen pijl, ende doen hy die drij reysen gheslaghen hadde ende stille stont,

19

soo is die man Godts teghen hem gram geworden, ende heeft gheseyt. Hadde ghy vijfwerf oft seswerf oft seuenwerf gheslaghen, ⁺soo soude ghy Sirien gheslaghen hebben tot die gantsche verderffenisse, Maer nu sult ghy die drij reysen slaen,

+ D

20

Aldus is Eliseus ghestoruen, ende sij hebben hem begrauen, Maer die roouerkens van Moab sijn int lant ghecomen opt selue iaer,

21

Ende sommighe die eenen mensch begroeuen, hebben die roouerkens ghesien, ende sij hebben dat doot lichaem gheworpen in Eliseus graf dwelck alst dat ghebeente van Eliseus raecte, soo is die mensch weder leuende gheworden, ende hi stont op sijn voeten,

22

Aldus heeft Hazael die coninck van Sirien Israel seer verdruct alle die daghen van Ioachas,

23

ende die Heere heeft bermherticheyt ouer hen ghehadt, ende hy is wederom tot hen ghekeert, om sijn verbont dat hi hadde met Abraham, ende Isaac, ende Iacob, ende hy en wildese niet al te niet brenghen, noch gheheel verworpen tot op desen tijt toe,

24

Ende Hazael die coninck van Sirien is ghestoruen, ende Benadad sijn sone heeft voor hem geregneert,

25

Maer Ioas Ioachas sone heeft die steden ghenomen wt die hant van Benadad Hazaels sone, die welcke hy genomen hadde wt Ioachaz sijns vaders hant met orloochs recht, drij reysen heeft hem Ioas gheslaghen, ende hi heeft die steden van Israel weder ouer ghegheuen.