Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xij. Capittel.

1

⁺INt seuenste iaer van Iehu regneerde Ioas, Veertich iaren heeft hy gheregneert in Ierusalem, sijns moeders naem was Sebeia van Bersabee,

+ A

2

Ende Ioas heeft ghedaen dat recht was voor den Heere, alle die daghen dat hem Ioiada die priester leerde,

3

Maer nochtans en heeft hy die hoochden niet wech ghenomen, want het volck dede noch slachofferanden ende ontstack ruecofferanden op die hoochden,

4

Ende Ioas heeft totten priesters gheseydt. Alle tghelt der heyligher offeranden, dat in des Heeren tempel ghebrocht worden sal vanden ghenen die voorby gaen, welck gheoffert wort voor eenen prijs der zielen, ende dat sij wt hem seluen ende wt haers herten vrijen wille in brenghen in des Heeren tempel,

5

dat sullen die priesters nae haer ordinancien ontfanghen, ende daer mede sullen sij vermaken die veruallen timmeragien des huys, eest dat sij yet sien sullen dat nootelijcken vermaect moet worden,

6

Aldus tot dat

[p. *298]

drijentwintichste iaer, des conincks Ioas en hebben die priesters des tempels veruallinghen niet vermaect

7

Ende die coninck Ioas heeft Ioiadam den oppersten priester ende die priesters gheroepen segghende tot hen. ⁺Waerom en vermaecte ghy des tempels veruallinghen niet? Hierom en wilt niet meer het ghelt ontfanghen nae uwe ordinancie, maer gheeft dat weder ouer, tot des tempels vermakinghe,

+ B

8

Ende het is den priesters verboden het ghelt te ontfanghen vanden volcke, ende die veruallinghen des huys te vermaken,

9

Ende Ioiada die opperste priester heeft een offerkiste ghenomen ende daer een gat bouen open ghedaen, ende hy heeft die ghestelt by den outaer ter rechter sijden daermen in des Heeren huys ghaet, ende die priesters die die doren bewaerden staken daerin alle tgelt datter ghebracht worde tot des Heeren tempel,

10

Ende als sij saghen datter te veel ghelts in die offerkiste was, so quam des conincks scrijuer opwaerts ende die opperste priester, ende sij goten dat wt ende telden tghelt datter in des Heeren huys gheuonden worde

11

ende sij ghauen dat by ghetale ende ghewichte in die hant der gheender diet regiment hadden ouer die metsers van des Heeren huys, die welcke dat wtghauen aen die timmerlieden ⁺ende aen metsers die in des Heeren huys wrachten,

+ C

12

ende die veruallinghen vermaecten, ende aen die steenhouwers, ende om te coopen hout ende steenen die wtghehouwen worden, alsoo dat die vermakinghe van des Heeren huys soude volbracht worden, in alles daert van noode was cost aen te doen om dat huys te verstercken,

13

Maer nochtans en worden van dien seluen ghelde niet ghemaect die water cruycken van des Heeren tempel, ende die crauwelken, ende die wieroocvaten, ende die trompetten ende alle die gulden ende silueren ghereetscappen van den ghelde dat tot des Heeren tempel ghebrocht worde,

14

Want het worde ghegheuen den ghenen diet werc maecten, om dat des Heeren tempel soude vermaect worden,

15

Ende men en stelde hen gheen rekeninghe te doen, die tghelt ontfinghen, om dat den constighen werckluyden wt te gheuen, Maer sij handelden dat ghelt op hen ghelooue,

16

Maer tghelt voor die versuemenissen, ende tghelt voor die sonden, en brachten sij in des Heeren tempel niet, want het behoorde den priesters toe,

17

Doen quam Hazael die coninc van Sirien opwaerts ende streedt teghen Geth, ende hy heuet inghenomen, ende hy stelde sijn aensicht om opwaerts te comen nae Ierusalem,

18

⁺Hierom heeft Ioas die coninck van Iuda ghenomen alle die gheheylichde offeranden die sijn vaderen Iosaphat ende Ioram ende Ochozias die coninghen van Iuda gheheylicht hadden, ende die hy oock gheoffert hadde, ende alle tsiluer datmen vinden mocht in die scatten van des Heeren tempel ende in des conincs palays, ende hi heeft dat ghesonden Hazael den coninck van Sirien, ende die is van Ierusalem ghetrocken,

+ D

19

Maer dander woorden van Ioas die daer meer sijn, ende alle dat hy ghedaen heeft, en sijn dese niet ghescreuen int boeck der woorden van die daghen der coninghen van Iuda?

20

Ende sijn knechten stonden tseghen hem op ende sij maecten een ghesworen muyterie met malcanderen, ende sij versloeghen Ioas int huys van Mello inden nederganck van Sella,

21

Want Iosachar Semaaths sone ende Iosabad Somers sone sijn knechten hebben hem verslaghen, ende hy is ghestoruen, ende sij hebben hem begrauen met sijnen vaderen in Dauids stadt, ende Amasias sijn sone heeft voor hem gheregneert.