Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xi. Capittel.

1

⁺ENde Athalia die moeder van Ochozias siende dat haer sone doot was, heeft alle dat coninclijck saet ghedoodt,

+ A

2

Maer Iosaba des conincs Iorams dochter Ochozias suster, nemende Ioas Ochozias sone, heeft hem met sijnder voester ontstolen wt het midden van des conincs kinderen die ghedoot worden wt die slaepcamer, ende sij heeft hem gheborghen wt dat aensicht van Athalia dat hy niet en soude ghedoot worden,

3

Ende hi was by haer ses iaren al heymelijc in des Heeren huys, Ende Athalia regneerde opt lant,

4

Maer op dat seuenste iaer heeft Ioiada wt ghesonden ende met hem nemende die honderste mannen, ende die ruyters heeft hy die tot hem gheleydt in des Heeren tempel, ende hi heeft met hen een verbont ghemaect, ende hen beswerende in des Heeren huys heeft hi hen des conincs sone ghetoont,

5

ende hy heeft hen beuolen segghende. Dit is dwoordt dat ghy doen moet,

6

Het derden deel van v lieden, sal op den sabboth inne comen, ende houden die wake van des conincs huys, Ende het ander derden deel sal sijn by die poorte van Seyr, ende een derdendeel sal sijn aen die poorte die by der sciltmannen huys is, ende ghy sult die wachte houden van dat huys Messa,

7

⁺Maer die twee deelen van v lieden allegader wtgaende opden sabboth dach, laet houden die wachte van des Heeren huys omtrent den coninck,

+ B

8

Ende ghy sult rontsomme den coninck staen, houdende wapenen in v handen, ende eest datter yemant binnen des tempels beuanck coemt, dien salmen dootslaen, ende ghy sult by den coninck blijuen als hy incoemt ende wtgaet,

9

Ende die honderste mannen hebben ghedaen nae alle tghene dat hen Ioiada die priester beuolen hadde, Ende elck met hem nemende sijn mannen die opden sabbboth dach in ghinghen, met den ghenen die opden sabboth dach wt ghingen, sijn ghecomen tot Ioiada den priester,

10

Die welcke hen heeft ghegheuen die lancien ende wapenen des conincks Dauids, die daer in des Heeren huys waren,

11

⁺Ende sij stonden elck hebbende wapenen in haer handen aen die rechte sijde des tempels, tot aen die slincke sijde des outaers ende des tempels rontsomme den coninck,

+ C

12

Ende hy heeft des conincks sone voorts ghebracht, ende een croone op hem ghestelt, ende dat ghetuyghenis, ende sij hebben hem coninck ghemaeckt, ende ghesalft, ende metten handen tsamen slaende hebben sij gheseyt. Die coninck leue,

13

Ende Athalia heeft ghehoort die stemme des loopende volcks, ende comende by die scaren des volcks in des Heeren tempel,

14

heeft sij den coninck ghesien staende op sijnen rechter stoel nae die ghewoonte, ende sanghers, ende trompetten by hem, ende alle het volck des lants blijscap makende, ende blasende met trompetten, ende sij heeft haer cleederen ghescoort, ende gheroepen, Muyterie, muyterie,

15

Maer Ioiada heeft den hondersten mannen die ouer theyr waren beuolen, ende tot hen gheseyt. Leydtse wt dat bevrijde des tempels ende soo wie haer nae volcht, datmen dien doot slae metten sweerde, Want die priester hadde gheseydt. En laetse in des Heeren tempel niet doot gheslaghen worden,

16

Ende sij hebben hen handen aen haer gheslaghen, ende haer voorts ghestooten door den wech vander peerden inganck by tpalays, ende daer is sij doot gheslaghen,

17

Aldus heeft Ioiada een verbont ghemaect tusschen den Heere ende den coninck, ende tusschen tvolck, dat sij des Heeren volck sijn souden, ende tusschen den coninck ende tvolck,

18

⁺Ende alle tvolck des lants is in Baals tempel ghegaen, ende sij hebben sijnen outaer ghebroken, ende sijn beelden hebben sij met grooter cracht in stucken ghebroken. Ooc hebben sij Mathan Baals priester doot gheslaghen voor den outaer, Ende die priester heeft hoede ghestelt in des Heeren huys,

+ D

19

ende hy heeft ghenomen die honderste mannen, ende die legioenen Cerethi, ende Phelethi, ende alle dat volck des lants, ende sij hebben den coninck gheleydt wt des Heeren huys, ende sijn ghecomen door den wech van der sciltmannen poorte tot int palays, ende hy is gheseten op der coninghen throon,

20

Ende alle tvolck des lants heeft hem verblijt, ende die stadt worde stille rustende, Maer Athalia is metten swaerde ghedoot in des conincks huys,

21

Seuen iaren oudt was Ioas doen hy begonste te regneren.