Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .x. Capittel.

1

⁺AChab hadde tseuentich sonen in Samarien, Hierom heeft Iehu eenen brief ghescreuen ende ghesonden in Samarien tot die beste vander stadt, ende tot die ouders, ende tot Achabs voester heeren seggende.

+ A

2

Ter stont als ghi desen brief sult ontfanghen hebben ghy die ws heeren sonen hebt ende waghenen, ende peerden, ende vaste besloten steden, ende wapenen,

3

kiest den besten ende den ghenen die v lieden best aenstaet van ws heeren sonen, ende stelt dien op sijns vaders rijcstoel, ende strijt voor ws heeren huys,

4

Maer sij vreesden anxtelijcken seere, ende seyden. Siet twee coninghen en hebben voor hen niet moghen staende blijuen, Hoe sullen wij dan moghen wederstaen?

5

Hierom hebben die ouerste des huys ende die prouoosten van der stadt ende die ouders ende die voesterheeren tot Iehu ghesonden segghende. Wij sijn v dienaers, al wat ghi ons ghebiedt dat sullen wi doen Ende wij en sullen gheenen coninc ouer ons maken wat v belieft dat doet,

6

Ende hy heeft hen andermael eenen brief gescreuen segghende. Eest dat ghi mijne sijt, ende my ghehoorsaem sijt, soo neemt die hoofden van ws heeren sonen, ende coemt tot my te deser seluer vren morghen tot Iezrahel, Ende des conincs sonen tseuentich mannen worden by die beste vander stadt opghevoedt,

7

Ende doen den brief tot hen comen was, soo hebben sij des conincs sonen ghenomen, ende hebben die tseuentich mannen doot gheslaghen, ende hen hoofden in coruen gheleydt, ende die tot hem ghesonden in Iezrahel,

8

Ende die bode is comen, ende heeft hem dit te kennen ghegheuen segghende. ⁺Sij hebben die hoofden van des conincks sonen ghebracht, Die welcke antwoorde. Stelt die op twee hoopen by den inganc vander poorten tot morghen toe,

+ B

9

Ende doent daer dach gheworden was, soo is hy wtghegaen, ende staende heeft hi tot alle tvolck gheseyt. Ghi sijt rechtueerdich, heb ick teghen mijnen Heere een ghesworen verbont ghemaect, ende hem doot gheslaghen, wie heeft alle dese gheslaghen?

10

Hierom siet nv datter niet op die aerde gheuallen en is van alle des Heeren woorden, welc die Heere ghesproken heeft ouer thuys van Achab ende die Heere heeft ghedaen dat hy ghesproken heeft door Elias sijns dienaers hant,

11

Daerom heeft Iehu in Iezrahel verslaghen alle die daer noch ouer bleuen waren van Achabs huys, ende alle sijn edele, ende sijn bekende, ende sijn priesters, tot datter gheen van hem ouer en bleuen,

12

Ende hy is opghestaen ende in Samarien ghecomen, Ende doen hy comen was tot dat ghewelft huys der herders, in den wech daer heeft hy vonden

13

Ochozie des conincs van Iuda broeders ende hy heeft tot hen gheseyt. Wie sidy? Ende sij antwoorden. Wij sijn Ochozias broeders, ende sijn afcomen om te groeten des conincks sonen ende der coninghinnen sonen,

14

Doen seyde hy. Vangtse leuende, Ende als sij die leuende ghevanghen hadden, soo hebben sij die ghedoot inden put by dat ghewelft huys, tweenveertich mannen, ende hy en heeft daer niemandt van dien laten ouerblijuen.

15

Ende doen hy van daer ghegaen was, so heeft hy gheuonden Ionadab Rechabs sone, hem te ghemoete comende, ende hy heeft hem ghebenedijt, Ende hy heeft tot hem gheseydt. Is v herte ook oprecht ghelijck mijn herte met v herte is? ⁺En Ionadab seyde. Iaet. Eest alsoo (seyde hy) soo gheeft v hant, De welcke hem sijn hant gaf, ende Iehu heeft hem tot sijs eluen inden waghen op opghehauen,

+ C

16

ende seyde tot hem. Coemt met mij, ende siet mijn gramme liefde voor den Heere, Ende settende hem op sijnen waghen

17

heeft hy hem gheuoert in Samarien, Ende hy heeft gheslaghen alle die daer ouerbleuen waren binnen Samarien van Achab, tot eenen toe nae des Heeren woort dat hy ghesproken heeft door Eliam,

18

Hierom heeft Iehu alle tvolck vergadert, ende tot hen gheseyt. Achab heeft Baal weynich ghedient, maer ick sal hem veel meer dienen,

19

Daerom roept by my alle Baals propheten, ende alle sijn dienaers, ende alle sijn priesters, datter niemant achter en blijue, Want ic hebbe Baal een groote offerande te doen, soo wie daer niet by en is die en sal te leuen niet blijuen, Maer Iehu dede dat listelijck omdat hi Baals dienaers heel te niet doen soude,

20

Ende hy heeft gheseyt. Heylicht Baal eenen feestdach, Ende hi heeft gheroepen

21

ende ghesonden in alle die palen van Israel, ende alle Baals dienaers sijn comen, daer en bleef niet een achter die daer niet en quam, Ende sij sijn in Baals tempel ghegaen, ende Baals huys is vol gheworden, van beneden tot bouen toe,

22

Ende hy heeft gheseyt den ghenen die den last vanden cleederen hadden. Brengt voorts cleederen voor alle Baals dienaers, Ende sij hebben hen cleederen voorts bracht,

23

Ende Iehu met Ionadab Rechabs sone in Baals tempel comende, heeft tot Baals dienaers gheseyt. Ondersoect ende besiet dat hier by auontueren niemant met v lieden en sij van des Heeren dienaers, maer dat Baals dienaers alleen sijn.

24

Aldus sijn sij binnen ghecomen om slachofferanden ende heelbrantofferanden te doen, Maer Iehu hadde voor hem daer buyten bereydt tachtentich mannen, ende hen gheseyt. Soo wie van desen menschen ontuliet, die ick in v handen sal brenghen, sijn ziele sal voor diens ziele sijn,

25

Ende het is ghesciet doen die heelbrantofferande voldaen was, dat Iehu heeft sijnen ruyters ende capiteynen beuolen. Gaet binnen, ende verslaetse datter niemant en ontgae, ⁺Ende sij hebbense verslaghen met dat scerp vanden swaerde, ende die ruyters ende capiteynen hebbense wech gheworpen, ende si sijn ghegaen in die stadt van Baals tempel,

+ D

26

ende hebben ghehaelt wt Baals tempel Baels staende beelt, ende sij hebben dat verbrant

27

ende te puluer ghebracht, Oock hebben sij Baals tempel verbrant, ende daervore een heymelijcheyt ghemaect tot op desen dach toe.

28

Aldus heeft Iehu Baal te niet ghedaen wt Israhel,

29

Maer nochtans van Ieroboams Nabats soons sonden die Israel heeft doen sondighen, en is hy niet afghescheyden, ende hi en heeft die gulden calueren niet verlaten die te Bethel ende te Dan waren,

30

Maer die Heere heeft tot Iehu gheseydt. Aenghesien dat ghy naerstelijck ghedaen hebt dat recht was ende behaechlijck in mijnen ooghen, ende hebt ghedaen teghen Achabs huys alle dat in mijn herte was, daer om sullen v sonen tot dat vierde ledt sitten op den conincs stoel van Israel,

31

Maer Iehu en heeft niet ghehouden dat hi wandelen soude in des Heeren des Godts van Israhel wet, met sijn gheheel herte, Want hy en is van Ieroboams sonden niet ghescheyden die Israhel hadde doen sondighen,

32

In dien daghen beghonstet den Heere te verdrieten ouer Israhel, ende Hazael heeftse gheslaghen aen alle die palen van Israhel,

33

van die ior-

[p. *297]

dane af teghen ouer die oostsijde, alle dlant van Galaad, ende Gad, ende Ruben, ende Manasse, van Aroer die aen die beke van Arnon gheleghen is, ende Galaad, ende Basan.

34

Die ander woorden van Iehu ende alle dat hi ghedaen heeft, ende sijn stercheyt, en sijn die niet ghescreuen int boeck der woorden van die daghen der coninghen van Israhel?

35

Ende Iehu is met sijnen vaderen ontslapen, ende sij hebben hem begrauen in Samarien, ende Ioachas sijn sone heeft in sijn stede gheregneert,

36

Ende die daghen dat Iehu ouer Israel gheregneert heeft in Samarien sijn gheweest achtentwintich iaren.

[afbeelding]