Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ix. Capittel.

1

⁺MAer Eliseus die propheet heeft gheroepen een van der propheten sonen, ende heeft tot hem gheseyt. Omgort v lendenen, ende neemt dit olie potteken in v hant ende gaet te Ramoth Galaad,

+ A

2

Ende als ghi daer sult comen sijn, soo suldi sien Iehu

[p. *295]

den sone van Iosaphat des soons van Namsi, ende binnen comen sijnde, soo suldi hem doen opstaen wt dat midden van sijnen broeders, ende leyden hem in dat binnenste camerken,

3

Ende houdende dat potteken olien, suldi dat storten op sijn hooft ende segghen. Dit seyt die Heere. Ic heb v een coninc ouer Israel ghesalft, Ende ghy sult die dore open doen, ende vlieden wech, ende daer niet staende blijuen.

4

Hierom is die ionghelinc eens propheten kint wech ghegaen tot Ramoth-galaad,

5

ende hi is daer binnen gegaen, Maer siet die princen des heyrs saten, ende hi seyde. Ic heb een woort aen v o ghi prince, Ende Iehu heeft geseyt. Aen wien van ons allen? Ende hi seyde. Aen v o ghi prince,

6

⁺Ende hy is opghestaen ende in die camer ghegaen, ende hy storte die olie op sijn hooft ende seyde. Dit seyt die Heere die God van Israel. Ick heb v tot eenen coninc ghesalft ouer des Heeren volck van Israel,

+ B

7

Ende ghy sult Achab ws heeren huys verslaen, ende ic sal wreken het bloet van mijnen dienaers der propheten ende alle des Heeren dienaers bloet van Iezabels handen,

8

Ende ic sal tgheheel huys van Achab verderuen, ende ick sal van Achab doot slaen alle dat aen den wandet pisset ende den besloten, ende den wtersten in Israel,

9

Ende ick sal Achabs huys gheuen ghelijck thuys van Ieroboam Nabats sone ende ghelijck Baasa Ahia soons huys

10

Ende die honden sullen Iezabel eten opt velt van Iezrahel, ende daer en sal niemant sijn die haer begrauen sal, Ende hy heeft die dore open ghedaen, ende is wech gheuloden,

11

Maer Iehu is wtgheghaen tot sijns heeren knechten, die welcke tot hem seyden. Sijn alle dinghen te rechte? Waerom is dese ontsinninghe tot v comen, Ende hy seyde tot hen. Ghy kent den man wel, ende wat hy ghesproken heeft,

12

⁺Ende sij hebben gheantwoort. Het en is niet waer, Maer lieuer vertellet ons ghy, Die welcke seyde. Dese ende dese woorden heeft hy my ghesproken ende gheseyt. Dit seyt die Heere. Ick heb v tot eenen coninck ouer Israel ghesalft,

+ C

13

Hierom hebben si hen ghehaest, ende een yeghelijc nemende sijnen mantel hebben die gheleyt onder sijn voeten, op een maniere van eenen conincs stoel, Ende sij hebben met een trompet gheluyt ghegheuen ende gheseyt. Iehu heeft gheregneert,

14

Hierom heeft Iehu Iosaphats sone des soons Namsi een ghesworen verbont ghemaect teghen Ioram, Maer Ioram hadde Ramoth Galaad omleydt, hy ende geheel Israel teghen Hazael den coninck van Sirien,

15

ende hy was wederom comen om ghenesen te worden in Iezrahel van die wonden want die Siriers hadden hem gheslaghen doen hy vechtende was teghen Hazael den coninck van Sirien, Ende Iehu heeft gheseyt. Eest dat n belieft, so en laet niemant wt die stadt vluchtich wech ghaen, dat hy niet en gae, ende bootscappe dit te Iezrael,

16

Ende hy is opwaerts ghetrocken ende ghereyst nae Iezrael, want Ioram lach daer sieck, ende Ochozias die coninc van Iuda was nederwaerts comen om Ioram te besoecken.

17

⁺Aldus heeft die wachter die opden torre van Iezrael stont ghesien den hoop van Iehu comende, ende hi heeft gheseyt. Ick sien eenen hoop, Ende Ioram seyde. Neemt eenen waghen ende sendt hem te ghemoete ende dat hi segge die derwaerts gaet. Sijn alle dinghen te rechte?

+ D

18

Hier om is hy wech ghetrocken die opden waghen ghegaen was hem te ghemoete, ende hy heeft geseyt. Dit seyt die coninc. Sijn alle dinghen in vreden? Ende Iehu seyde. Wat gaet v den vrede aen? Gaet door ende volcht my Ende die wachter heeft dit ooc vercondicht segghende. Die bode is bi hen comen, ende hy en keert niet wederom

19

Aldus heeft hy den tweeden waghen met paerden ghesonden, ende hy is tot hen comen ende heeft gheseyt. Dit seyt die coninc. Eest vrede? Ende Iehu seyde. Wat gaet v den vrede aen? Gaet door ende volcht my,

20

⁺Ende die wachter heeft dit ooc vercondicht seggende. Hy is tot by hen comen, ende hy en keert niet wederomme, Ende den ganc is ghelijc den ganc van Iehu Namsi soon, want hy gaet seer haestelijc,

+ E

21

Ende Ioram seyde. Spant in den waghen, Ende si spanden sijnen waghen in, ende Ioram die coninc van Israel ende Ochozias die coninc van Iuda sijn wtgetrocken, een ieghelijc op sijnen waghen, ende sij sijn Iehu te ghemoete ghereyst, ende sij hebben hem vonden in Naboths des Iezraheliters acker,

22

Ende doen Ioram Iehu ghesien hadde, so seyde hy. Eest vrede Iehu? Ende hy antwoorde. Wat vrede? Vwer moeder Iezabels oncuyscheden ende veel toouerien sijn noch machtich,

23

Maer Ioram keerde sijn hant, ende vliedende seyde hy tot Ochoziam. Tis verraderie Ochozia,

24

Ende Iehu spande sijnen booghe metter hant, ende hy quetste Ioram tusschen sijn scouderen, ende den pijl is wtghegaen door sijn herte, Ende ter stont viel hy neder in sijnen waghen,

25

Ende Iehu heeft gheseyt tot Badacer den capiteyn. Neemt ende worpt hem opden acker van Naboth den Iezraheliter ⁺Want ic ben wel ghedachtich doen ic ende ghy opden waghen sittende Achab sijnen vader volchden dat die Heere desen last op hem heeft gheleydt segghende,

+ F

26

Eest dat ick v voor Naboths bloet ende voor sijnder kinderen bloet, dien ic ghisteren ghesien hebbe (sprac die Heere) niet weder en loone op desen acker seyt die Heere, Hierom neemt hem nv, ende worpt hem opden acker nae des Heeren woort,

27

Maer Ochozias die coninck van Iuda dat siende nam die vlucht door den wech vanden huyse des hoefs, Ende Iehu heeft hem veruolcht ende gheseyt. Slaet desen oock in sijnen waghen, Ende sij hebben hem gheslaghen inden opganck van Gaber, welck is by Ieblaam, die welcke is gheuloden te Mageddo ende daer ghestoruen,

28

Ende sijn knechten hebben hem op sijnen waghen gheleydt ende gheuoert in Ierusalem, ende begrauen met sijnen vaderen in Dauids stadt,

29

Int elfste iaer van Ioram Achabs sone, heeft Ochozias gheregneert ouer Iudam,

30

ende Iehu is te Iezrahel ghecomen, Ende Iezabel hoorende van sijnder innecoemst, heeft haer ooghen met eenen stibius steen ghescildert, ende haer hooft verciert, ende sach wt ter vensteren

31

Iehu incomende door die poorte ende sij seyde. Sal Zambri moghen vrede hebben die sijnen heere doot gheslaghen heeft?

32

⁺Ende Iehu hief sijn aensicht opwaerts ter vensteren ende seyde. Wie is dese? Ende twee oft drij ghesneden camerlinghen buychden hen neder voor hem,

+ G

33

Ende hy seyde tot hen. Worptse nederwaerts. Ende sij hebbense van bouen nederwaerts gheworpen, Ende den muer worde met haren bloede bespraeyt, ende der peerden clauwen hebben haer vertreden,

34

Ende doen hy binnen gheghaen was om te eten ende te drincken, so seyde hy. Ghaet henen ende besiet die vermaledijde vrouwe ende begraeftse want het is eens conincs dochter,

35

Ende doen sij ghegaen waren om haer te begrauen, soo en hebben sij niet vonden dan het bloot hooft ende die voeten, ende het wterste der handen,

36

Ende weder om comende hebben si hem dat gheseyt, Ende Iehu seyde. Dit is des Heeren woort dat hy ghesproken heeft door sijnen dienaer Eliam den Thesbiter segghende. Op den acker van Iezrahel sullen die honden eten het

[p. *296]

vleesch van Iezabel,

37

ende Iezabels vleesch sal sijn ghelijck mest op dat aensicht der aerden inden acker van Iezrael, alsoo dat die voor by ghaende segghen sullen. Es dit die Iezabel?