Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .viij. Capittel.

1

⁺ENde Eliseus heeft ghesproken totter vrouwen wiens sone hi hadde doen leuen seggende. Staet op gaet henen ghy ende v huys, ende wort vreemdelinghen erghers daer ghy dat vinden moecht. Want die Heere heeft den hongher gheroepen, ende die sal opt lant comen seuen iaren,

+ A

2

Die welcke is opghestaen ende heeft ghedaen nae des mans Gods woort, ende wech gaende met haren huysghesin is si vreemdelinc worden inder Philistijnen lant veel daghen,

3

Ende doen die seuen iaren voleyndt waren, so is die vrouwe wt der Philistijnen landt wederom comen, ende si is wtghegaen om den coninc aen te spreken om haer huys ende om haer ackerlanden,

4

⁺Ende die coninc sprac met Giezi des mans Gods knecht segghende. Vertelt my alle die groote wercken die Eliseus ghedaen heeft,

+ B

5

Ende doen hy den coninc vertelde hoe hij eenen dooden verwect hadde, so quam daer die vrouwe wiens sone hy leuende ghemaect hadde, roepende tot den coninc om haer huys ende om haer ackerlanden, ende Giezi heeft gheseyt. Mijn heere die coninck dit is die vrouwe ende dits haer sone den welcken Eliseus verwect heeft,

6

Ende die coninc heeft die vrouwe onderuraecht, ende si heeft hem dit vertelt, Ende die coninck heeft haer eenen ghesneden camerlinc ghegheuen segghende. Gheuet haer al wederom dat haer toebehoort ende alle die renten der ackerlanden vanden dach dat sij het lant verlaten heeft tot op desen tijd toe,

7

⁺Ende Eliseus is te Damascus comen, ende Benadad die coninc van Sirien was sieck, ende sij hebben hem te kennen ghegheuen segghende. Die man Gods coemt herwaerts,

+ C

8

Ende die coninc seyde tot Hazael. Neemt ghiften met v, ende gaet den man Godts te ghemoete, ende vraghet vanden Heere raet door hem segghende. Sal ic dese mijn siecte moghen ontgaen?

9

Hierom is Hazael hem te ghemoete ghegaen, hebbende met hem ghiften ende alderhande goeden van Damasco veertich kemelen lasts, Ende doen hy voor hem stont, soo heeft hy gheseyt. V sone Benadad die coninc van Sirien heeft my tot v ghesonden zegghende. Sal ick moghen ghenesen van dese mijne siecte?

10

Ende Eliseus heeft tot hem gheseyt. ⁺Gaet henen, segt hem ghi sult ghenesen worden, Maer die Heere heeft my ghetoont dat hy die doot steruen sal,

+ D

11

Ende hy stont by hem ende hi is beroert gheworden tot bescaemtheyt sijns aensichts, ende die man Gods heeft gheweent,

12

Tot wien Hazael seyde Waerom weent mijn heere? Ende hi seyde. Want ic weet wel wat quade dinghen ghi den kinderen van Israel doen sult, Haer besloten steden suldi metten viere verbranden, ende haer ionghelinghen suldi metten swaerde verslaen, ende hen kinderkens suldi deen teghen dander doot stooten ende haer beuruchte vrouwen verscooren,

13

Ende Hazael heeft gheseyt. Wat ben ic v knecht, een hont dat ick dit groot dinck doen soude? Ende Eliseus seyde. Die Heere heeft my ghetoont dat ghy coninck van Sirien sijn sult,

14

⁺Ende als hi wech ghegaen was van Eliseo, soo is hy tot sijnen heere comen, die welcke hem seyde. Wat heeft v Eliseus gheseydt? Ende hy antwoorde. Hy heeft my gheseyt dat ghy ghenesen sult,

+ E

15

Ende als den anderen dach comen was, so heeft hy ghenomen een beddecleedt ende daer water op ghegoten, ende dat op sijn aensicht ghespraeyt, ende doen hy doot was, soo heeft Hazahel gheregneert in sijn plaetse.

16

Int vijfste iaer Ioram Achabs sone des conincks van Israel, ende Iosaphat des conincks van Iuda, heeft Ioram Iosaphats sone die coninck van Iuda gheregneert,

17

Tweendertich iaren out was hy doen hy begonste te regneren, ende acht iaren heeft hi in Ierusalem gheregneert,

18

Ende hy heeft ghewandelt in die weghen der coninghen van Israel, ghelijc thuys van Achab gthewandelt hadde, want Achabs dochter was sijn huysvrouwe, ende hy heeft ghedaen dat quaet is voor des Heeren aensicht,

19

⁺Maer die Heere en heeft Iudam niet willen verderuen, om Dauids sijns knechts wille, ghelijc hy hem gheloeft hadde, dat hy hem ende sijnen sonen een licht gheuen soude tot allen daghen

+ F

20

In sijnen daghen is Edom afghesceyden dat sij onder Iudam niet sijn en souden, ende sij maecten hen seluen eenen coninck,

21

Ende Ioram is comen te Seira ende alle die waghenen met hem, ende hy is des nachts opghestaen, ende hy heeft die Idumeen gheslaghen die hem omringhelt hadden, ende die princen der waghenen, maer tvolck is gheuloden in hen tabernakelen.

22

Aldus is Edom afghesceyden dat hy niet en soude wesen onder Iuda, tot op desen dach toe, Doen sceydde Lobna oock af op den seluen tijt,

23

Ende datter meer is van Iorams woorden ende alle dat hi ghedaen heeft, en sijn die niet al ghescreuen int boec der woorden van die daghen der coninghen van Iuda?

24

Ende Ioram is met sijnen vaderen ontslapen, ende met hen begrauen in Dauids stadt, ende Ochozias sijn sone heeft voor hem gheregneert,

25

Int twaelfste iaer van Ioram Achabs sone des conincks van Israel heeft Ochozias Iorams des conincs van Iuda sone gheregneert,

26

⁺Tweentwintich iaren out was Ochozias doen hi begonste te regneren, ende een iaer heeft hy in Ierusalem gheregneert, Sijns moeders naem was Athalia Amrams Amri des conincs van Israel dochter

+ G

27

Ende hy heeft ghewandelt in die weghendes huys van Achab, ende hi heeft ghedaen dat quaet is voor den Heere, ghelijc Achabs huys, want hy was een behoude sone van Achabs huys,

28

Hy is ooc wech ghereyst met Ioram Achabs sone om te strijden teghen Hazael den coninc van Sirien te Ramoth Galaad, ende die Siriers hebben Ioram ghewont,

29

die welcke is weder comen, om ghenesen te worden in Iezrael, want die Siriers hadden hem ghewont, doen hy te Ramoth street teghen Hazael den coninck van Sirien, Maer Ochozias Iorams sone die coninck van Iuda, is nederwaerts ghegaen om Ioram Achabs sone te besoecken te Iezrahel, want hy daer sieck lach.