Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vii. Capittel.

1

⁺DOen seyde Eliseus. Hoort des Heeren woordt, Dit seydt die Heere. Te deser tijt morgen sal een mate bloeme des meels eenen stater gulden ende twee maten ghersten eenen stater in die poorte van Samarien,

+ A

2

Ende een vanden vorsten op wiens hant die coninck rustede antwoordende den man Gods seyde, Al maecte die Heere oock sluysen inden hemel soude dit moghen gheschieden dat ghi segt? Hy heeft gheseyt. Ghy sult dat met uwen ooghen sien, ende daer niet af eten.

3

Ende daer waren vier melaetsche mannen by den inganck vander poorten, die welcke hebben tot malcanderen gheseyt. Wat willen wij hier blijuen tot dat wij steruen?

4

Tsij dat wij in die stadt ghaen willen, soo sullen wij van hongher steruen, tsij dat wi hier blijuen so moeten wij ooc steruen, Hierom coemt ende laet ons ouervlieden tot den legher vanden Siriers, eest sake dat si ons sparen, so sullen wi leuen. Maer eest dat si ons willen dootslaen, soo sullen wij niet te min steruen.

5

Hierom sijn sij des auonts opghestaen om te comen tot der Siriers heyrlegher, ⁺Ende doen sij comen waren aen tbeghinsel vander Siriers heyrlegher, soo en hebben si daer niemandt gheuonden,

+ B

6

Want die Heere hadde doen hooren tgheluyt van peerden ende waghenen, ende van een groot heyr inden heyrlegher vanden Siriers, ende sij hebben tot malcanderen gheseyt. Siet die coninc van Israel heeft teghen ons om loon ghehuert der Hethiters ende Egiptenaerts coninghen, ende sij sijn op ons ghecomen,

7

Hierom sijn sij opghestaen ende gheulucht in die duysternissen, ende sij hebben haer tenten, ende peerden, ende esels inden heyrlegher ghelaten, ende sij sijn gheuloden, begheerende alleen haer zielen te behouden,

8

Als dan die melaetscen aldus comen waren aen dat beghinsel vanden heyrlegher, soo sijn sij in een tabernakel ghegaen, ende hebben ghegheten ende ghedroncken, ende sij hebben van daer ghenomen siluer, ende gout, ende cleederen, ende sij sijn wech ghegaen, ende hebben dat gheborghen, ende sij sijn wederom comen aen een ander tabernakel, ende van daer desghelijcks nemende hebben dat oock gheborghen

9

⁺Ende sij hebben tot malcanderen gheseyt. Wij en doen niet rechtelijck, want dit is eenen dach van goeder tijdinghen, Eest dat wij swijgen ende dat niet en willen bootscappen tot den morghen soo sullen wij van een groot misdaet beticht worden Coemt, laet ons gaen ende in des conincs hof bootscappen,

+ C

10

Ende doen sij tot der stadt poorten comen waren, soo hebben sij hen vertelt seggende. Wij sijn ghegaen tot der Siriers heyrlegher, ende wij en hebben daer gheenen mensch vonden, dan alleen peerden ende esels ghebonden, ende wtghespannen tenten,

11

Hierom sijn die portiers ghegaen ende hebben dat ghebootscapt binnen in des conincks palays,

12

Die welcke is des nachts opghestaen, ende heeft tot sijnen knechten gheseyt. Ick segghe v wat ons die Siriers ghedaen hebben, Sij weten wel dat wij hongher lijden, ende daer om sijn sij wt haren legher ghegaen, ende sij ligghen in die velden gheborghen seggende. Als sij wter stadt sullen comen sijn, soo sullen wijse leuende vanghen, ende dan sullen wij in die stadt moghen comen,

13

Doen antwoorde daer een van sijnen knechten, Laet ons die vijf peerden nemen die in tstadt bleuen (want dese sijn alleen in die gheheel menichte van Israel ouer bleuen want die ander sijn al verteert) ende wtsendende sullen wij dit moghen bespieden,

14

⁺Hierom hebben sij twee paerden ghenomen, ende die coninc heeft die ghesonden totten legher der Siriers seggende. Gaet henen ende siet,

+ D

15

Die welcke sijn hen nae ghegaen tot aen die iordane, ende siet alle den wech was vol cleederen ende vaten welc die Siriers wech gheworpen hadden, doen sij veruaert worden, ende die boden wederom comende hebbent den coninc te kennen ghegheuen,

16

Ende tvolc is wtghetrocken ende heeft der Siriers legher berooft, ende dat mudde bloemen van meel is gheworden gheldende eenen stater, ende twee mudden ghersten eenen stater nae des Heeren woort,

17

Ende die coninc heeft dien prince (op wiens hant hy gheleendt hadde) aen

[p. *294]

die poorte ghestelt, den welcken het volck vertreden heeft inden inganc vander poorten, ende hy is ghestoruen, alsoo die man Gods ghesproken hadde, doen die coninck tot hem nederwaerts comen was,

18

Ende het is ghesciet nae dwoort vanden man Gods dat hy den coninck gheseyt hadde doen hy seyde. Twee mudden ghersten sullen eenen stater ghelden, ende een mudde bloem van meel eenen stater op desen seluen tijt morghen in die poorte van Samarien,

19

Doen die vorst den man Gods gheantwoort hadden ende gheseyt. Al maecte die Heere ooc sluysen inden hemel, soude dit oock moghen gescieden dat ghy segt? Ende hy seyde hem. Ghy zult dat met uwen ooghen sien, maer daer niet af eten,

20

Hierom eest ghesciedt alsoot voorseyt was, Ende het volck heeft hem in die poorte vertreden, ende hy is ghestoruen.