Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vi. Capittel.

1

⁺ENde der propheten kinderen hebben tot Eliseum gheseydt. Siet die plaetse daer wij in woonen voor v, is ons te nauwe,

+ A

2

Laet ons gaen tot aen die iordane, ende laet een yeghelijck besonder wt den bossche nemen besonder materie, dat wij daer voor ons een plaetse timmeren moghen om te woonen,

3

Die welcke heeft gheseyt. Gaet henen, Ende een van dien heeft gheseyt. Coemt ghy daerom oock met uwen dienaers, Hi heeft geantwoort. Ic sal comen.

4

Ende hi is met hen wech ghegaen, Ende als sij aen die iordane comen waren, soo hiewen sij houten af.

5

Maer het is ghesciet, doen daer eene, materie af ghehouwen hadde, dat het yser van tbijl int water viel, Ende hi heeft gheroepen ende gheseyt. Wee wee, wee mijn heere, ende dat selue haddee ick ontleent.

6

⁺Maer die man Godtgs seyde. Waer eest gheuallen? Ende hi heeft hem die plaetse ghetoont, Hierom heeft hi een hout afghehouwen, ende dat derwaerts gheworpen ende het yser swemde,

+ B

7

ende hy seyde. Neemt dat, Die welcke heeft sijn hant wt ghesteken ende dat ghenomen.

8

Maer die coninck van Sirien streedt teghen Israel, Ende hi heeft eenen raet ghehouden met sijnen knechten segghende. Laet ons in die ende die plaetse laghen legghen,

9

Hierom heeft die man Gods ghesonden aenden coninck van Israel seggende. Wacht v dat ghi niet ouer en reyst tot die plaetse, want daer sijn die Siriers in die laghen verborghen

10

Die coninck van Israel heeft daerom ghesonden ter plaetsen welck hem die man Godts gheseyt hadde, ende hi heeft die te voren inghenomen, ende hi heeft hem aldaer bewaert niet eens oft tweemael,

11

⁺Ende des conincks van Sirien herte is om dit dinck ontstelt gheweest, ende hi heeft sijn knechten te gader gheroepen ende gheseyt. Waerom en gheefdi mi niet te kennen wie dat mijn verrader is by den coninck van Israel?

+ C

12

Ende een van sijnen knechten seyde. Ten is gheensins alsoo mijn heere coninc, Maer Eliseus die propheet die in Israel is, gheeft den coninc te kennen alle uwe woorden die ghi ghesproken hebt in uwe slaepcamer

13

Ende hi heeft tot hen gheseyt. Gaet henen ende besiet waer hi is, dat ick mach senden ende hem vanghen, Ende sij hebben hem ghebootscapt segghende. Siet hy is te Dothaim,

14

Hierom heeft hi derwaerts peerden ende waghenen ende een macht des heyrs ghesonden, ende doen sij des nachts comen waren, hebben sij die stadt omleyt,

15

Ende des mans Gods dienaer inden dagheraet opstaende, is wt ghegaen, ende heeft dat heyr ghesien rontsomme die stadt, ende peerden ende waghenen ende hi heeft hem dat ghebootscapt segghende. Wee wee, wee, mijn heere, wat sullen wij doen?

16

⁺Maer hy heeft gheantwoort. En wilt niet vreesen, want meer isser met ons, dan met hen,

+ D

17

Ende doen Eliseus ghebeden hadde soo heeft hi gheseyt. Heere doet die ooghen van desen open dat hi sien mach. Ende die Heere heeft des knechts oogen open ghedaen, ende hy heeft ghesien, ende siet den berch was vol vierigher peerden ende waghenen rontsomme Eliseus,

18

Ende die vianden trocken nederwaerts nae hem, Maer Eliseus heeft tot den Heere ghebeden seggende. Ic bidde v wilt doch dit volck met blentheyt slaen, Ende die Heere heeftse gheslaghen dat sij niet en saghen nae Eliseus woort,

19

Ende Eliseus heeft tot henlieden gheseyt. Dit en is den wech niet, noch dit en is die stadt niet, Volcht mi nae, ende ick sal v den man toonen

[p. *293]

dien ghi soect, Aldus heeft hi die in Samarien gheleyt

20

Ende als sij binnen Samarien comen waren, so seyde Eliseus. O Heere opent die ooghen van desen, dat sij sien moghen, Ende die Heere heeft hen ooghen open ghedaen, ende sij hebben ghesien dat sij waren int midden van Samarien,

21

⁺Ende die coninc van Israel heeft tot Eliseum gheseyt doen hi dese ghesien hadde. Sal icse slaen mijn vader?

+ E

22

Ende hy seyde. Ghi en sultse niet slaen, Want ghi en hebt se niet gheuanghen met uwen swaerde ende boghe dat ghijse slaen soudt, Maer sedt broot ende water voor hen dat sij eten ende drincken, ende laetse tot haren heere gaen,

23

Ende hen wert voor gheleyt een groote ghereetscap van spijsen, ende sij hebben gheten ende ghedroncken, ende hi heeftse laten gaen, ende sij sijn wech ghegaen tot haren heere, Ende nae dien tijt en sijn die roouers van Sirien niet meer ghecomen in dlant van Israel.

24

Ende nae desen eest ghesciet, dat Benadab die coninck van Sirien sijn heel heyr heeft vergadert, ende is opghetrocken ende beleghen Samarien,

25

Ende daer is eenen grooten honger worden in Samarien, ende die stadt is soo langhe omleydt tot datmen een esels hooft vercocht heeft tachtentich silueren penninghen, ende een vierendeel van eenen cabus duyuen mest vijf silueren penninghen,

26

⁺Ende doen die coninc van Israel ouer den muer voorby ghinc, so riep daer een vrouwe tot hem segghende. Behoudt mi, mijn heere die coninc,

+ F

27

Ende hy heeft gheseyt. Neen, die Heere helpe v. Waer mede mach ic v helpen vanden dorschuloer oft van der wijn perssen? Ende die coninc heeft tot haer geseyt. Wat wildi hebben? Sij antwoorde.

28

Dese vrouwe heeft tot my geseyt. Geeft uwen sone dat wi dien heden eten, ende mijnen sone sullen wi morghen eten.

29

Aldus hebben wi mijnen sone ghecoect ende gheten, Ende ic heb des ander daechs tot haer gheseyt. Geeft uwen sone dat wij dien eten, ende sij heeft haren sone gheborghen,

30

Doen die coninc dit ghehoort hadde, soo heeft hi sijn cleederen ghescoort, ende ghinck ouer den muer ende alle tvolck heeft dat hayren cleedt ghesien daer hy onder op sijn lichaem mede ghecleet was,

31

⁺Ende die coninc heeft gheseyt. Godt doe my dit, ende dat daer toe eest dat Eliseus Saphats soons hooft heden op hem staende blijft,

+ G

32

Maer Eliseus sadt in sijn huys ende die ouders saten met hem, Hierom heeft hy eenen man voor ghesonden, ende eer dat die bode quam, soo heeft Eliseus tot die ouders gheseyt. En weet ghi niet hoe dat desen sone des dootslaghers ghesonden heeft, dat men hooft af slaen soude? Hierom siet toe als die bode coemt sluyt die dore, ende en laet hem niet binnen comen, want siet het gheruysch van sijns heeren voeten is achter hem,

33

Doen hi noch met hemlieden sprac soo saghen sij den bode die tot hem quam, Ende hy seyde. Sie soo grooten quaet is vanden heere, wat sal ick meer vanden heere verwachten?