Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .v. Capittel.

1

⁺NAaman des conincks van Sirien velthooftman, was een groot man bi sijnen heere, ende seer ghetert, want door hem heeft die Heere den lande van Sirien salicheyt ghedaen, ende het was een sterck ende rijck man, maer hi was melaetsch,

+ A

2

Ende wt Sirien waren roouerkens ghetrocken, ende die hadden wten lande van Israel een cleyn dochterken gheuanghen wech gheleyt, die welcke was inden dienst van Naamans huysvrouwe,

3

Die welcke heeft gheseyt tot haerder vrouwen. Och oft mijn heere gheweest hadde tot den propheet die in Samarien is, voorwaer hi soude hem van sijn melaetscheyt ghenesen hebben die hy heeft.

4

Hierom is Naaman tot sijnen heere ghegaen, ende heeft hem dit te kennen ghegheuen seggende. Aldus ende aldus heeft dat meysken van dat lant van Israel gheseyt,

5

⁺Ende die coninc van Sirien heeft tot hem gheseyt. Gaet, ende ick sal eenen brief aenden coninc van Israel senden, Ende doen hy ghereyst was ende met hem ghenomen hadde thien talenten siluers, ende ses duysent guldenen, ende thien eerlijcke cleederen,

+ B

6

so droech hi eenen brief aenden coninck van Israhel in dese woorden, Als ghy desen brief sult ontfanghen hebben, soo weet dat ick Naaman mijnen dienaer aen v ghesonden hebbe, dat ghi hem soudt ghenesen van sijn melaetscheyt,

7

Ende doen die coninck van Israel den brief ghelesen hadde, soo heeft hi sijn cleederen ghescoort ende gheseyt. Ben ick een Godt, dat ick mach dooden ende leuende maken, aenghesien dat dese aen my ghesonden heeft dat ick den mensch soude van sijn melaetscheyt ghenesen? Merct ende siet dat hi oorsaken teghen mi soect.

8

Doen Eliseus die man Godts dit ghehoort hadde, te weten dat die coninck van Isreal sijn cleederen gheschoort hadde, soo heeft hi aen hem ghesonden segghende. Waerom hebdi uwe cleederen ghescoort? Laet hem tot mi comen ende weten datter een propheet in Israel is,

9

⁺Hierom is Naaman comen met peerden, ende waghenen, ende heeft ghestaen voor die dore van Eliseus huys,

+ C

10

ende Eliseus heeft eenen bode aen hem ghesonden segghende. Gaet ende laet v seuenmael wasschen in die iordane, ende v vleesch sal weder ghesont worden, ende ghi sult ghesuyuert worden,

11

Naaman vergramt ghinck wech segghende. Ic meynde dat hi tot mi wt comen soude, ende staende aenroepen den naem des Heeren sijns Gods, ende dat hi met sijnder hant gheraect hebben soude die plaetse der melaetscheyt ende mi ghenesen,

12

En sijn die riuieren van Damasco Abana ende Pharphar niet beter dan alle die vloeden van

[p. *292]

Israel dat ick daer in ghewasschen worden soude ende ghesuyuert? Ende doen hi hem ommeghekeert hadde, ende met onweerdicheden wech ghinc,

13

soo quamen sijn knechten by hem ende seyden hem. Vader, al hadde die propheet v een swaer dinck gheseyt, ghy hadt dat voor waer behooren te doen, hoe veel te meer want hy v nv gheseyt heeft, laet v wasschen ende ghi sult suyuer worden,

14

⁺Doen ghinc hi nederwaerts, ende wiesch hem in die iordane seuenwerf, nae des mans Godts woort, ende sijn vleesch is weder gheworden ghelijc het vleesch van eenen cleynen kindeken, ende hi is ghesuyuert,

+ D

15

Ende hi is wedercomen met alle sijnen gheselscap, tot den man Gods, ende heeft ghestaen voor hem ende seyde. Ick bekenne warachtelijc datter gheen ander Godt en is in gheheel aertrijck, dan alleen in Israel, Hierom bidde ick dat ghi een benedictie van uwen dienaer nemen wilt,

16

Ende hi antwoorde. Soo warachtelijck als die Heere leeft voor wien ick staen, ic en sals niet ontfanghen, ⁺Ende doen hi hem dwinghen wilde, soo en heeft hi dat gheensins willen toelaten,

+ E

17

Ende Naaman heeft gheseyt. Alsoo ghi wilt, maer ic bidde verleent my uwen dienaer, dat ic mach van deser aerden met mi nemen soo vele als twee muylen draghen moghen, want v dienaer en sal voortaen gheenen heelen brantoffer oft slachoffer den vreemden goden offeren, dan den Heere,

18

Maer dit isser alleen waer vore dat ghi den Heere bidden sult voor uwen dienaer, Wanneer mijn heere in Remmons tempel gaen sal om te aenbidden, ende als hy op mijn hant rust, eest dat ick aenbidde in Remmons tempel, als hi op die selue plaetse aenbidt, dat die Heere mi uwen dienaer dese sake wil vergheuen,

19

Ende hi seyde hem. Gaet henen in vreden. Aldus is hi van hem gheghaen, op den bequamen tijt des lants,

20

⁺Ende Giezi die dienaer des mans Godts heeft gheseyt. Mijn heere heeft desen Sirier Naaman ghespaert, dat hi niet en heeft genomen dat hi ghebracht heeft, soo warachtelijck als die Heere leeft ick sal hem naer loopen, ende wat van hem nemen,

+ F

21

Ende Giezi is achter Naamans rugghe gheloopen, ende als Naaman dien sach tot hem loopende, soo is hi vanden waghen ghespronghen hem te ghemoete, ende heeft gheseydt. Sijn alle dinghen niet recht?

22

Ende hi seyde. Iae tis al recht, Mijn heere heeft mi aen v ghesonden segghende. Daer sijn nv twee ionghelinghen vander propheten kinderen tot mi comen van den gheberchte Ephraim, gheeft dien een talent siluers ende dobbel cierlijcke cleederen.

23

Ende Naaman heeft gheseyt. Tis beter dat ghi twee talenten neemt, Ende hi heeft hem ghedwonghen, ende twee talenten siluers ghebonden in twee sacken, ende dobbel eerlijcke cleederen, ende hi heeft dit twee van sijnen knechten opgheleyt, diet oock voor hem droeghen,

24

⁺Ende doen hi nv des auonts wedercomen was soo heeft hi dat wt haerlieden hant ghenomen, ende besijden gheleydt in huys, ende die mans laten gaen, ende sij sijn wech ghegaen,

+ G

25

Maer hi binnen comende stont voor sijnen heere, ende Eliseus heeft gheseyt. Van waer coemdi Giezi? Die welcke heeft gheantwoort. V dienaer en is nergers wech gegaen.

26

Maer hi seyde. En was mijn herte daer niet teghenwoordich, doen die man van sijnen waghen v te ghemoete quam? Hierom hebdi nv ontfanghen siluer, ende ghi hebt ontfanghen cleedeeren om te coopen olijfgaerden ende wijngaerden, ende scapen, ende ossen, ende knechten, ende dienstvrouwen,

27

Maer Naamans melaetscheyt sal v ende uwen sade oock aenhanghen tot in der eewicheyt, Ende hi is van hem ghegaen melaetsch gelijck sneeu.