Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺MAer Ioram Achabs sone heeft ouer Israel gheregneert in Samarien, int achthienste iaer van Iosaphat den coninck van Iuda, Ende hi heeft twaelf iaren gheregneert.

+ A

2

Ende hi heeft quaet voor den Heere ghedaen, maer niet ghelijck sijn vader ende moeder, want hy heeft Baals beelden wech ghedaen die sijn vader ghemaect hadde,

3

Maer nochtans aen die sonden van Ieroboam Nabals sone die Israel heeft doen sondighen is hy blijuen hanghende, ende hy en is daer niet af ghegaen,

4

Maer Mesa die coninck van Moab voedde veel veets, ende hi betaelde den coninck van Israel hondert duysent lammeren, ende hondert duysent rammen met haren vliesen,

5

Ende doen Achab doot was, soo ouertrede hy tverbont dat hy hadde met den coninck van Israel,

6

Hierom is die coninck Ioram op dien dach ghegaen wt Samarien ende hy heeft gheheel Israhel ouertelt,

7

Ende hy heeft ghesonden tot Iosaphat den coninck van Iuda segghende. Die coninc van Moab is van my ghesceyden, coemt met my teghen hem te strijde Die welcke heeft gheantwoort. Ick sal optrecken, die mijne is die is uwe, mijn volc is v volck, ende mijn peerden, sijn v peerden,

8

Ende hy heeft gheseyt, door welcken wech sullen wij optrecken? Ende hy heeft gheantwoort. Door die woestijne van Idumeen,

9

⁺Aldus sijn ghetrocken die coninc van Israel ende die coninc van Iuda, ende die coninc van Edom, ende sij hebben omme ghereyst door eenen wech van seuen daghen, ende daer en was gheen water voor dat heyr, ende die beesten die hen volchden,

+ B

10

Ende die coninck van Israel heeft gheseyt. Wee, wee, wee, die Heere heeft ons drij coninghen vergadert, dat hy ons in Moabs hant leueren soude

11

Ende Iosaphat seyde. En is hier gheen propheet des Heeren, dat wij den Heere door hem bade? Ende daer antwoorde een van den knechten des conincs van Israel. Hier is Eliseus Saphats sone, die op Elias handen water ghoot,

12

Ende Iosaphat heeft gheseyt, Des Heeren woort is by hem, Ende die coninck van Isra-

[p. *290]

hel is tot hem afghegaen, ende Iosaphat die coninck van Iuda, ende die coninc van Edom,

13

Ende Eliseus heeft tot den coninck van Israel gheseyt, Wat heb ik met v te doene? Gaet tot ws vaders ende ws moeders propheten, Ende die coninc van Israel heeft tot hem gheseyt. Waerom heeft die Heere dese drij coninghen vergadert, dat hy die leueren soude in Moabs handen?

14

Ende Eliseus heeft tot hem gheseyt. Soo warachtelijck als die Heere der heyrscaren leeft voor wiens aenschijn ick stae, en scaemde ick my niet voor dat aenschijn van Iosaphat den coninc van Iuda, ic en soude voorwaer niet gheacht oft aensien hebben,

15

⁺Maer nv brengt my eenen herpslagher, ende doen die herpslagher speelde, soo is op hem die hant Gods gheworden, ende hy heeft gheseyt.

+ C

16

Dit seyt die Heere. Maect inden gront van deser beken grachten ende grachten,

17

Want dit seyt die Heere. Ghi en sult gheenen wint oft reghen sien, ende desen gront sal vol waters worden, ende ghi ende v huysghesinnen ende v vee sult drincken,

18

Ende dit is luttel voor des Heeren aensicht, maer daer toe sal hy Moab oock in v handen leueren,

19

Ende ghi sult alle die besloten steden slaen, ende alle wtghelesen steden, ende ghi sult alle vruchtbaer boomen afhouwen, ende alle die waterfonteynen verstoppen, ende ghi sult alle die wtnemende ackers met steenen bedecken.

20

Aldus eest morghenstont gheworden alsmen pleech sacrificie te offeren, ende siet die wateren quamen door den wech van Edom, ende dlant is vol waters gheworden,

21

Maer alle die Moabiters hoorende dat die coninghen opcomen waren om teghen hen te strijden, hebben vergadert alle die met eenen ridderlijcken gordel bouen ghegort waren, ende stonden aen die palen,

22

⁺Ende doen sij des morghens vroech opghestaen waren ende die sonne opghegaen was teghen ouer die wateren, soo hebben die Moabiters teghen ouer ghesien dat die wateren al roodt waren ghelijck bloedt,

+ D

23

ende sij hebben gheseyt. Het is bloet vanden swaerde, die coninghen hebben teghen malcanderen ghestreden, ende sij sijn van malcanderen verslaghen, trect nv henen Moab tot den roof,

24

Ende sij sijn ghetrocken tot in dat heyr van Israel, Doen stonden die van Israel op ende hebben Moab gheslaghen, ende sij sijn voor henlieden gheuloden, Hierom sijn sij comen die den strijt ghewonnen hadden, ende hebben dlant van Moab gheslaghen,

25

ende die steden verdorven, ende alle die beste ackers hebben si ouerdect worpende elc steenen daer op, ende alle die water fonteynen hebben sij verstopt, ende alle die vruchtbaer boomen afghehouwen, Alsoo datter alleen die mueren van bacsteenen staende bleuen, ende die stadt is omringt van die slingherworpers, ende een groot deel daer af gheslaghen

26

Doen die coninc van Moab dit ghesien hadde, te weten dat die vianden die ouerhant ghecreghen hadden, soo heeft hy met hem ghenomen seuen hondert mannen die swaerden wt trocken, dat sij souden doorbreken tot by den coninck van Edom, maer sij en vermochtent niet,

27

Ende nemende sijnen iersten gheboren sone die voor hem soude gheregneert hebben, heeft hy dien tot eenen brantoffer opden muer gheoffert, Ende daer is een groote onweerdicheyt onder Israel ghecomen, ende ter stont sijn si van hem ghetrocken ende wederom in haer lant ghekeert.