Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

1

⁺ENde het is ghesciet, doen die Heere Eliam wilde opheffen inden hemel door eenen stormwint, dat Elias ende Eliseus ghinghen van Galgalis,

+ A

2

Ende Elias seyde tot Elizeus. Sidt hier, want die Heere heeft my ghesonden tot Bethel, Ende Elizeus heeft tot hem gheseyt. Soo warachtelijc als die Heere leeft, ende als v ziele leeft, ick en sal v niet verlaten, Ende doen sij af ghegaen waren tot Bethel,

3

soo sijn der propheten kinderen wtcomen, die te Bethel waren tot Eliseum ende hebben hem gheseyt. En weet ghy niet dat die Heere heden uwen heere van v nemen sal? Hy antwoorde. Ic weet ooc wel, swijcht

4

Maer Elias heeft tot Eliseum gheseyt. Sidt hier, want die Heere heeft my ghesonden tot Iericho, Ende hy heeft gheseydt. Soo warachtelijck als die Heere leeft ende als v ziele leeft, ick en sal v niet verlaten, Ende doen sij te Iericho comen waren,

5

soo sijn der propheten kinderen die te Iericho waren, tot Eliseum comen ende hebben hem gheseyt. En weet ghy niet dat die

[p. *289]

[afbeelding] Heere heden uwen heere van v nemen sal? Ende hy heeft gheseyt. Ick weet wel, Swijcht,

6

⁺Doen seyde Elias tot hem. Sidt hier, want die Heere heeft mi ghesonden totter iordanen, Die welcke antwoorde. So warachtelijc als die Heere leeft ende v ziele leeft, ick en sal v niet verlaten. Aldus sijn sij beyde tsamen ghegaen,

+ B

7

ende vijftich mannen van der propheten kinderen sijn hen gheuolcht, Die welcke stonden teghen ouer van verre, maer sij beyde stonden aen die iordane,

8

Ende Elias heeft sijnen mantel ghenomen enede dien tsamen ghewonden, ende heeft die wateren gheslaghen, die welcke sijn ghesceyden aen beyde die sijden, ende sij sijn beyde door dat drooghe ghegaen,

9

Ende doen sij door ghegaen waren soo seyde Elias tot Eliseum Begheert dat ghy wilt, dat ict v doe eer ick van v sal ghehaelt worden, Ende Eliseus seyde. Ic bidde dat uwen gheest in my mach dobbel worden,

10

Die welcke heeft ghantwoort. Ghy hebt een swaer dinck begheert, Maer nochtans eest dat ghy siet, als ick van v sal ghenomen worden, soo salt v ghescieden dat ghy begheert hebt, maer eest dat ghijt niet en siet, soo en salt niet sijn,

11

Ende doen sij voort ghinghen, ende al gaende tsamen spraken. Siet eenen vierighe waghen ende vierighe peerden hebbense beyde ghesceyden, ende Elias is door eenen storm wint inden hemel op gheuaren,

12

Ende Eliseus aensacht ende riep. Mijn vader, mijn vader, Israels waghen, ende sijnen wagheman, ⁺Ende hy en heeft hem niet meer ghesien, ende hi heeft sijn cleederen ghegrepen ende die ghescoort in twee stucken,

+ C

13

Ende hy heeft Elias mantel opghenomen die hem ontuallen was, ende doen hy wedercomen was stont hy opden oeuer vander iordanen,

14

ende hy heeft met Elias mantel die hem ontuallen was die wateren gheslaghen, ende sij en sijn niet ghesceyden, Ende hy seyde. Waer is Elias Godt nv oock? Ende hi heeft die wateren gheslaghen, ende sij sijn ghesceyden herwaerts ende derwaerts, ende Eliseus isser door ghegaen,

15

Ende der propheten kinderen die te Iericho waren siende teghen ouer hebben gheseydt. Elias gheest is gherust op Eliseus, Ende comende hem te ghemoete hebben sij hem aenbeden neder ghebuycht ter aerden,

16

ende tot hem gheseyt. Siet met uwen knechten sijn vijftich stercke mannen die moghen gaen ende soecken uwen heere, oft hem by auontueren den gheest des Heeren heeft ghenomen, ende gheworpen op een vanden hooghen berghen, oft in eenen van die valleyen, Ende hy heeft gheseydt. En wilt niet senden.

17

Ende sij hebben hem ghedwonghen, tot dat hy orlof gaf, ende seyde. Sendtse, Ende sij hebben vijftich mannen ghesonden, Die welcke doen sij drij daghen ghesocht hadden, soo en hebben sij hem niet vonden,

18

⁺Ende sij sijn weder tot hem comen, ende hy woonde te Iericho, ende heeft tot hen gheseyt. En heb ict v niet gheseyt? En wilt niet senden,

+ D

19

Ende die mannen vander stadt hebben tot Eliseum gheseyt. Siet die wooninghe van deser stadt is seer goet, ghelijck ghy heere seluer wel siet, maer het water is seer quaet, ende dlant is onuruchtbaer,

20

Ende hy heeft gheseyt. Brengt my een nieu vat, ende doet daer sout in, Dwelc als sij ghebracht hadden,

21

soo is hy buyten ghegaen aen die fonteyne der wateren, ende heeft daer tsout in gheworpen ende gheseyt. Dit seyt die Heere. Ic heb dese wateren ghenesen, ende daer en sal voortaen gheen doot oft onuruchtbaerheyt in sijn.

22

Hierom sijn die wateren ghenesen tot op desen dach toe, nae Eliseus woort dat hy ghesproken heeft,

23

Ende hy is van daer opghetrocken te Bethel, ende doen hy op quam ouer den wech, so sijn daer cleyn kinderen wt der stadt comen ende bespotten hem segghende. Coem op, kaele cop, Coempt op, kaele cop,

24

Ende doen hy achter omme sach, soo heeft hi die ghesien ende hen vermalendijt in des Heeren naem, ende daer sijn twee beyren wt dat bosch comen, ende hebben tweenveertich van dien kinderen verschoort,

25

Maer hy is van daer ghegaen opden berch Carmelus, ende van daer wederghekeert tot Samarien.