Den gheheelen Bybel, Inhoudende het oude ende nieuwe Testament (Leuvense bijbel 1548)

Dat eerste Capittel.

1

⁺MOAB heeft oock ouerghetreden teghen Israel, nae dat Achab doot was,

+ A

2

Ende Ochozias is gheuallen door die tralien van sijnder eetcameren die hy hadde in Samarien, ende hi is sieck gheworden, ende heeft boden ghesonden, segghende tot hen. Gaet henen ende gaet te rade Beelzebub den godt van Accaron, oft ic van dese mijnder siecten sal moghen leuen,

3

Maer die Enghel des Heeren heeft tot Eliam den Thesbiter ghesproken segghende. Staet op ende gaet te ghemoete des conincs van Samarien boden ende ghy sult hen seggen. En ysser dan gheenen God in Israel, dat ghy gaet om van Beelzebub den godt van Accaron raedt te vraghen?

4

Daerom dit seyt die Heere. Vanden beddeken daer ghy op ghegaen sijt, en suldi niet afgaen, maer ghy sult die doot steruen, Ende Elias is wech ghegaen,

5

Ende die boden sijn wederkeert tot Ochoziam, Die welcke heeft tot hen gheseyt. Waerom sijdi weder comen?

6

⁺Ende sij hebben hem gheantwoort. Ons is een man teghen comen, ende hy seyde tot ons. Gaet henen, ende keert wederom tot den coninck die v ghesonden heeft, ende ghy sult hem segghen. Dit seyt die Heere. Eest daerom, want daer gheen Godt in Israel en is, dat ghy sendet om raet te vraghen van Beelzebub den godt van Accaron? Daerom en sult ghy niet afcomen vanden beddeken daer ghy opghegaen sijt, maer ghy sult die doot steruen,

+ B

7

Ende hy seyde hen. Van wat ghedaente ende cleedinghe is die man die v te ghemoete quam ende dese woorden sprack?

8

Ende sij antwoorden. Het was een harich man, ende met eenen leren riem om sijn lendenen ghegort, Hy seyde. Het is Elias die thesbiter,

9

Ende hy heeft tot hem ghesonden eenen prince ouer vijftich mannen, ende vijftich mannen die onder hem waren, ⁺Die welcke is tot hem opwaerts ghegaen, ende heeft tot hem die daer op den tsop vanden berghe sadt gheseyt. Man Godts, die coninck heeft beuolen dat ghi af comen soudt,

+ C

10

Ende Elias antwoordende heeft gheseyt den capiteyn ouer vijftig mannen. Eest dat ick een man Godts ben, soo dale een vier vanden hemel af ende verslinde v ende v vijftich mannen, Hierom is daer een vier wten hemel ghedaelt, ende heeft hem verslonden ende die vijftich mannen die met hem waren,

11

Ende hy heeft wederom ghesonden eenen anderen capiteyn ouer vijftich mannen ende vijftich met hem Die welcke heeft tot hem gheseyt. Man Godts, dit seyt die coninck. Haest v coemt af,

12

Elias antwoordende heeft gheseyt. Eest dat ick een man Gods ben, so dale een vier wten hemel ende verslinde v ende v vijftighe. Hierom is daer een vier wten hemel ghedaelt, ende heeft hem verslonden ende sijn vijftighe.

13

Hy heeft wederom ghesonden den derden prince ouer vijftich ende die vijftich die met hem waren, Die welcke doen hy comen was heeft sijn knien gheboocht teghen Eliam, ende hem ghebeden, ende gheseyt. Man Gods en wilt mijn ziele niet versmaden, ende uwer knechten zielen die met my sijn,

14

Siet het vier is vanden hemel neder ghedaelt ende heeft verslonden die twee ierste capiteynen ouer vijftich mannen, met den vijftighen die met hen waren, ⁺Maer nv bidde ick dat ghy mijnder zielen wilt ontfermen,

+ D

15

Ende die Enghel des Heeren heeft ghesproken tot Eliam seggende. Gaet met hen nederwaerts, en vreest niet. Hierom is hy opghestaen ende met hem afghegaen tot den coninc, ende heeft hem gheseyt.

16

Dit seyt die Heere. Aenghesien dat ghy boden ghesonden hebt om raet te vraghen van Beelzebub den godt van Accaron, recht ofter gheen Godt in Israel en ware vanden welcken ghy moch raet vraghen, daerom en sult ghi niet afcomen van den beddeken daer ghy opgegaen sijt, maer ghi sult die doot steruen,

17

Ende hy is ghestoruen nae des Heeren woort dat Elias ghesproken heeft, ende Ioram sijn broeder heeft voor hem gheregneert, int tweede iaer van Ioram Iosaphats sone des conincs van Iuda, want hi en hadde gheenen sone,

18

Maer datter meer is van die woorden van Ochozia die hy ghedaen heeft, en sijn dese niet ghescreuen int boeck der woorden van die daghen der Coninghen van Israel?