Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxi. Capittel.

1

⁺ENde nae dese woorden op dien tijt hadde Naboth die Iezraheliter eenen wijngaert die te Iezrael was by Achab des conincs van Samarien palays. Hierom heeft Achab tot Naboth ghesproken segghende,

+ A

2

Gheeft my uwen wijngaert dat ick daer af eenen warmoeshof maken mach, want hi is my nae gheleghen ende by mijn huys, ende ic sal v daer eenen beteren wijngaert voor gheven, oft (dunct v dat profijtelijcker) eenen prijs van siluer soo groot als hi weert is.

3

Den welcken heeft Naboth gheantwoort, De Heere sij mij ghenadich dat ic mijnder vaderen erfdom v niet en gheue.

4

Hierom is Achab in sijn huys

[p. *286]

comen veronweerdicht ende op sijn tanden bijtende, om dit woort dat hem Naboth die Iezraheliter ghesproken hadde, segghende, Ic sal v mijnder vaderen erfdom niet gheuen. ⁺Ende hy heeft hem seluen op sijn beddeken gheworpen ende sijn aensicht ommeghekeert teghen den want, ende hy en heeft gheen broot gheten.

+ B

5

Maer Iezabel sijn huysvrouwe is by hem comen, ende heeft hem gheseyt, Wat is dit daer om dat v ziele bedroeft is? ende waer om en eedt ghy gheen broot?

6

Hy antwoorde haer, Ic heb Naboth den Iezraheliter ghesproken ende hem gheseyt, Gheeft my uwen wijngaert nemende ghelt, oft belieuet v, ic sal v eenen beteren wijngaert daer voor gheuen.

7

Ende hy heeft gheseyt, ic en sal mijnen wijngaert niet gheven. Hierom heeft Iezabel sijn huysvrouwe tot hem gheseyt, Ghy sijt van grooter heerlijcheyt ende macht ende ghi regeert dat rijck van Israel wel, staet op ende eedt broot, ⁺ende weest goets moets, ick sal v Naboths des Iezraheliters wijngaert gheuen.

+ C

8

Aldus heeft sij brieuen ghescreuen wt Achabs naem, ende die gheteekent met sijnen rinck, ende ghesonden aen die ouders ende beste die in sijn stadt waren, ende met Naboth woonden.

9

Ende dit was den sin vanden brief, Doet een vasten vercondighen, ende doet Naboth sitten tusschen die ierste des volcs,

10

ende maect toe al heymelijck twee mannen belials kinderen teghen hem, ende laet die valsch ghetuyghenis segghen, Hy heeft Godt ende den coninck ghebenedijt, ende leyt hem buyten, ende steent hem, ende laet hem also steruen.

11

Hierom hebben sijn borghers die outste van gheboorten, ende die treffelijcste die met hem in die stadt woonden ghedaen alsoo Iezabel hen beuolen hadde, ende ghelijck in den brief ghescreuen was die sij tot henlieden ghesonden hadde,

12

⁺Sij hebben een vasten doen wtroepen, ende sij hebben Naboth doen sitten tusschen die eerlijcste des volcs.

+ D

13

Ende sij hebben twee mannen des duyuels kinderen voorts ghebracht, ende die doen sitten teghen hem, ende sij (te weten als duyuelsche mannen) hebben teghen hem ghetuycht voor die menichte, Naboth heeft Godt ende den coninck ghebenedijt, Om welcke sake hebben si hem wt die stadt gheleyt, ende met steenen ghedoodt.

14

Ende sij hebben aen Iezabel ghesonden segghende, Naboth is ghesteent, ende ghestoruen.

15

Ende het is ghebuert doen Iezabel ghehoort hadde dat Naboth ghesteent was, en doot, dat si seyde tot Achab, Staet op ende besidt Naboth des Iezraheliters wijngaert, die nae v niet hooren en wilde, noch v dien gheuen om ghelt, want Naboth en leeft niet maer hy is doot.

16

Doen Achab dit hoorde, te weten dat Naboth doot was, soo is hy opghestaen ende ghinck nederwaert tot inden wijngaert van Naboth den Iezraheliter om dien te besitten.

17

⁺Hierom is des Heeren woordt ghesciet aen Eliam den Thesbiter segghende, Staet op ende gaet nederwaerts Achab den coninck van Israel te ghemoete, die in Samarien is,

+ E

18

siet hy is nederwaerts ghegaen in Naboths des Iezraheliters wijngaert om dien te besitten,

19

ende ghy sult tot hem spreken segghende, Dit seyt die Heere, Ghy hebt ghedoodt ende daer bouen hebdi oock beseten, Ende hier nae suldi noch segghen, Dese woorden seyt die Heere, Op dese plaetse daer die honden Naboths bloet ghelect hebben, sullen sij v bloet ooc lecken.

20

Ende Achab heeft tot Eliam gheseyt, Hebdi my v viant beuonden? Die welcke heeft gheseyt, Ic hebt beuonden, want ghy vercocht sijt om quaet te doen voor dat aensicht des Heeren,

21

Siet ick sal quaet op v brenghen, ende ick sal v achterste af mayen, ende ic sal van Achab doot slaen wat dat aenden want pisset, ⁺ende die besloten is, ende den laetsten in Israhel.

+ F

22

Ende ick sal v huys gheuen ghelijck het huys van Ieroboam Nabats sone, ende ghelijck thuys van Baasa den soon van Ahia, want ghy hebt ghedaen om my tot gramscap te verwecken, ende ghy hebt Israel doen sondighen.

23

Maer die Heere heeft van Iezabel oock ghesproken segghende, Die honden sullen Iezabel eten in den acker van Iezrahel.

24

Eest dat Achab in die stadt sterft soo sullen hem die honden eten, maer eest dat hi opt velt sterft soo sullen hem die voghelen des hemels eten.

25

Aldus en was gheen ander man sulc als Achab die vercocht is gheweest om quaet te doen in des Heeren aenschijn want Iezabel sijn huysvrouwe roeyde hem op,

26

ende hy is afgrijselijck gheworden, so seere dat hy die afgoden volchde welc die Amorrhiters ghemaect hadden, ⁺die welcke die Heere vernielt heeft voor daenschijn der kinderen van Israel.

+ G

27

Hierom doen Achab dese woorden ghehoort hadde, soo heeft hy sijn cleederen ghescoert, ende sijn vleesch met een haren cleedt bedect, ende hy heeft gheuast, ende gheslapen in eenen sack, ende ghewandelt metten gheneychden hoofde.

28

Ende het woort des Heeren is ghesciet aen Eliam den Thesbiter segghende,

29

En hebdi Achab niet ghesien voor my verootmoedicht, Hierom want hy verootmoedicht is om mijnen wille, soo en sal ick dat quaet binnen sijn daghen niet brengen, maer in sijns soons daghen sal ick dit quaet op sijn huys brenghen.