Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxij. Capittel.

1

⁺ALdus sijnder drij iaren ouerleden sonder orloghe tusschen Syrien ende Israel.

+ A

2

Maer int derde iaer is Iosaphat die coninck van Iuda nederwaerts comen tot den coninck van Israel

3

(Ende die coninck van Israel heeft tot sijnen knechten gheseyt, En weet ghy niet dat Ramoth-galaad onse is, ende wij en achten niet die wederom te nemen wt des conincs van Syrien hant?)

4

Ende hy heeft tot Iosaphat gheseyt, En sult ghy niet met my comen om te strijden te Ramoth-galaad? Ende Iosaphat heeft tot den coninck van Israel gheseyt, Ghelijck ic ben, also sijdi ooc, mijn volck ende v volck dats een ende mijn rosvolck is v rosvolck.

5

Ende Iosaphat heeft tot den coninck van Israel gheseyt, Ick bidde v, vraecht heden des Heeren woort.

6

Hierom heeft die coninc van Israel die propheten vergadert omtrent vier hondert mannen, ende heeft tot hen gheseyt, Behoore ick in Ramoth-galaad te gaen om te strijden, oft te rusten? Die welcke hebben gheantwoort, Trect opwaerts, ende die Heere sal die stadt in des conincs hant leueren.

7

Maer Iosaphat heeft gheseyt, En is hier gheen propheet des Heeren dat wij dit mochten door hem vraghen?

8

⁺Ende die coninck van Israel seyde tot Iosaphat, Daer is een man achterbleuen door den welcken wij den Heere vraghen moghen, maer ic haet hem, want hy en propheteert my gheen goet maer quaet, Micheas den sone van Iemla. Tot den welcken Iosaphat seyde, En spreect alsoo doch niet o coninck.

+ B

9

Hierom heeft die coninck eenen van sijnen ghesnedenen mannen gheroepen, ende tot hem gheseyt, Haest v ende brengt herwaerts Micheam den sone van Iemla.

10

Ende die coninck van Israel ende Iosaphat die coninck van Iuda saten een ieghelijck in haren coninclijcken stoel ghecleedt met coninclijcke cleederen, op die plaetse by die doore der poorten van Samarien, ende alle die propheten propheteer-

[p. *287]

den voor hen aensicht.

11

Oock soo heeft Sedechias die sone van Chanaana sij seluen ghemaect yseren hoornen, ende seyde, Dese woorden seyt die Heere, Hier mede sult ghy Syrien in die locht werpen tot dat ghy die vernielt sult hebben.

12

⁺Ende alle die propheten propheteerden ghelijckelijck segghende, Trect opwaerts nae Ramoth-galaad, ende gaet voorspoedelijck, ende die Heere salt in des conincs handen leueren.

+ C

13

Maer die bode die gheghaen was om Micheam te roepen, heeft tot hem ghesproken segghende, Siet der propheten woorden vercondighen den coninck met eenen monde goede dinghen. Hierom laet v woort haerlieden woorden ghelijck sijn, ende spreect goede dinghen.

14

Tot wien Micheas gheseyt heeft, Soo warachtelijck als die Heere leeft, wat my die Heere segghen sal dat sal ick spreken.

15

Aldus is hi tot den coninck comen, ende die coninck heeft tot hem gheseyt, Michea moeten wij te Ramoth-galaad trecken om te strijden, oft dat laten? Ende hy heeft hem gheantwoordt, Trect opwaerts ende gaet gheluckelijck, ende die Heere salt in des conincs handen leueren.

16

Maer die coninck heeft tot hem gheseyt, Ick besweere v eens ende noch eens dat ghy my anders niet en segt dan dat warachtich is inden naem des Heeren.

17

Ende hy heeft gheseyt, Ick heb gheheel Israel ghesien verstroyt op dat gheberchte ghelijck scapen die gheenen herder en hebben. Ende die Heere seyde, Dese en hebben gheenen heere, Laet een ieghelijck in sijn huys wederkeeren met vreden.

18

Doen seyde die coninck van Israel tot Iosaphat, En hebbe ict v niet gheseyt, dat hy my gheen goet en propheteert maer altijt quaet?

19

Maer hy heeft daar toe noch gheseyt, Daerom hoort dat woordt des Heeren, Ic heb ghesien den Heere sittende op sijnen heerlijcken stoel, ende alle dat heyr des hemels by hem staende ter rechter ende ter slincker sijden,

20

ende die Heere heeft gheseyt, Wie sal Achab den coninck van Israel bedrieghen dat hy optrecke, ende valle te Ramoth gaalad? Ende die een seyde alsulcken woorden, ende die ander anders,

21

Maer daer is eenen gheest wtcomen ende heeft ghestaen voor den Heere, ende gheseyt, Ic sal hem bedrieghen. Totten welcken heeft die Heere gheseyt,

22

⁺Waer mede? Ende hi seyde, Ic sal wtgaen ende eenen loghenachtighen gheest sijn inden mont van alle sijnen propheten. Ende die Heere heeft gheseyt, Ghy sult bedrieghen ende verwinnen, gaet wt ende doet alsoo.

+ D

23

Siet hierom heeft die Heere nv eenen loghenachtighen gheest ghegeuen inden mont van allen uwen propheten die hier sijn. Ende die Heere heeft teghen v quaet ghesproken.

24

Doen quam Sedechias die sone van Chanaana daer by, ende sloech Micheam aen sijn wanghe, ende seyde, Heeft my dan des Heeren gheest verlaten ende v aenghesproken?

25

Ende Micheas heeft gheseyt, Ghy sult dat sien op dien dach als ghy gaen sult int camerken binnen dat camerken, om verborghen te sijn.

26

Ende die coninck van Israel heeft gheseyt, Neemt Micheam ende laet hem blijuen by Amon den prince der stadt, ende by Ioas Amalechs sone, ende segghet hen,

27

Dit seyt die coninck, Settet desen man inden kercker, ende onderhoudt hem met dat broot des lijdens, ende water der benautheyt, tot dat ick weder om sal ghecomen sijn in vreden.

28

Ende Micheas heeft gheseyt, Eest dat ghy met vreden weder coemt, soo en heeft die Heere door my niet ghesproken. Ende hy seyde, Hoort alle ghy luyden.

29

Aldus is die coninck van Israel opghetrocken, ende Iosaphat die coninck van Iuda nae Ramoth galaad.

30

Doen seyde die coninck van Israel tot Iosaphat, Neemt v wapenen ende ghaet inden strijdt, ende doet v cleederen aen. Maer die coninck van Israel heeft sijn habijt verandert, ende is in den strijdt gheghaen.

31

Ende die coninc van Syrien hadde beuolen den tweendertich princen der waghenen segghende, ⁺Ghy en sult niet vechten tseghen iemant vanden minsten ende vanden meesten, dan teghen den coninck van Israel alleen.

+ E

32

Hier om doen die princen der waghenen Iosaphat ghesien hadden, so vermoedden si dat hy die coninck van Israel was, ende makende een oploop, hebben sij teghen hem ghestreden. Ende Iosaphat heeft luyde gheroepen.

33

Ende die princen der waghenen hebben verstaen dat hy die coninck van Israel niet en was, ende sij hebben opghehouden van hem.

34

Maer een man heeft sijnen boghe ghespannen schietende eenen pijl int onsekere, ende by gheualle raecte hy den coninck van Israel tusschen die longer ende maghe. Ende hy seyde tot sijnen wagheman, Keert v hant ende voert my wt den heyre, want ick ben swaerlijck ghewont.

35

Aldus is den strijt ghedaen op dien dach, ende die coninck van Israel stont in sijnen waghen teghen ouer die Syriers, ende hy is des auonds ghestoruen, maer het bloet van sijnder wonden vloeydde int midden vanden waghen,

36

ende die wtroeper maecte gheluyt ouer alle theyr eer die sonne onderghinck, segghende, Een ieghelijck keer wederom in sijn stadt, ende in sijn lant.

37

Ende die coninck is ghestoruen, ende gheuoert in Samarien.

38

Ende sij hebben den coninck begrauen in Samarien, ende si hebben sijnen waghen ghewasschen in die piscine van Samarien, ⁺ende die honden hebben sijn bloet ghelect, ende sij hebben sijn waghenghetuyghe ghewasschen, nae dat woordt des Heeren dat hy ghesproken hadde.

+ F

39

Datter meer is van Achabs woorden ende al dat hy ghedaen heeft, ende dat yuooren huys dwelc hy ghetimmert hadde, ende van allen den steden die hy ghesticht hadde, en sijn dese niet ghescreuen int boeck der woorden van die daghen der coninghen van Israel?

40

Aldus is Achab ontslapen met sijnen vaderen, ende Ochozias sijn sone heeft voor hem gheregneert.

41

Maer Iosaphat die sone van Aza hadde begonst te regneren ouer Iudam int vierde iaer van Achab den coninck van Israel.

42

Vijfendertich iaren was hy out doen hy begonst te regneren, ende vijuentwintich iaren heeft hi in Ierusalem gheregneert, sijns moeders naem was Azuba Salai dochter.

43

Ende hy heeft ghewandelt in alle die weghen van Asa sijnen vader, ende hy en is daer niet af gheghaen, ende hy heeft ghedaen dat recht was voor des Heeren aensicht.

44

Maer nochtans en heeft hy die hoochden niet wech ghedaen, want tvolck dede noch sacrificie ende brande noch welriekenden offer op die hoochden,

45

ende Iosaphat hadde vrede metten coninck van Israel.

46

Datter meer is van Iosaphats woorden ende sijn wercken die hi ghedaen heeft, ende sijn strijden, en sijn dese niet ghescreuen int boeck der woorden van die daghen der coninghen van Iuda?

47

⁺Ende hy heeft oock alle die ouerghebleuen der verwijfder mannen (die ouerbleuen waren in Asa sijns vaders daghen) vanden lande wech ghedaen.

+ G

48

Ende daer en was doen gheen coninck ghemaect int lant van Edom.

49

Ende die coninck Iosaphat hadde vloten van scepen ghemaeckt in die see, die

[p. *288]

nae Ophir varen souden om gout, maer sij en consten daer niet varen, want sij worden ghebroken te Asion Gaber,

50

Doen seyde Ochozias Achabs sone tot Iosaphat. Laet mijn knechten met uwen knechten in die scepen gaen, En Iosaphat en wilde dat niet doen,

51

Ende Iosaphat is met sijnen vaderen ontslapen ende begrauen met henlieden in Dauids sijns vaders stadt ende Ioram sijn sone heeft voor hem gheregneert,

52

Maer Ochozias Achabs sone hadde begonst te regneren ouer Israel in Samarien int seuenthienste iaer van Iosaphat den coninck van Iuda, ende hy heeft ouer Israel gheregneert twee iaren,

53

Ende hy heeft quaet ghedaen voor des Heeren aenschijn, ende ghewandelt in sijns vaders ende sijns moeders wech, ende inden wech van Ieroboam Nabaths sone, die Israel heeft doen sondighen,

54

Ende hy heeft oock Baal ghedient ende hem aenbeden, ende den Heere den God van Israel ghecreyt nae alle dat sijn vader ghedaen hadde.

Hier voleyndt den derden boeck der Coninghen.