Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xx. Capittel.

1

⁺ENde Benadad die coninc van Syrien heeft alle sijn heyr vergadert, ende tweendertich coninghen met hem, ende peerden ende waghenen, ende optreckende heeft hy ghestreden teghen Samariam ende beleyde die.

+ A

2

Ende boden wtsende tot Achab den coninck van Israel in die stadt heeft hy gheseyt,

3

Dit seyt Benadad, V siluer ende v gout is mijne, ende v huysvrouwen ende v beste sonen sijn mijne.

4

Ende die coninck van Israel heeft gheantwoordt, Nae v woort (mijn Heere die coninc) so ben ic uwe ende alle dat my toebehoort.

5

Ende die boden wederom comende hebben gheseyt, Dit seyt Benadad die ons aen v ghesonden heeft, V siluer ende v gout, ende v huysvrouwen, ende v kinderen sult ghy my gheuen.

6

Hierom sal ic morghen te deser seluer vren mijn knechten aen v senden, ende sij sullen v huys doorsoecken ende uwer knechten huys, ende alle dat hen belieuen sal, sullen sij in haer handen nemen ende wech draghen.

7

Maer die coninck van Israel heeft gheroepen alle die ouders des lants, ende gheseyt, Aenmerct ende siet hoe dat ⁺hy ons laghen leyt, want hy heeft aen my ghesonden om mijn huysvrouwen, ende sonen, ende om siluer ende gout ende ic en hebs niet gheweyghert.

+ B

8

Maer alle die ouders ende alle het volc hebben tot hem gheseyt, En hoort niet, noch en gheeft hem gheen consent.

9

Hier om heeft die coninck Benadads knechten gheantwoort, Segt mijnen heere den coninc, Alle die dinghen (waerom dat ghy aen my ghesonden hebt int beghinsel) sal ick doen, maer dit dinck en mach ick niet doen. Ende die boden wederom gaende hebben hem dit ouerghedraghen, Die welcke heeft wederom ghesonden ende gheseyt,

10

Dit moeten my die goden doen, ende dese dinghen noch daer toe, eest sake dat het gestubbe van Samarien ghenoech sal sijn om die handen te vullen des volcs dat my navolcht.

11

Ende die coninck van Israel antwoordende heeft gheseyt, Segghet hem, Die ten strijde omgort is, en gloriere niet also zeere als die ontgort is.

12

Maer het is ghesciet doen Benadad dit woort ghehoort hadde, dat hy dranc met die coninghen in die tenten, ende hy heeft sijnen knechten gheseyt, belegghet die stadt rontsomme. Ende sij hebben die rontsomme beleydt.

13

Ende siet een propheet comende by Achab den coninc van Israel heeft tot hem gheseyt, Dit seyt die Heere, Ghy hebt emmer dese ouergroote menichte ghesien? siet ick sal die heden in v hant leueren, dat ghy weten moecht dat ic die Heere ben.

14

Ende Achab heeft gheseyt, Door wien. Ende hy heeft tot hem gheseyt, ⁺Dit seyt die Heere, Door die knapen vanden vorsten der lantscappen. Ende hy seyde, Wie sal beghinnen te strijden? Ende hy heeft gheseyt, Ghy.

+ C

15

Hierom heeft hy ouertelt die knechten van die princen der lantscappen, ende heeft gheuonden het ghetal van tweehondert ende tweendertich, ende daer nae heeft hy het volck ghetelt, alle die kinderen van

[p. *285]

Israel seuen duysent, ende sij sijn te middaghe wtghetrocken.

16

Maer Benadad al droncken dranc in sijn tente, ende die tweendertich coninghen met hem, die hem te helpe ghecomen waren.

17

Ende die knechten van die princen der lantscappen sijn wtghetrocken int tvorste vanden heyr. Aldus heeft Benadad boden wtghesonden, die welcke hem hebben ghebootscapt segghende, Daer sijn mannen wt Samarien comen.

18

Ende hy heeft gheseyt, tsij oft sij comen om pays, so vangtse leuende, tsij oft sij comen om te strijden, neemtse leuende gheuanghen.

19

Aldus sijn die knechten van die princen der lantscappen wtghetrocken, ⁺ende het ander heyr volchde daer naer,

+ D

20

ende een ieghelijck sloeg den man die hem teghen quam, ende die Syriers sijn gheulucht endeIsrael heeftse veruolcht. Oock so is Benadad die coninck van Syrien gheulucht te peerde met sijnen rosvolck.

21

Ende die coninck van Israel is ook wtghetrocken ende heeft verslaghen die peerden ende waghenen, ende hy heeft Syrien gheslaghen met eenen grooten slach.

22

(Ende die propheet by den coninck van Israel comende heeft hem gheseyt, Gaet henen ende weest vroom, ende weet ende besiet wat ghy doet, want ten naesten iare sal die coninck van Syrien teghen v optrecken.)

23

Maer des conincs van Syrien knechten hebben tot hem gheseyt, Die berchgoden sijn hen goden, ende daer om hebben sij ons verwonnen, maer tis beter dat wij teghen hen strijden in die platte neder landen, ende dan sullen wij hen verwinnen.

24

Hier om doet dit woordt, Doet alle die coninghen wech een ieghelijc van uwen heyre, ende stelt princen in hen steden,

25

ende veruult het ghetal der strijtbaer mannen, die van uwen volck verslaghen sijn, ende peerden, nae dat die peerden te voren waren, ende waghenen ghelijc die wagenen die ghy te voren hebt ghehadt, ende wij sullen teghen hen strijden in die platte nederlanden, ende ghi sult sien dat wij hen verwinnen sullen. ⁺Hy heeft haerlieder raet ghelooft ende alsoo ghedaen.

+ E

26

Aldus doen het iaer ouerleden was, heeft Benadad die mannen van Syrien ghetelt, ende hy is opghetrocken in Apher om teghen Israel te strijden.

27

Maer die kinderen van Israel sijn ghetelt gheweest, ende nemende victalie sijn sij ghereyst daer teghen, ende sij hebben haren heyrlegher teghen hen ouer ghemaect, ghelijck twee cleyn cudden van gheyten. Maer die Syriers ouerdecten dat lant.

28

(Ende een man Gods daer comende heeft gheseyt den coninck van Israel, Dese woorden seyt die Heere, Om des wille dat die Syriers geseyt hebben, Die Heere is der berghen Godt, ende hy en is gheen Godt der valleyen, daerom sal ic alle dese groote menichte in v handen leueren, ende ghy sult weten dat ic die Heere ben.)

29

Ende sij scicten seuen daghen lanck haer slachordenen teghen malcanderen, so wel dese als die, ende opden seuensten dach is den strijt ghesciet, ende die kinderen van Israel hebben vanden Syriers hondert duysent voetknechten verslaghen op eenen dach,

30

maer die te Aphec bleuen waren sijn gheulucht in die stadt, ende daer is eenen gheuallen op seuen ende twintich duysent menschen die daer ouerbleuen waren. Ende Benadad vluchtende is in die stadt ghecomen, in een camerken welck binnen die camer was,

31

ende sijn knechten hebben tot hem gheseyt, Siet wij hebben ghehoort dat die coninghen van thuys van Israel goedertieren sijn, ⁺Hierom laet ons sacken aen ons lendenen doen, ende cordekens op onse hoofden, ende laet ons wtgaen tot den coninck van Israel, by auontueren sal hy onse zielen behouden.

+ F

32

Sij hebben hen lendenen met sacken omghegort, ende corbekens op haerlieden hoofden ghedaen, ende sij sijn ghecomen tot den coninck van Israel ende hebben hem gheseyt, V dienaer Benadad seyt, Ick bidde v laet mijn ziele leuen. Ende hy seyde, Eest dat hi noch leeft soo eest mijn broeder,

33

Het welck die mannen ghenomen hebben voor een goet teeken van gheluck, ende sij hebben met haesten dat woordt wt sijnen monde genomen ende gheseyt, V broeder Benadad. Ende hy seyde tot hen, Gaet henen ende brengt hem by my. Hier om is Benadad tot hem wtcomen, ende hy heeft hem opghehauen in sijnen waghen.

34

Ende Benadad seyde tot hem, Die steden welc mijn vader, uwen vader afghenomen heeft, sal ick v weder gheuen, ende maect voor v straten in Damasco, ghelijc mijn vader in Samarien ghedaen heeft, ende als ic een verbont met v ghemaect hebbe, so sal ic van v sceyden. Aldus heeft hy een verbont met hem ghemaect ende heeft hem laten gaen.

35

Doen heeft een man van der propheten kinderen gheseyt tot sijnen gheselle door des Heeren woort, Slaet my. Maar hy en wilde hem niet slaen.

36

Den welcken hy gheseyt heeft, Om dat ghy des Heeren stemme niet en hebt willen hooren, siet ghy sult van mi wech gaen, ende eenen leuw sal v slaen. Ende doen hi een luttelken van hem ghegaen was, soo heeft hem eenen leuw vonden ende gheslaghen.

37

Ende hy hebbende noch eenen anderen man gheuonden, ⁺heeft tot hem gheseyt, Slaet mi, Die welcke heeft hem gheslaghen ende ghewont.

+ G

38

Aldus is die propheet wech ghegaen, ende den coninck van Israel te ghemoete comen op den wech, ende hy heeft sijnen mont ende sijn ooghen verandert met bespraytsel van ghestubbe.

39

Ende doen die coninck voorby ghegaen was soo heeft hy totten coninck gheroepen ende gheseyt, V dienaer is wt ghetrocken om te strijden van by, ende doen daer een man gheuloden was, so heeft een ander dien tot my ghebracht ende gheseyt, Bewaert desen man, eest dat hy v ontloopt, soo sal v ziele voor sijn ziele sijn, oft ghy sult daer voor een talent siluers gheuen.

40

Ende doen ick verbaest sijnde my herwaerts ende derwaerts keerde, soo was die man haestelijck wech wten ooghen. Ende die coninck van Israel heeft tot hem gheseyt, Dit is v vonnisse dat ghy selue ghegheuen hebt.

41

Ende hy heeft terstont dat stubbe van sijn aensicht gheuaecht, ende die coninck van Israel heeft hem ghekent dat hy een vanden propheten was,

42

Die welcke seyde tot hem, Dese woorden seyt die Heere, Om dat ghi den man die den doot verdient hadde wt uwer hant hebt laten gaen, so sal v ziele voor sijn ziele sijn, ende v volck voor sijn volck.

43

Hier om is die coninck van Israel wederom ghekeert in sijn huys, versmadende te hooren, ende hi is al rasende van gramscap comen in Samarien.