Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xix. Capittel.

1

⁺ENde Achab heeft Iezabel ghebootscapt alle tghene dat Elias ghedaen hadde, ende hoe dat hy alle die propheten metten swaerde verslaghen hadde.

+ A

2

Ende Iezabel heeft eenen bode aen Eliam ghesonden segghende, Dit moeten my die goden doen, ende dat noch daer toe doen, eest dat ick v ziele morghen te deser vren niet en stelle ghelijck een van dien.

3

Hier om heeft Elias gheureest, ende opstaende is hy wech gheghaen werwaerts dat hem sijnen wille droech. Ende hy is ghecomen in Bersabee Iuda, ende heeft daer sijnen knecht ghelaten,

4

ende hi is in die woestijne ghegaen een dach reyse. Ende als hy comen was, ende sadt onder eenen geneuerboom, soo heeft hy sijnder zielen begheert dat sij steruen soude, ende seyde, O Hee-

[p. *284]

re het is my ghenoech, haelt mijn ziele, want ick en ben niet beter dan mijn vaderen.

5

Ende hy heeft hem nedergheworpen, ende is ontslapen in die scaduwe vanden geneuer boom.

6

⁺Ende siet die Enghel des Heeren heeft hem gheraect ende tot hem gheseyt, Staet op, ende etet, Hy heeft ommeghesien, ende siet aen sijn hooft was een broot onder die asschen ghebacken, ende een vaetken waters. Aldus heeft hy ghegheten ende ghedroncken, ende is wederom ontslapen.

+ B

7

Ende die Enghel des Heeren is weder comen ten tweedenmael ende heeft hem gheraect ende tot hem gheseyt, Staet op ende etet, want v staet noch eenen grooten wech te gaen.

8

Ende als hy opghestaen was, soo heeft hy ghegheten ende ghedroncken, ende hy heeft ghewandelt door die cracht van dier spijsen veertich daghen ende veertich nachten, totten berch Gods Horeb.

9

Ende doen hy daer comen was, soo is hy bleuen in een speluncke. Ende siet des Heeren woordt is tot hem ghedaen, ende heeft hem gheseyt, Wat maect ghy hier Elia?

10

Ende hy heeft gheantwoort, Met ialoursche liefde heb ick ialours gheweest voor den Heere den Godt der heyrscaren, om dat die kinderen van Israel het verbont des Heeren verlaten hebben. V outaeren hebben sij ghebroken, ende v propheten doot gheslaghen metten swaerde, ende ick ben alleen ouerbleuen, ende sij suecken mijn ziele om die af te nemen.

11

Ende hy seyde hem, Gaet wt, ende staet opden berch voor den Heere, ende siet die Heere gaet voorby, ende eenen grooten ende stercken wint die berghen omkeerende, ⁺ende die steenroetsen in stucken brekende is voor den Heere, die Heere en was in den wint niet, ende nae dien wint quam een beruerte, die Heere en was in die beruerte niet,

+ C

12

Ende nae die beruerte quam een vier, die Heere en was int vier niet, ende nae dat vier quam een blasinghe van een dunne locht.

13

Doen Elias dat hoorde heeft hy sijn aensicht met sijnen mantel bedect, ende wtgheghaen sijnde heeft hy ghestaen in die doore der speluncken, Ende siet een stemme quam tot hem segghende, Wat maect ghy hier Elia?

14

Ende hy heeft gheantwoort, Ick heb met ialoursche liefde ialours gheweest voor den Heere den Godt der heyrscaren, om dat die kinderen van Israel v verbont verlaten hebben, v outaeren hebben sij ghebroken, ende v propheten hebben sij metten swaerde doot gheslaghen, ende ick ben alleen ouerbleuen, ende sij soecken mijn ziele, om die af te nemen.

15

Ende die Heere heeft tot hem gheseyt, Gaet henen ende keert wederom uwen wech in door die woestijne tot in Damasco, Ende als ghy tot daer sult comen sijn, dan suldi Hazael saluen tot eenen coninc ouer Syrien,

16

ende Iehu den den sone van Ramsi suldi tot eenen coninc saluen ouer Israel, maer Eliseum Saphats sone die van Abelmeula is suldi saluen tot eenen propheet in v stede.

17

⁺Ende het sal gescieden, dat so wie Hazaels swaert ontuliedt, dien sal Iehu dooden, ende soo wie tswaert van Iehu ontuliet, dien sal Elizeus dooden,

+ D

18

Ende ick sal voor my laten ouerblijuen seuen duysent mannen, der welcker knien niet en sijn voor Baal gheboocht, ende alle mont die hem niet aenbeden en heeft die hant cussende.

19

Hierom Elias van daer ghereyst sijnde heeft Elizeum Saphats sone gheuonden ackerende met twaelf paer ossen, ende onder die metten twaelf paer ossen ackerden was hi een. Ende doen Elias by hem comen was, soo heeft hy sijnen mantel op hem gheleyt,

20

Die welcke is terstont gheloopen nae Eliam (achterlatende die ossen) ende hy seyde, Ick bid v laet my doch mijnen vader ende mijn moeder cussen, ende alsoo sal ic v volghen. Ende hy heeft tot hem gheseyt, Gaet henen ende coemt wederom, want ick heb v ghedaen dat my toebehoorde.

21

Maer doen hy van hem wederom comen was, soo heeft hy ghenomen een paer ossen ende die gheslaghen, ende met der ossen ploech heeft hi dat vleesch ghecoect ende den volcke ghegheuen, ende sij hebben dat gheten. Ende opstaende is hy wech gegaen, ende Eliam gheuolcht, ende diende hem.