Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xviij. Capittel.

[afbeelding]

1

NAe veel daghen soo is des Heeren woordt ghedaen aen Eliam int derde iaer segghende, ⁺Gaet henen ende vertoont v Achab dat ick reghen gheve op dat aenschijn der aerden.

+ A

2

Hierom is Elias ghegaen om hem te vertoonen voor Achab. Ende den hongher was seer groot in Samarien

3

Ende Achab heeft gheroepen Abdiam sijnen hoofmeester.

4

Ende Abdias vreesde den Heere seere, want doen Iezabel des Heeren propheten doode, so heeft hy hondert propheten ghenomen ende die gheborghen by vijftich ende vijftich in speluncken, ende voedde die met broot ende water.

5

Hierom heeft Achab tot Abdiam gheseyt, Gaet henen doort dlant tot alle die water fonteynen, ende in allen die valleyen, oft wij byauontueren cruyt vinden mochten, ende behouden onse peerden ende muylen, ende dat die behelpighe beesten niet gheheel verloren en gaen.

6

Ende sij hebben onder hen die landen ghedeylt, om die rontsomme door te gaen. Achab ghinc door den eenen wech ende Abdias door eenen anderen wech versceyden van malcanderen.

7

Ende doen Abdias inden wech was, ⁺soo is hem Elias te ghemoete comen, ende doen hi hem ghekent hadde, soo is hy op sijn aensicht gheuallen, ende hy heeft gheseyt, En sijdi niet mijn heere Elias?

+ B

8

Tot den welcken hy gheantwoort heeft, Ick bent, Gaet henen, ende segt uwen heere, Elias is hier.

9

Ende hy seyde, Wat heb ick misdaen, dat ghy my uwen knecht in Achabs hant leuert dat hy my doode,

10

Soo warachtelijck als die Heere v God leeft, daer en is gheen volck oft conincrijck daer mijn heere niet ghesonden en heeft om v te soecken, ende doen sij alle antwoorden, hy en is hier niet, soo heeft hy alle die conincrijcken ende natien besworen, om dat ghi niet gheuonden en wordet.

11

Ende nu segdi tot my, Gaet henen ende segt uwen heere, Elias is hier,

12

Ende als ic van v sal ghegaen sijn, soo sal des Heeren gheest v wegdraghen tot eenighe plaetse die ic niet en weet ende ic sal comen ende bootscappen dit Achab, ende eest dat ick v dan niet en vinde, soo sal hy my dooden, ⁺ende v knecht vreest den Heere van sijnder ioncheyt aen,

+ C

13

En eest v mijnen heere niet te kennen ghegeuen wat ic ghedaen hebbe doen Iezabel des Heeren propheten doodde, dat ic hondert mannen van des Heeren propheten verberchde by vijftich ende vijftich in die speluncken ende voedde die met broot ende water?

14

Ende ghy segt nv, Gaet henen ende segt uwen heere, Elias is hier, dat hy my doode.

15

Ende Elias seyde, Alsoo warachtelijck als die Heere der heyrscaren leeft, voor wiens aenschijn ic stae, soo sal ic my heden voor hem vertoonen.

16

Hierom is Abdias Achab te ghemoete

[p. *283]

ghegaen, ende hy heuet hem te kennen ghegheuen, ende Achab is Elias te ghemoete ghegaen.

17

Ende als hy hem ghesien hadde, seyde hy, En sijdi niet die ghene die Israel verstoort?

18

ende hy heeft gheseyt, Ic en heb Israel niet verstoort, maer ghy ende ws vaders huys, die des Heeren gheboden verlaten hebt ende sijt Baalim gheuolcht,

19

Maer nochtans sendt wt ende verghadert tot my gheheel Israel opden berch Carmelus, ende oock die vierhondert ende vijftich propheten van Baal, ende die vierhondert propheten der bosschelkens die van Iezabels tafel eten.

20

⁺Achab heeft ghesonden tot alle die kinderen van Israel, ende hy heeft die propheten vergadert op den berch Carmelus.

+ D

21

Ende Elias comende by alle dat volc heeft gheseyt, Hoe langhe ghaedi manck op twee sijden? Is die Heere God soo volcht hem, maer eest Baal soo volcht dien.

22

Ende dat volck en antwoorde hem niet een woordt. Ende Elias heeft wederom totten volcke gheseyt, Ick ben alleen ouerbleuen een propheet des Heere, maer Baals propheten sijn vierhondert ende vijftich mannen,

23

Men gheue ons twee ossen, ende laet henlieden den eenen osse voor hen wtkiesen, ende dien in stucken houwende opt hout leghen, maer gheen vier daer onder steken, ende ick sal den anderen osse nemen, ende opt hout legghen, maer gheen vier daer onder steken,

24

Roept ghy uwer goden namen aen, ende ick sal mijns Heeren naem aenroepen, ende die Godt die welcke doort vier verhooren sal, die sij Godt. Ende alle volck antwoordende heeft gheseyt, Dits een seer goede voorlegghinghe.

25

Hier om heeft Elias tot Baals propheten gheseyt, Kiest voor v den eenen osse, ende doet ghy ierstmael, ⁺want ghy sijt meerder van ghetale, ende aenroept uwer goden namen, ende en steect daer gheen vier onder.

+ E

26

Doen sij den osse ghenomen hadden, die hy hen ghegheuen hadde, so hebben sij dien bereyt, ende Baals naem aengheroepen van smorghens tot middach toe, segghende, Baal verhoort ons. Ende daer en was gheen stemme noch iemant die antwoorde, ende sij hebben ouer den outaer ghespronghen den welcken sij ghemaect hadden.

27

Ende alst nv middach was, so bespotte Elias henlieden segghende, Roept met meerder stemmen, want hy is een godt, ende by auontueren spreect hy, oft hy is in die herberghe, oft op die reyse, oft seker hy slaept, dat hy ontwecke.

28

Hier om riepen sij met luyder stemmen ende sij doorsneden hen seluen met messen ende vliemen tot dat sij heel bebloet worden.

29

Maer doen den middach ouerleden was, ende die wijle dat sij propheteerden den tijt ghecomen was datmen pleecht tsacrificie te offeren, ende daer gheen stemme ghehoort en worde, ende niemant en antwoorde, noch de bidders en aenmercte,

30

soo heeft Elias tot alle dat volck gheseyt, Coemt te mywaerts. Ende doen dat volck by hem quam soo heeft hy des Heeren outaer vermaect die ghebroken was,

31

Ende hy heeft twaelf steenen ghenomen, nae dat ghetal der gheslachten van Iacobs kinderen, tot den welcken des Heeren woordt ghesciet is segghende, Israel sal uwen naem sijn,

32

ende hy heeft van dien steenen eenen outaer opghetimmert inden naem des Heeren, ⁺ende hy heeft eenen waterloop ghemaect ghelijck door twee groefkens rontsomme den outaer,

+ F

33

ende hy heeft dat hout ghescict, ende den osse ghedeelt by sijn leden ende die opt hout gheleyt, ende seyde,

34

Vult vier watercruycken met water, ende ghiet dat op die heelbrantofferande ende op dat hout, ende hy heeft wederom gheseyt, Doet dat oock ten tweeden male. Ende als si dat ten tweedenmale ghedaen hadden, seyde hy, Doet dat selue noch ten derdenmale. Ende sij hebben dat ten derdenmale ghedaen,

35

ende die wateren liepen rontsomme den outaer, ende die groeue vanden waterloop worde al vol.

36

Ende alst tijt was datmen den heelenbrantoffer offeren soude, soo heeft Elias die propheten aencomende gheseyt, O Heere Abrahams ende Isaacs ende Israels Godt, thoont heden dat ghy Israels Godt sijt, ende ick v knecht, ende dat ick alle dese woorden nae v ghebodt ghedaen hebbe, Verhoort my Heere, verhoort my,

37

op dat dit volck leere kennen, dat ghy die Heere die Godt sijt, ende dat ghy hen herte wederom bekeert hebt.

38

Doen is dat vier des Heeren nedergheuallen, ende heeft verslonden den heelen brantoffer ende dat hout ende die steenen, ooc mede dat gestubbe ende dat water welck inden waterloop was opleckende,

39

Dwelck als alle tvolck ghesien hadde, soo eest op sijn aensicht gheuallen, ende heeft gheseyt, Die Heere is Godt selue, Die Heere is Godt selue.

40

Ende Elias seyde tot hen, Grijpt Baals propheten, ende en laet niet eenen van hen ontulieden. Ende als sij die gheuanghen hadden, soo heeft Elias die gheleydt aen die beke van Cison ende die daer ghedoodt.

41

Ende Elias heeft tot Achab gheseyt, Gaet opwaerts, eet ende drinct, want daer is een gheruysch van veel reghens.

42

Achab is opwaerts ghereyst om te eten ende te drincken, maer Elias is gheclommen op den tsop vanden berch Carmelus, ende nedergheboocht ter aerden heeft hy sijn aensicht tusschen sijn knien ghestelt

43

ende gheseyt tot sijnen dienaer, Gaet opwaerts, ende siet wt ter zee waerts. Ende als hy opgheghaen was, ende besien hadde, soo heeft hy gheseyt, Daer en is niet met allen. Ende Elias seyde weder tot hem, Gaet wederom seuen reysen.

44

Maer in die seuenste reyse siet so quam daer een cleyn wolcken op wter zee ghelijck eens menschens voetstappe. Ende hy seyde, Gaet opwaerts ende segghet Achab, Spant aen uwen waghen ende reyst nederwaerts, dat v den reghen niet en ouerualle.

45

Ende doen hy by hem keerde herwaerts ende derwaerts, siet die hemelen sijn heel verduystert gheworden, ende wolcken ende winden ende het is eenen grooten reghen worden.

Aldus is Achab opgheghaen, ende wech ghereyst te Iezrahel,

46

ende die hant des Heeren is op Eliam ghesciet, Ende hy liep henen met opghescorte lendenen voor Achab, tot dat hy quam te Iezrael.