Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xvij. Capittel.

1

⁺ENde Elias die Thesbiter vanden inwoonders van Galaab heeft gheseyt tot Achab, Alsoe warachtelijck als die Heere die Godt van Israel leeft, voor wiens aensicht ick staen, so en salt binnen desen iaren noch dauw noch reghen sijn dan nae die woorden mijns monts.

+ A

2

Ende dat woort des Heeren is tot hem ghesciet segghende,

3

Gaet van hier ende gaet teghen Oosten ende weest verborghen aen die beke Carith die teghen ouer die Iordane is,

4

ende aldaer suldi vander beken drincken, ende ich heb den rauen beuolen dat sij v daer voeden.

5

Hier om is hy wech ghegaen ende heeft ghedaen nae des Heeren woordt, ende als hy wech ghegaen was, soo is hy gheseten aen die beke Carith, die teghen ouer die Iorda-

[p. *282]

ne is.

6

Ende die rauen brachten hem broot ende vleesch des morghens, desghelijcs ooc broot ende vleesch tsauonts, ende hy dranc van die beke.

7

Maer nae sommighe daghen is die beke verdroocht (want ten hadde op die aerde niet ghereghent.)

8

⁺Hierom is het woort Gods tot hem ghesciet segghende,

+ B

9

Staet op ende gaet in Sareptha der Sidoniters stadt, ende ghi sult daer blijuen, want ic heb daer eender weduwen beuolen dat sij v voede.

10

Hij is opghestaen, ende wech gheghaen in Sareptha. Ende als hy comen was aen die stadt poorte, so sach hi daer een vrouwe die weduwe was hout rapende, ende hy heeftse gheroepen ende tot haer gheseyt, Gheeft my een weynich waters in een vaetken om te drincken.

11

Ende doen sij wech ghinck om te halen, heeft hi achter haren rugghe gheroepen segghende, Ic bidde v haelt my ooc een montvol broots in v hant.

12

Die welcke heeft gheantwoort, Soo warachtelijck als die Heere v Godt leeft, ick en heb gheen broot, dan so veel meels in een cruycke alsmen met een hant soude moghen begrijpen, ende een luttelken olien in eenen olie pot, siet ick rape twee honten, ⁺om te gaen ende dat te bereyden voor my ende mijnen sone, dat wij eten ende steruen.

+ C

13

Tot die welcke heeft Elias gheseyt, En wilt niet vreesen, maer gaet henen, ende doet ghelijck ghy gheseyt hebt, maer nochtans maect ierstmael voor my van dien seluen meelken een cleyn coexken onder die asschen ghebacken ende brengt my dat, ende namaels suldi voor v ende uwen sone een maken,

14

Want dit seyt die Heere die Godt van Israel, Die meel cruycke en sal niet ydel worden, noch den olie pot en sal niet ghemindert worden, tot den dach toe als Godt reghen gheuen sal op dat aensicht der aerden.

15

Die welcke is wech gheghaen ende heeft nae Elias woordt ghedaen, ende hy heeft gegheten, ende sij, ende alle haer huys,

16

ende van dien dach aen en faelgeerde die meelcruycke niet, ende den olie pot en is niet ghemindert nae des Heeren woort dat hy ghesproken hadde in die hant van Elias.

17

Maer nae desen eest ghesciet dat der vrouwen des huys weerdinnen sone sieck is gheworden, ende die siecte was seer sterck, alsoo dat in hem gheenen adem en bleef.

18

Hier om heeft sij tot Eliam gheseyt, Wat heb ic met v te doen man Gods? sijt ghy by my inne comen om dat mijn boosheden souden herdacht worden, ende dat ghy mijnen sone soudt dooden? ⁺Ende Elias heeft tot haer gheseyt, Gheeft my uwen sone,

+ D

19

Ende hy heeft dien van haren schoot ghenomen ende ghedraghen in die bouenste eetcamer daer hy logeerde, ende gheleyt op sijn beddeken,

20

ende hy heeft tot den Heere gheroepen ende gheseyt, O Heere mijn Godt, hebdy oock dese weduwe (by die welcke ic eenichsins onderhouden worde) verdriet aenghedaen, dat ghy haren sone dooden soudt?

21

Ende hi heeft sij seluen wtgestrect ende ghemeten ouer dat kint drijmael, ende gheroepen totten Heere ende gheseyt, O Heere mijn Godt ick bidde v laet doch dees kints ziele weder in sijn binnenste comen.

22

Ende die Heere heeft Elias stemme verhoort, ende des kints ziele is weder in hem ghecomen, ende tis wederom leuende worden.

23

Ende Elias heeft dat kint ghenomen, ende van der eedtcameren af ghebracht in dat onder huys, ende sijnder moeder gegeuen, ende hi heeft tot haer gheseyt, Siet v sone is leuende.

24

Ende die vrouwe heeft tot Eliam gheseyt, Nu heb ick hier aen bekent dat ghy een man Godts sijt, ende dat het woort des Heeren in uwen mont waarachtig is.