Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xvi. Capittel.

[p. *281]

1

⁺MMaer het woordt des Heeren is gheschiet tot Iehu den sone Hanani teghen Baasa segghende,

+ A

2

Om dat ic v wt dat stof verhauen hebbe, ende v ghestelt tot eenen vorst ouer mijn volck van Israel, maer ghy hebt in Ieroboams wech ghewandelt, ende mijn volc van Israel doen sondighen dat ghy my creyten soudt door hen sonden,

3

siet ic sal afmaeyen die achterste van Baasa, ende die achterste van sijnen huyse, ende ic sal v huys maken ghelijc Ieroboams Nabath soons huys.

4

Wie datter van Basa in die stadt sterft, dien sullen die honden eten, ende wie van hem sterft opt velt, dien sullen die voghelen des hemels eten.

5

Maer dandere der woorden van Baasa, ende al wat hy ghedaen heeft, ende sijn strijden, en sijn dese niet ghescreuen int boeck der woorden vanden daghen der coninghen van Israel?

6

⁺Aldus is Baasa ontslapen met sijnen vaderen ende begrauen in Thersa, ende Ela sijn sone regneerde voor hem.

+ B

7

Maer doen des Heeren woordt ghedaen worde in die hant van Iehu den sone Hanani des propheets teghen Baasa ende teghen sijn huys, ende teghen alle tquaet dat hy ghedaen hadde voor den Heere, om hem te creyten door die wercken sijnder handen, dat hy worden soude ghelijck het huys van Ieroboam, om dese sake heeft hy hem ghedoot, dat is Iehu den sone Hanani den propheet.

8

Int sessentwintichste iaer van Asa des conincs van Iuda, heeft gheregneert Ela die sone Baasa ouer Israel in Thersa twee iaren.

9

Ende sijn knecht Zambri een capiteyn van die helicht der ruyters te peerde, ⁺is teghen hem opghestaen, ende Ela was in Thersa drinckende, ende droncken int huys van Arsa des prouoost van Thersa.

+ C

10

Hier om Zambri daer in vallende heeft hem gheslaghen ende ghedoot int seuen ende twintichste iaer Asa des conincs van Iuda, ende hy regneerde voor hem.

11

Ende doen hy regneerde ende gheseten was op sijnen rijcs stoel, soo heeft hy verslaghen alle thuys van Baasa, ende hy en heeft daer af niet eenen ghelaten aenden want pissende, ende sijn maescap ende vrinden.

12

Ende Zambri heeft alle thuys van Basa wech verdaen nae des Heeren woort, dat hy tot Basa ghesproken hadde door die hant Iehu des propheets

13

om alle die sonden van Baasa, ende die sonden Ela sijns soons die ghesondicht hebben ende Israel doen sondighen, creytende den Heere den God van Israel door haer ydelheden.

14

Maer dander woorden van Ela, ⁺ende alle dat hy ghedaen heeft, en sijn dese niet ghescreuen int boeck der woorden van die daghen der coninghen van Israel?

+ D

15

Int seuen ende twintichste iaer Asa des conincs van Iuda, heeft Zambri gheregneert seuen daghen in Thersa. Ende het heyr belach Gebbethon der Philistinen stadt.

16

Ende als sij hoorden dat Zambri teghen den coninck opghestaen was ende hem verslaghen hadde, so heeft gheheel Israel voor hen seluen eenen coninc ghemaect Amri die op dien dach een opper veltheere was ouer Israel inden legher.

17

Hierom is Amri ende gheheel Israel met hem opghetrocken van Gebbethon, ende sij belaghen Thersa.

18

Maer Zamri siende dat die stadt soude ghewonnen worden, is int palays gheghaen ende heeft sij seluen verbrant met des conincs huys,

19

ende hy is ghestoruen in sijn sonden die hy ghesondicht hadde quaet doende voor den Heere ende wandelende in Ieroboams wech, ende in sijn sonde waer mede dat hy Israel heeft doen sondighen.

20

⁺Maer het andere der woorden van Zambri, ende sijnder laghen, ende tyrannie, en sijn dese niet ghescreuen int boec der woorden van die daghen der coninghen van Israel?

+ E

21

Doen werde het volck van Israel ghedeelt in twee deelen, die helicht des volcs volchde Thebni Gineths sone om hem coninck te maken, ende die helicht volchde Amri.

22

Maer het volck dat met Amri was worde machtigher, dan het volck dat Thebni Gineths sone volchde, ende Thebni is ghestoruen, ende Amri heeft gheregneert.

23

Int eenendertichste iaer van Asa des conincs van Iuda heeft Amri gheregneert ouer Israel twaelf iaren, in Thersa heeft hy ses iaren gheregneert.

24

Ende hy heeft den berch van Samarien ghecocht van Somer, om twee talenten siluers, ende hy heeft dien betimmert, ende hy heeft die stadt die hi ghetimmert hadde ghenoemt metten naem Semer des heeren vanden berch van Samarien.

25

⁺Maer Amri heeft quaet ghedaen voor des Heeren aensicht, ende hi heeft booselijc ghedaen bouen alle die voor hem gheweest waren.

+ F

26

Ende hy heeft ghewandelt in alle die weghen van Ieroboam Nabats sone, ende in sijn sonden waer mede hy Israel hadde doen sondighen, om den Heere den Godt van Israel tot gramschap te creyten door sijn ydelheden.

27

Maer dander woorden van Amri, ende sijn strijden die hy ghedaen heeft, en sijn dese niet ghescreuen int boeck der woorden van die daghen der coninghen van Israel?

28

Ende Amri is met sijnen vaderen ontslapen, ende begrauen in Samarien, ende Achab sijn sone heeft voor hem gheregneert.

29

Maer Achab die sone van Amri, heeft ouer Israel gheregneert int achtendertichste iaer van Asa den coninck van Iuda. Ende Achab die sone Amri heeft ouer Israel gheregneert in Samarien tweentwintich iaren.

30

⁺Ende Achab die sone Amri, heeft quaet bedreuen voor des Heeren aensicht, bouen alle die voor hem gheweest waren,

+ G

31

Ten was hem ooc niet ghenoech dat hy wandelde in die sonden van Ieroboam Nabats sone, maer daer en bouen heeft hy tot een huysvrouwe ghenomen Iezabel Eth-baal des coonincs vanden Sidoniters dochter. Ende hy is wech ghegaen, ende heeft ghedient Baal ende dien aenbeden.

32

Ende hy heeft Baal eenen outaer ghestelt in Baals tempel den welcken hy ghetimmert hadde in Samarien,

33

ende hy plante een boschelken, ende Achab heeft daer toe meer ghedaen in sijn werck den Heere den God van Israel tot gramscap verweckende meer dan alle die coninghen van Israel die voor hem gheweest sijn.

34

In sijnen daghen heeft Hiel van Bethel Iericho opghetimmert, in Abiram sijnen iersten gheboren sone heeft hy die stadt ghefundeert, ende in Segub sijnen ioncsten sone heeft hy die poorten van die stadt ghestelt nae des Heeren woort dat hy ghesproken hadde in die hant van Iosue Nuns sone.