Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiiij. Capittel.

1

⁺IN dien tijt soo was Abia Ieroboams sone siec,

+ A

2

Ende Ieroboam seyde tot seynder huysvrouwen, Staet op ende verandert v habijt, dat ghy niet ghekent en wordt dat ghy Ieroboams huysvrouwe sijt, ende gaet henen te Silo daer Ahias die propheet is, die my gheseyt heeft dat ick ouer dit volck regneren soude,

3

Neemt oock in v hant thien brooden ende een coexken, ende een vaetken honichs, ende gaet tot hem, want hy sal v te kennen gheuen wat desen kinde toecomen sal.

4

Die huysvrouwe van Ieroboam heeft ghedaen ghelijc hy gheseyt hadde, ende opstaende is sij ghegaen in Silo, ende sij is in Ahias huys comen, maer hy en mocht niet sien, want sijn ooghen waren verduystert van outheden.

5

Maer die Heere seyde tot Ahiam, ⁺Siet Ieroboams huysvrouwe coemt hier binnen om van v raet te vraghen van haren sone, die sieck is, dese ende dese woorden suldi haer segghen. Daerom doen sij binnen quam ende haer veynsde als oft sij niet en hadde gheweest die sij was

+ B

6

soo heeft Ahias het gheruysch van haren voeten ghehoort doen sij door die doore binnen quam, ende hy heeft gheseyt, Coemt binnen Ieroboams huysvrouwe, waerom veynsdi v een ander te wesen, maer ick ben tot v ghesonden een hart bode,

7

Gaet henen ende segghet Ieroboam, Dit seyt die Heere die Godt van Israel, want ic v verheuen hebbe wt dat midden des volcs, ende ick heb v een ouerhooft ghestelt ouer mijn volck van Israel,

8

ende ick heb dat rijck van Dauids huys ghescoert, ende v dat ghegheuen, ende ghy en hebt niet gheweest ghelijck Dauid mijn knecht, die mijn insettingen bewaert heeft, ende my gheuolcht heeft met sijn gheheel herte, doende dat behaechlijck was in mijn aensicht,

9

⁺maer ghy hebt qualijck ghedaen bouen alle die voor v gheweest hebben, ende ghy hebt voor v ghemaect vreemde goden ende ghegoten, om dat ghy my soudt tot gramscap verwecken, maer my hebdi achter v lichaem gheworpen,

+ C

10

Daerom siet ick sal quaet brenghen ouer Ieroboams huys, ende ic sal van Ieroboam slaen alle die aen den want pissen ende den beslotenen, ende den wtersten in Israel, ende ic sal die bleuelinghen van Ieroboams huys reynighen ghelijc men den dreck pleecht te reynighen tot dat suyuer is.

11

Soo wie van Ieroboam in die stadt steruen sullen, die sullen die honden eten, maer die opt velt steruen sullen, die sullen die voghelen des hemels verslinden, want die Heere heuet ghesproken.

12

Hier om staet op ghy ende gaet in v huys, ende in dat incomen van uwen voeten in die stadt sal dat kint steruen,

13

⁺ende gheheel Israel sal hem bescreyden ende beclagen, ende begrauen, want dese alleene sal van Ieroboams huys int graf ghedraghen worden, want op hem is een goet woordt beuonden van den Heere den Godt van Israel in Ieroboams huys.

+ D

14

Maer die Heere sal hem seluen eenen coninck stellen ouer Israel, die welc het huys van Ieroboam slaen sal op desen dach, ende op desen tijt,

15

ende die Heere die Godt sal Israel slaen ghelijc dat riet pleecht gheroert te worden int water, ende hy sal Israel wt trecken wt dit goet lant, het welck hy haren vaderen ghegeuen heeft, ende hy sal die als met den wint wech vueren ouer den vloet, want sij hebben voor hem seluen bosschelkens ghemaect om dat sij den Heere creyten souden.

16

Ende die Heere sal Israel leueren om Ieroboams sonden die hy ghesondicht heeft, ende Israel heeft doen sondighen.

17

Ende aldus is Ieroboams huysvrouwe opghestaen, ende wech ghegaen, ende is ghecomen in Thersa. Ende doen sij quam binnen op den dorpel des huys soo is dat kint ghestoruen, ⁺ende sij hebben dat begrauen.

+ E

18

Ende gheheel Israel heeft hem beclaecht nae des Heeren woordt het welck hy ghesproken heeft in die hant van sijnen dienaer Ahias den propheet.

19

Maer dander woorden van Ieroboam, hoe dat hy ghestreden heeft ende hoe hy gheregneert heeft, siet dese sijn ghescreuen int boeck der woorden vanden daghen der coninghen van Israel.

20

Ende die daghen in die welcke Ieroboam gheregneert heeft sijn tweentwintich iaren, ende hy is ontslapen met sijnen vaderen, ende Nadab sijn sone heeft voor hem gheregneert.

21

Maer Roboam Salomons sone heeft in Iuda gheregneert. Eenenveertich iaren out was Roboam doen hy begonste te regneren, seventhien iaren heeft hy gheregneert te Ierusalem in die stadt welck die Heere vercoren heeft om dat hy sijnen naem daer stellen soude, ⁺wt alle die gheslachten van Israel. Ende sijns moeders naem was Naama, een Ammonijtsche vrouwe.

+ F

22

Ende Iudas heeft quaet voor den Heere ghedaen, ende sij hebben hem tot gramschap verwect, bouen allen dat hen vaders ghedaen hadden in hen sonden die sij ghesondicht hebben,

23

Want sij hebben seluer ooc voor hen seluen opghetimmert outaeren ende afgoden beelden ende bosschelkens op alle hooghe hoeuelen, ende onder alle die boomen dicke van bladeren.

24

Ooc soo waren daer in dlant verwijfde mans, ende sij hebben alle die afgrijselijckheden der heydenen ghedaen, die de Heere vernielt heeft voor het aenschijn der kinderen van Israel.

25

Maer int vijfste iaer van Roboams conincrijck is Selac die coninc van Egipten opghecomen te Ierusalem,

26

ende hy heeft die scatten van des Heeren huys ghenomen ende des conincs scatten, ende hy heuet al gherooft, ende oock die gulden

[p. *280]

schilden die Salomon hadde doen maken,

27

⁺voor die welcke die coninck Roboam metalen schilden heeft doen maken, ende die gheleuert in die hant van den ouersten der sciltknechten, ende der gheender die daer waecten voor die doore van des conincs huys.

+ G

28

Ende als die coninck in des Heeren huys ghinck soo droeghen sij die schilden die dofficie hadden van voor te gaen, ende daer nae brachten sij die wederomme tot dat wapen huys der sciltknechten.

29

Maer dander van Roboams woorden, ende alle dat hy ghedaen heeft, siet die sijn ghescreuen int boeck der woorden van die daghen der coninghen van Iuda.

30

Ende het is orloghe gheweest tusschen Roboam ende Ieroboam tot allen daghen.

31

Ende Roboam is ontslapen met sijnen vaderen, ende met hen begrauen in Dauids stadt, ende sijns moeders naem was Raama een Ammanijtsche vrouwe, ende Abiam sijn sone heeft voor hem gheregneert