Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiij. Capittel.

1

⁺ENde siet daer is een man Gods van Iuda ghecomen door des Heeren woordt te Bethel, doen Ieroboam opden outaer stont ende wieroock wierp.

+ A

2

Ende hy heeft gheroepen tseghen den outaer in des Heeren woordt ende gheseyt, Outaer, outaer, dit seyt die Heere, Siet den huyse van Dauid sal eenen sone gheboren worden Iosias ghenaemt, ende die sal op v dooden ende offeren die priesters der hoochden die nu op v wieroock ontsteken, ende ghebeenten der menschen sal hy op v ontsteken.

3

Ende hy heeft op dien dach een teeken ghegeuen, segghende Dit sal het teeken sijn, dattet die Heere ghesproken heeft, Siet den outaer sal in tween ghescoert worden ende die asschen sullen wtgestort worden die daer op sijn.

4

Ende doen die coninck dat woort vanden man Gods ghehoort hadde het welck hy gheroepen hadde teghen den outaer te Bethel, so heeft hy sijn hant van den outaer wtghereyct, segghende, Vangt hem. Ende sijn hant verdroochde die hy teghen hem wtghereyct hadde, ende hy en conste die niet wederom tot hem ghetrecken.

5

Den outaer is oock ghescoert, ende die asschen sijn vanden outaer ghestort, naet teeken dat die man Gods te voren gheseyt hadde in dat woort des Heeren.

6

⁺Ende die coninc seyde tot den man Gods Bidt dat aensicht des Heeren ws Godts, ende bidt voor my, dat mijn hant my mach wederom ghegheven worden. Ende die man Gods heeft des Heeren aensicht ghebeden, ende des conincs hant is wederom tot hem ghekeert, ende sij is worden ghelijck sij te voren was.

+ B

7

Ende die coninck heeft tot den man Gods gheseyt, Coemt met my thuys dat ghy den noenmael etet, ende ick sal v ghiften gheuen.

8

Ende die man Godts heeft tot den coninck gheantwoordt, Al ghaefdi my die helicht van uwen huyse, so en sal ic met v niet comen, noch ick en sal gheen broot eten, noch water drincken in dese plaetse,

9

want alsoo is mi beuolen in dat woordt des Heeren, ghebiedende, Ghy en sult gheen broot eten, noch gheen water drincken, noch ghy en sult niet wederkeeren door den wech daer ghy door comen sijt.

10

Hier om is hy door eenen anderen wech ghegaen, ende hy en is niet wederghekeert door den wech waer door hy te Bethel comen was.

11

Maer daer woonde een oudt propheet te Bethel, ⁺tot den welcken quamen sijn sonen ende vertelden hem alle die wercken welck die man Godts op dien dach te Bethel ghedaen hadde, ende die woorden die hy tot den coninck ghesproken hadde, ende sij hebben dit haren vader vertelt.

+ C

12

Ende haer vader seyde hen, Door wat wech is hy wech ghegaen. Sijn soonen toonden hem den wech door den welcken die man Godts wech gheghaen was, die van Iuda comen was.

13

Ende hy seyde tot sijnen sonen, Sadelt my eenen ezel.

14

Ende als sij dien ghesadelt hadden, soo is hy daer op gheghaen, ende is den man Godts nae ghereyst, ende hy heeft hem vonden sittende onder eenen Therebintijn boom, ende hy seyde tot hem, Sijt ghy niet die man Godts die van Iuda gecomen sijt? Hy heeft gheantwoort, Ic bent,

15

Ende hy seyde tot hem, Coemt met my in huys dat ghy broot etet.

16

Die welcke heeft gheantwoordt, Ick en mach niet wederkeeren, noch met v comen, ⁺noch ick en sal gheen broot eten, noch water drincken op dese plaetse,

+ D

17

want die Heere heeft tot my ghesproken in des Heeren woordt segghende, Ghy en sult daer gheen broot eten, ende gheen water drincken, noch ghy en sult niet wedercomen door den wech waer ghy door ghegaen waert.

18

Hy seyde tot hem, Ic ben ooc een propheet ws ghelijck, ende die Enghel heeft tot my ghesproken in des Heeren woordt segghende, Brenghet hem wederom in v huys, dat hy broot ete, ende water drincke.

19

Hy heeft hem bedroghen ende wederom met hem gheleyt. Daer om heeft hy broot in sijn huys gheten, ende water ghedroncken.

20

Ende doen sij aen die tafel saten, so is dat woort des Heeren ghesciet totten propheet die hem wederom gheleydt hadde.

21

Ende hy riep tot den man Gods die van Iuda ghecomen was segghende, Dit seyt die Heere, Om dat ghy den mont des Heeren niet onderdanich en hebt gheweest, ende niet en hebt bewaert tghebodt dwelck die Heere v God gheboden heeft,

22

ende sijt wederom comen, ende hebt broot gheten ende water ghedroncken in die plaetse daer ik v beuolen hebbe dat ghy gheen broot eten en soudt noch water drincken, ⁺soo en sal v lichaem in uwer vaderen graf niet ghedraghen worden.

+ E

23

Ende doen hy ghegheten ende ghedroncken hadde, soo heeft die propheet den welcken hy wederom gheleydt hadde sijnen ezel ghesadelt.

24

Die welcke als hy wech ghegaen was, soo heeft hem eenen leuw opden wech vonden, ende heeft hem ghedoot. Ende sijn doode lichaem was gheworpen inden wech, ende den ezel stont daer by, ende den leuw stont by tdoode lichaem.

25

Ende siet, die mannen daer voorby gaende hebben ghesien dat doot lichaem gheworpen in den wech ende den leuw staende by tdoode lichaem, ende sij sijn ghecomen ende hebben dat vermaert ghemaect in die stadt daer die oude propheet in woonde.

26

Dwelck als ghehoort hadde die propheet die hem vanden wech wederom ghebracht hadde, soo seyde hy, Het is die man Godts die des Heeren mont ongehoorsaem is gheweest, ende die Heere heeft hem den leuw ouerghegeuen, ende die heeft hem verscoert ende ghedoot na des Heeren woordt dat hy hem ghesproken hadde.

27

Ende hi heeft tot sijnen kinderen gheseyt, Sadelt my eenen ezel.

28

⁺Ende doen sij dien ghesadelt hadden, ende hy wech ghereyst was, soo heeft hy sijn doode lichaem gheuonden inden wech gheworpen, ende den ezel ende den leuw staende by dat doode lichaem, den leuw en heeft van dat doode lichaem niet gheten, noch den ezel ghequetst.

+ F

29

Hier om heeft die propheet dat doode lichaem vanden man Godts ghenomen, ende op den ezel gheleyt, ende wederom comende heeft hy dat in die stadt des ouden propheets ghebracht, om dat sij hem beclaghen souden.

30

Ende hi heeft dat doode lichaem in sijn graf gheleydt, ende si hebben hem beclaecht, Wee

[p. *279]

wee mijn broeder.

31

Ende als sij hem beclaecht hadden, ⁺soo heeft hy tot sijnen sone gheseyt, Als ick ghestoruen sal sijn, dan begraeft mi in dat graf daer die man Gods in begrauen is, by sijn ghebeente legghet mijn ghebeente,

+ G

32

Want voorwaer dwoort sal ghescieden dat hy te voren gheseyt heeft in des Heeren woordt teghen den outaer die te Bethel is, ende teghen alle die tempelen der hoochten die in die steden van Samarien sijn,

33

Nae dese woorden so en is Ieroboam niet wederghekeert van sijnen alderquaetsten wech, maer ter contrarien maecte hi van die laetste des volcs priesters der hoochden, Wie dat wilde, die vulde sijn hant, ende hy worde priester der hoochden.

34

Ende om dese sake sondichde het huys van Ieroboam, ende het is omgheworpen ende te niete ghedaen van dat ouerste der aerden

[afbeelding]