Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xij. Capittel.

1

⁺ENde Roboam is ghecomen in Sichem, want daer was gheheel Israel vergadert om hem coninck te maken,

+ A

2

Maer Ieroboam Nabats sone, doen hy noch in Egipten was int huys van Pharao, vluchtig van des conincs Salomons aensicht, ghehoort hebbende dat hy doot was is weder om van Egipten comen.

3

Ende sij hebben ghesonden ende hem gheroepen. Hierom is Ieroboam comen ende die gheheel menichte van Israel, ende sij hebben tot Roboam ghesproken segghende,

4

V vader heeft een seer hart iock op ons gheleyt, hier om so mindert nv ghy een weenich van ws vaders seer harde heerscappie, ende van dat seer swaer iock dat hy ons opgheleyt heeft, ende soo sullen wij v dienen.

5

Hy seyde tot hen, Gaet wech tot opden derden dach, ende coemt dan wederom by my.

6

Ende doen dat volck wech gheghaen was, ⁺soo heeft die coninck Roboam eenen raet ghehouden metten ouders die in die teghenwoordicheyt van sijnen vader Salomon stonden doen hy noch leefde, ende hy seyde, Wat raet gheeft ghy my dat ick desen volcke antwoorde. Die welcke hem gheseyt hebben

+ B

7

Eest dat ghi heden desen volcke onderdanich sijt, ende hen dient, ende haerder begheerte plaetse gheeft, ende dat ghy hen saechte woorden spreect, soo sullen sij v tot allen daghen dienen.

8

Maer hy heeft der ouders raet verlaten, dien sij hem ghegheuen hadden, ende hy heeft ionghelinghen by hem ghenomen die met hem opgheuoedt waren, ende by hem stonden, ende hy heeft tot hen gheseyt,

9

Wat raet gheeft ghy my dat ick desen volcke antwoorde die my gheseyt hebben, Maect dat iock lichter dwelc v vader ons opgheleyt heeft?

10

Ende die ionghers die met hem opgheuoet waren, hebben geseyt, Aldus spreect desen volcke dat tot v ghesproken heeft segghende, V vader heeft ons iock beswaert, ⁺verlicht ghi ons dat. Aldus suldi tot hen spreken, Mijnen cleynsten vingher is grooter dan mijns vaders rugghe,

+ C

11

Ende nv mijn vader heeft op v een swaer iock gheleyt, maer ick sal op v iock noch meer toe doen, mijn vader heeft v met gheeselen gheslaghen, maer ick sal v met scorpioenen slaen.

12

Hier om so is Ieroboam ende alle dat volck ghecomen tot Roboam op den derden dach, ghelijck die coninck ghesproken hadde, segghende, Coemt wederom by my ten derden daghe.

13

Ende die coninck heeft den volc harde woorden gheantwoordt, verlatende den raet der ouders, den welcken si hem ghegeuen hadden,

14

ende hy heeft hen gheseyt nae den raet vanden ionghers, segghende, Mijn vader heeft v iock beswaert, maer ick sal tot v iock noch meer doen, mijn vader heeft v met gheesselen gheslaghen, maer ic sal v met scorpieonen slaen.

15

⁺Ende die coninck en heeft dat volck niet willen belieuen, want die Heere een afkeeren van hem hadde, om dat hy sijn woordt soude verwecken dat hy ghesproken hadde in die hant van Ahias die Siloniter tot Ieroboam Nabats sone.

+ D

16

Daerom het volc siende dat die coninck hen niet hooren en wilde, heeft hem gheantwoordt segghende, Wat deel hebben wij in Dauid, oft wat erfdeel hebben wij in den sone van Isai? O Israel gaet henen in v tabernakelen, nv besiet v huys Dauid.

17

Ende Israel is in sijn tabernakelen ghegaen. Maer ouer alle die kinderen van Israel die welcke in die steden van Iuda woonden heeft Roboam gheregneert.

18

Hier om heeft Roboam ghesonden Aduram die ouer die tribuyten was, ende alle die van Israel hebben hem ghesteent, ende hy is ghestoruen. Maer die coninck Roboam is haestelijc op eenen waghen gheclommen, ende gheuloden in Ierusalem,

19

ende ⁺Israel is van Dauids huys ghesceyden tot op desen dach toe.

+ E

20

Ende het is ghesciet doen gheheel Israel ghehoort hadde dat Ieroboam weder comen was, soo hebben sij ghesonden ende hem gheroepen, vergaderende die ghemeynte, ende hebben hem coninc ghemaect ouer gheheel Israel, ende daer en is niemant Dauids huys gheuolcht dan tgheslachte van Iuda alleen.

21

Maer Roboam is te Ierusalem ghecomen, ende hy heeft het gheheel huys van Iuda verghadert, ende tgheslachte van Beniamin, hondert ende tachtentich duysent wtghelesender ende strijtbarigher mannen, dat sij strijden souden teghen thuys van Israel ende dat rijck wederom brenghen tot Roboam Salomons sone.

22

Maer het woordt des Heeren is ghesciet tot Semeiam den man Gods segghende,

23

⁺Spreect tot Roboam Salomons sone den coninck van Iuda, ende tot alle dat huys van Iuda ende Beniamin, ende tot die andere des volcs segghende,

+ F

24

Dit seyt de Heere, Ghy en sult met optrecken, noch strijden teghen uwe broeders die kinderen van Israel, Laet elc man wederom in sijn huys gaen, want dit woordt is van my ghesciet, Sij hebben nae des Heeren woordt ghehoort, ende sij sijn wederom ghekeert van der reysen ghelijck die Heere gheboden hadde.

25

Maer Ieroboam heeft Sichem opghetimmert int gheberchte van Ephraim, ende hy heeft daer ghewoont ende van daer gheghaen sijnde heeft hy Phanuel ghetimmert.

26

Ende Ieroboam heeft in sijn Heere gheseyt, Nu sal dat conincrijk wederom comen tot Dauids huys,

27

eest dat dit volck opwaerts gaet om sacrificien te doen in des Heeren huys te Ierusalem, ende het herte van desen volcke sal weder ghekeert worden tot haren Heere Roboam, den coninck van Iuda, ende sij sullen my dootslaen, ende weder tot hem keeren.

28

Ende eenen raet versinnende heeft hy twee gulden calueren ghemaeckt ende tot hen gheseyt, ⁺En wilt voorts aen niet meer opclimmen nae Ierusalem, Siet v goden Israel, die v wt Egipten gheleyt hebben.

+ G

29

Ende hy heeft dat een

[p. *278]

ghestelt te Bethel, ende dander in Dan, ende dat woordt is tot een sonde gheworden,

30

Want het volck ghinck om dat calf te aenbidden tot in Dan.

31

Ende hy heeft oock tempelen ghemaect op hooghe plaetsen, ende priesters van die laetste des volcs, die vanden kinderen van Leui niet en waren.

32

Ende hy heeft eenen hooglijcken feestdach ghestelt in die achtste maent, op den vijfthiensten dach der maent, tot een ghelijckenisse des hoochtijts welck gheuiert worde in Iuda. Ende climmende op den outaer heeft hy desghelijcs ooc ghedaen in Bethel, om den calueren offerande te doen die hy ghemaect hadde, ende hy heeft in Bethel priesters ghestelt van die hoochden die hy ghemaect hadde.

33

Ende hy is gheclommen opden outaer die hy in Bethel ghetimmert hadde op den vijfthiensten dach der achster maent, den welcken hy wt sijnder herten versiert hadde, ende maecte den kinderen van Israel een feeste, ende hy clam op den outaer, om rueckofferande te ontsteken.