Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xi. Capittel.

1

⁺MAer die coninc Salomon heeft veel buyten lantsche vrouwen bemint, ende Pharaos dochter, ende Moabijtsche, Ammonijtsche, ende Edomijtsche, ende Sidonijtsche, ende Cetheytsche vrouwen

+ A

2

vanden heydenen, daer af dat die Heere den kinderen van Israel gheseyt heeft, Ghy en sult v met die vrouwen niet versamen, noch van dien volcke en sal hem niemant met uwen vrouwen versamen, Want sij sullen warachtelijck v herten afkeeren, also dat ghy haer goden soudt volghen. Aldus is Salomon aen desen vrouwen ghecoppelt gheweest met seer heete liefden.

3

Ende hy hadde seuen hondert huysvrouwen als coninghinnen, ende drij hondert concubinen, ende die vrouwen hebben sijn herte omme ghekeert.

4

Ende als hy nv out was, doen is sijn herte verarghert door die vrouwen, dat hy volchde die vreemde goden, ende sijn herte en was niet volcomen met den Heere sijnen Godt, ghelijck Dauid sijns vaders herte.

5

Maer Salomon eerde Astarthen die goddinne der Sidoniters ende Chamos der Moabiters Godt, ende Moloch der Ammoniters afgodt.

6

Ende Salomon heeft ghedaen dat voor den Heere niet behaecht en heeft, ende hy en heeft niet volbracht dat hy den Heere volghen soude, ghelijck Dauid sijn vader.

7

⁺Doen timmerde Salomon eenen tempel Chamos den afgod van Moab, opden berch die teghen Ierusalem is, ende Moloch den afgod der kinderen van Ammon.

+ B

8

Ende in deser manieren heeft hi alle sijnen buyte lantsche vrouwen ghedaen, die welcke haren goden wieroock ontstaken ende offeranden deden.

9

Hierom wert die Heere gram op Salomon, om dat sijn herte afghekeert was vanden Heere den Godt van Israel, die hem ten tweeden male gheopenbaert hadde,

10

ende gheboden van dit woordt, dat hy die vreemde goden niet volghen en soude, ende hy en heeft niet onderhouden tghene dat hem Godt beuolen heeft.

11

Aldus heeft die Heere tot Salomon gheseyt, Om dat ghi dit by v hebt ghehadt, ende mijn verbont niet en hebt bewaert, ende mijn gheboden die ick v beuolen hebbe, soo sal ick schoerende v conincrijck in tween snijden, ende ic sal dat uwen knecht gheuen,

12

Maer nochtans en sal ic dat in uwen daghen niet doen, ⁺om Dauid uwen vader, ic sal dat wt ws soons hant snijden,

+ C

13

ende ic en sal dat heel conincrijck niet afnemen, maer ic sal uwen sone een gheslacht gheuen, om Dauid mijns dienaers wille, ende om Ierusalem die ic vercoren hebbe.

14

Doen verwecte die Heere Salomon eenen viant Adad den Edomijter van den coninclijcken sade, die in Edom was,

15

Want doen Dauid int lant van Edom was, ende Ioab die capiteyn der orloghen opghetrocken was om te begrauen die daer verslaghen waren ende hy verslaghen hadde inder Edumijten lant alle manspersoonen

16

(want Ioab is daer ses maenden ghebleuen, ende gheheel Israel, tot dat hy ghedoot hadde alle mans persoonen in Edom lant)

17

doen vluchtede Adad hy ende sommighe mannen van Edom van sijns vaders knechten met hem, om in Egipten te gaen, maer Adad was een cleyn kindeken.

18

Ende als sij van Madian opghestaen waren, soo sijn sij comen te Pharan, ende sij hebben met hem ghenomen mannen van Pharan, ende sijn in Egipten ghecomen tot Pharao den coninck van Egipten, die welcke hem een huys heeft ghegheuen, ende nootdurft ghestelt, ende een lant toegheschict.

19

Ende Adad heeft seer veel gratien voor Pharao gheuonden, alsoo seer dat hy hem tot eender huysvrouwen gaf die warachtighe suster van Taphnes der coninghinnen.

20

⁺Ende die suster van Taphnes heeft hem voorts bracht eenen sone Genubath, ende Taphnes heeft dien opgheuoedt int huys van Pharao, ende Genubath woonde by Pharao met sijnen sonen.

+ D

21

Als nv Adad in Egipten ghehoort hadde, dat Dauid met sijnen vaderen ontslapen was, ende dat Ioab die capiteyn der orloghen doot was, soo seyde hy tot Pharao, Laet my gaen, dat ic mach in mijn lant trecken.

22

Ende Pharao heeft hem gheseyt, Wat ghebreect v by mi dat ghy begheert nae v lant te gaen? Maer hy heeft gheantwoort, Niet, maer ic bidde v dat ghi my wilt laten gaen,

23

Oock heeft hem Godt eenen viant verwect Razon den sone van Eliada, die sijnen heere Adarezer den coninck van Soba ontuloden was,

24

ende hy heeft teghen hem mannen vergadert, ende hy is een hooftman der moordenaren worden, als Dauid hemlieden doot sloech, ende sij waren nae Damascus ghegaen, ende hebben daer ghewoont, ende sij hebben hem tot eenen coninck in Damasco ghestelt,

25

ende hi was Israels viant alle die daghen van Salomon, ende dit is het quaet van Adad, ende den haet teghen Israel ende hy heeft gheregneert in Syrien.

26

⁺Ooc heeft Ieroboam Nabats sone een Ephrathiter van Sareda Elomons knecht, wiens moeder was ghenaemt Serua een weduwe, sijn hant opghehauen teghen den coninc.

+ E

27

Ende dits die sake waerom dat hy teghen hem opghestaen is, want Salomon heeft opghetimmert Mello, ende hy heeft gheuult die groote diepte van Dauid sijns vaders stadt.

28

Ende Ieroboam was een sterc man ende machtich, ende Salomon siende dat een ionghelinck was van goeder natueren ende neerstich, so hadde hy hem ghestelt op die tribuyten van alle dat huys van Ioseph.

29

Aldus eest ghesciet in dien tijt dat Ieroboam ghinck wt Ierusalem, ende dat hem vant Ahias die Siloniter een propheet op den wech, ouerdect met eenen nieuwen mantel,

30

ende sij waren beyde alleen opt velt. Ende Ahias nemende sijnen nieuwen mantel daer hy mede bedect was, heeft dien in twaelf stucken ghesneden,

31

Ende hy seyde tot Ieroboam, ⁺Neemt tot v die thien stucken, want dit seyt die Heere die Godt van Israel, Siet ick sal dat rijck snijden van Salomons handt, ende ick sal v thien gheslachten gheuen,

+ F

32

Maer een gheslachte sal hem blijuen, om Dauid mijns dienaers wille, ende om die stadt Ierusalem die ic vercoren hebbe wt alle die gheslachten van Israel,

33

om dat hy my ghelaten heeft, ende Astharten der Sidontiers goddinne aenbeden, ende Chamos den godt van Moab, ende Moloch der kinderen van Ammons godt, ende om dat hy niet ghewandelt en heeft in mijn weghen, dat hy rechtuerdicheyt doen soude voor my, ende mijn gheboden ende mijn rechten ghelijck Dauid sijn vader,

34

Noch ic en sal alle dat conincrijck wt sijnder hant niet wech nemen, maer ic sal hem eenen prince stellen alle die daghen sijns leuens, om Dauid mijnen dienaer dien ick vercoren hebbe, die mijn insettinghen ende gheboden bewaert heeft,

35

Maer ick sal dat rijck wt sijns soons hant wech nemen, ende ick sal v thien gheslachten gheuen,

36

maer sijnen sone sal ic een gheslachte gheuen, op dat Dauid mijnen Die-

[p. *277]

naer een licht mach blijuen voor my tot allen daghen in die stadt Ierusalem die ic vercoren hebbe, ⁺dat mijnen naem daer sijn soude,

+ G

37

Maer v sal ick te my nemen, ende ghy sult regneren ouer alle dat v ziele begheert, ende ghy sult coninck ouer Israel sijn.

38

Hierom eest dat ghy alle die dinghen hoort die ic v ghebieden sal, ende dat ghi wandelt in mijn weghen, ende doet dat voor my recht is bewarende mijn insettinghen ende gheboden, ghelijck Dauid mijn knecht ghedaen heeft, so sal ic met v sijn, ende ic sal v een ghetrou huys timmeren, ghelijc ic Dauids huys ghetimmert hebbe,

39

ende ick sal v Israel gheven, ende ick sal Dauids saet verdriet aendoen hier op, maer nochtans niet tot allen daghen.

40

Hierom heeft Salomon Ieroboam willen dooden, die welcke is opghestaen ende wech gheuloden in Egipten, tot Sesac den coninck van Egipten, ende hy is in Egipten ghebleuen tot Salomons doot toe.

41

Datter meer is van Salomons woorden, ende alle dat hy ghedaen heeft, ende sijn wijsheyt, siet die sijn al bescreuen int boeck der woorden van Salomons daghen.

42

Ende die daghen die welcke Salomon gheregneert heeft in Ierusalem ouer gheheel Israel waren veertich iaren.

43

Ende Salomon heeft gheslapen met sijnen vaderen, ende hy is begrauen in Dauids sijns vaders stadt, ende Roboam sijn sone heeft voor hem gheregneert.