Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .x. Capittel.

1

⁺MAer oock die coninghen van Saba ghehoort hebbende die vermaertheyt des conincs Salomons, inden naem des Heeren is ghecomen om hem te ondersoecken met gheraetselen,

+ A

2

Ende als sij binnen Ierusalem comen is met grooten gheselscap ende rijcdommen ende met kemelen die brochten costelijcke specerien ende ontellijcken veel gouts ende costelijcke ghesteenten, soo is sij ghecomen tot den coninck Salomon, ende heeft hem gheseyt alle dat sij in haer herte hadde,

3

Ende Salomon heeft haer gheleert alle die woorden die sij hem te voren gheleyt hadde, ende daer en was niet een reden die voor den coninck verborghen mocht blijuen, ende daer hy haer niet op en antwoorde,

4

Als dan die coninghinne van Saba sach alle Salomons wijsheyt, ende het huys dat hi ghetimmert hadde,

5

ende die spijse sijnder tafelen, ende sijnder knechten wooninghen, ende die ordinancie van sijnen dienaers, ende hen cleederen, ende die scenckers ende die heelbrantofferanden die hy in des Heeren huys offerde, soo en hadde sij voorts gheenen gheest meer,

6

ende sij seyde tot den coninck. Warachtich is die sprake, die ick in mijn landt ghehoort hebbe, van uwen woorden, ende van uwer wijsheyt

7

ende ick en gheloofdes hen niet diet mi vertelden, tot dat ick selue comen ben, ende dat met mijnen ooghen ghesien ende beuonden hebbe, dat mi die helicht niet en is ghebootscapt, Uwe wijsheyt ende v wercken sijn al meerder dan die mare die ic ghehoort hebbe,

8

⁺Salich sijn v mannen ende salich sijn dese uwe dienaers, die altijt voor v staen ende v wijsheyt hooren,

+ B

9

Die Heere v Godt sij ghebenedijt, den welcken ghy behaghet hebt, ende die v ghesedt heeft op den rijckstoel van Israhel, om dat die Heere Israhel lief ghehadt heeft inder eewicheyt, ende heeft v coninck ghemaect dat ghy recht ende rechtuerdicheyt doen sout

10

Hierom heeft sij den coninc ghegheuen hondert ende twintich talenten gouts, ende bouen maten seer veel costelijcke specerien, ende costelijc ghesteente. Daer en sijn van dier tijt noyt soo veel costelijcke specerien ghebracht, als die coninghinne van Saba den coninc Salomon gaf,

11

Ende daer toe die vlote der scepen van Hiram die gout wt Ophir bracht, heeft oock van Ophir ghebracht thyinen houten bouen maten vele, ende costelijcke ghesteenten,

12

ende die coninc heeft van dien thyinen houten ghemaect die stoensels in des Heeren huys ende in des conincs huys, ende herpen, ende lieren voor die sanghers, Daer en sijn noyt sulcken thyinen houten ghebracht oft ghesien tot op desen dach toe,

13

Maer die coninck Salomon heeft der coninginnen van Saba ghegheuen al dat sij van hem begheerde ende eyschte, sonder die dinghen die hy haer onghebeden van selfs gaf, nae die maniere van coninclijcke gauen, Die welcke is wederom ghekeert ende ghegaen in haer lant met haren dienaers,

14

⁺Ende het ghewicht des gouts dat Salomon iaerlijcks ghegheuen worde was ses hondert, ende sesentsestich talenten gouts

+ C

15

Sonder dat gout dat die mannen brachten, die op die tollen der weghen ghestelt waren, ende die coopluyden ende alle die alderhande slechte dinghen vercochten, ende alle die coninghen van Arabien ende die vorsten des lants.

16

Oock heeft Salomon ghemaect twee hondert groote schilden vanden alder puersten goude, ende hy gaf ses hondert siclen gouts tot die platen van eenen scilde,

17

ende drij hondert cleyn scilden van finen goude, ende drij hondert ponden gouts bedecten eenen cleynen scilt, ende die coninck heeft dese ghestelt int huys van Libanus wout,

18

Oock soo heeft die coninck Salomon eenen grooten throon van yuoren ghemaect, ende hy heeft dien becleedt met fijnen goude dat bouen maten seer ghelu was,

19

den welcken stoel hadde ses trappen, ende dat opperste vanden stoele was achter ront, ende twee handen waren aen deen ende aen dander sijde houdende die sidtplaetse, ende twee leeuwen stonden aen elck vanden handen,

20

Ende twaelf leewkens aen die een ende aen die ander sijde staende op die ses trappen, sulc werc en was noyt ghemaect in alle die conincrijcken,

21

Daer toe alle die vaten daer die coninc Salomon wt dranc waren gulden, ende alle den huysraet des huys van Libanus wout was van den fijnsten goude, daer en was gheen siluer werck nocht ten worde van gheender weerden ghehouden in Salomons tijden,

22

Want des conincks vlote van scepen voer te drij iaren eens met die vlote van Hirams scepen, door die zee tot Tharsis, halende van daer gout ende siluer, ende tanden van Elephanten, ende Simmen, ende pauwen,

23

⁺Aldus is die coninck Salomon groot gheworden bouen alle die coninghen van aertrijck in rijckdommen ende in wijsheden,

+ D

24

Ende alle landen begheerden het aensicht van Salomon om sijn wijsheyt te hooren, die Godt in sijn herte ghegheuen hadde,

25

Ende een yeghelijck bracht hem ghiften, silueren ende gulden vaten, cleederen ende orloochsche wapenen, ende oock costelijcke specerien ende peerden ende muylen iaerlijc,

26

Ende Salomon heeft wagenen ende peerden vergadert, ende hy heeft ghehadt duysent ende vier honder waghenen, ende twaelf duysent ruyters te peerde, ende hy heeft die bescict in die vaste steden, ende by den coninc in Ierusalem,

27

Ende hy heeft ghemaect datter soo veel siluers te Ierusalem was, als steenen, ende hy heeft soo veel ceder boomen gheleuert, als die wilde vijchboomen, welck in die platte landen wassen.

28

Ende tot Salomon worden peerden ghebracht wt Egipten, ende van Coa, Want des conincs coopluyden cochten die van Coa, ende om

[p. *276]

eenen ghesetten prijs brachten sij die ouer.

29

Ende daer quam eenen waghen met vier peerden wt Egipten om ses hondert siclen siluers, ende een peert om hondert ende vijftich siclen, Ende op dese maniere soo vercochten oock peerden alle die coninghen der Hethiters ende des lants van Syrien.