Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ix. Capittel.

1

⁺MAer het is gheschiet doen Salomon die timmeringhe van des Heeren huys volmaect hadde, ende des conincs timmeragie, ende alle dat hy hadde begheert ende willen maken,

+ A

2

dat hem die Heere ten tweeden male gheopenbaert heeft ghelijck hy hem gheopenbaert hadde te Gabaon,

3

Ende die Heere heeft tot hem gheseydt. Ick heb v ghebedt ende v ootmoedighe begheerte verhoort, die ghy voor my ghebeden hebt, Ick heb dit huys gheheylicht, het welck ghy ghetimmert hebt, dat ic mijnen naem daer stellen soude inder eewicheyt, ende mijn ooghen ende mijn herte sullen daer sijn tot allen daghen,

4

Eest dat ghy oock voor my wandelt, ghelijck v vader ghewandelt heeft, in simpelheyt des herten ende in gherechticheyt, ende dat ghy doet alle dat ick v gheboden hebbe, ende dat ghy mijn wettelijcke insettinghen ende rechten onderhoudt

5

soo sal ick ws conincrijcks stoel setten ouer Israhel inder eewicheyt, Ghelijck ick Dauid uwen vader ghesproken hebbe segghende. Daer en sal gheen man van uwen gheslachte wech ghenomen worden, wt den conincs stoel van Israel,

6

Maer eest dat ghy door een afkeeringhe v lieden ende v kinderen afkeert, my niet volghende, noch mijn gheboden onderhoudende, ende mijn ceremonien die ick v te voren gheleydt hebbe, ende dat ghy wech gaet, ende dient vreemde goden, ende die aenbiddet,

7

⁺soo sal ick Israhel wech nemen van dat ouerste des lants dat ick hen ghegheuen hebbe, ende den tempel dien ick voor mijnen naem gheheylicht hebbe sal ick verworpen van mijnen aensichte, ende Israel sal wesen tot een ghemeyn segwoort ende sal tot een fabule sijn allen den volcken,

+ B

8

Ende dit huys sal tot een exempel sijn, Alle die daer door voorby ghaet, sal hem verwonderen ende wispelen, ende segghen. Waerom heeft die Heere desen lande ende desen huyse aldus ghedaen,

9

Ende sij sullen antwoorden. Om dat sij den Heere haren Godt verlaten hebben, die haer vaderen gheleydt heeft wt dat lant van Egipten, ende sij hebben vreemde goden gheuolcht, ende die aenbeden, ende dien ghedient, daerom heeft die Heere op hen alle dit quaet ghebrocht.

10

Alst nv twintich iaren voorleden waren, nae dat Salomon ghetimmert hadde die twee huysen, dat is des Heeren huys, ende des conincks huys

11

(waer toe Hiram die coninck van Tyro leuerde Salomon cederen ende abeel houten, ende gout, nae alle dat hem van noode was) doen heeft Salomon Hiram twintich steden ghegheuen in dlant van Galileen,

12

Ende Hiram is wt Tyro ghecomen, dat hy die steden besien soude die Salomon hem ghegheuen hadde, ende sij en behaechden hem niet,

13

ende hy seyde. ⁺Sijn dit die steden die ghy my ghegheuen hebt broeder? Ende hy heeft die ghenoemt het lant van Chabul, tot op desen dach toe,

+ C

14

Ende Hiram heeft noch aen den coninck Salomon ghesonden, hondert ende twintich talenten gouts.

15

Dit is die somme van die costen, welck die coninck Salomon ghegheuen heeft om te timmeren dat huys des Heeren, ende sijn huys ende Mello, ende den muer van Ierusalem, ende Heser, ende Mageddo, ende Gazer,

16

Pharao die coninck van Egipten is opghetrocken, ende heeft Gazer inghenomen ende die stadt metten vier verbrant ende het Chananeus volck dat daer binnen woonde heeft hy doodt gheslaghen, ende hy heeft die stadt sijnder dochter Salomons huysvrouwe tot haer houwelijcke ghifte ghegheuen,

17

Hierom heeft Salomon Gazer opghetimmert ende neder Bethoron,

18

ende Balaath, ende Palmiram, inder woestijnen landt,

19

Ende alle die dorpen die hem toebehoorden, ende sonder mueren waren, heeft hy sterck ghemaeckt, ende die steden der waghenen, ende die steden des rosvolcks ende al wat hem belieft heeft te maken in Iherusalem ende in Libano, ende in alle het landt van sijnder heerschappien,

20

Alle dat volck datter ouerbleuen was vanden Amorrhiters, ende Hethiters’, ende Pherezeiters, ende Heueiters, ende Iebuseiters die vanden kinderen van Israel niet en sijn,

21

deser kinderen die int landt ouerbleuen waren, te weten die de kinderen van Israel niet en had-

[p. *275]

den connen verdrijuen, heeft Salomon tributarisen ghemaect tot op desen dach toe,

22

⁺Maer vanden kinderen van Israel en heeft Salomon geene in slauelijcken staet gestelt maer sij waren orloochsmannen, ende sijn dienaers, ende princen ende capiteynen, ende prouoosten van sijnen waghenen ende peerden,

+ D

23

Ende die princen ouer alle Salomons wercken ghestelt waren vijf hondert ende vijftich die het volck onder hen bedwanck hadden, ende ghebodt hadden ouer die ghesette wercken,

24

Maer des conincs Pharaos dochter is opghegaen van Dauids stadt in haer huys, het welck haer Salomon ghetimmert hadde, doen timmerde hy Mello,

25

Oock soo offerde Salomon alle iaren drijmael heelbrantofferanden ende vreedsamighe slachofferanden, opden outaer den welcken hy den Heere ghetimmert hadde, ende hy ontstack oock welriekende offerande voor den Heere, ende den tempel is volmaect,

26

Ende Salomon maecte oock een vlote scepen in Asion-gaber welc is by Ailath op den oeuer vander rooder zee, int lant van die Edumieten,

27

Ende Hiram heeft in die vlote der scepen sijn knechten ghesonden, mannen die scipluyden waren, ende die hen ter zee wel verstonden, met Salomons knechten,

28

Die welcke als si comen waren te Ophir nemende van daer vier hondert ende twintich talenten gouts hebben dat tot den coninck Salomon bracht.