Den gheheelen Bybel, Inhoudende het oude ende nieuwe Testament (Leuvense bijbel 1548)

[p. *271]

Dat .vij. Capittel.

1

⁺MAer sijn huys heeft Salomon ghetimmert derthien iaren, ende hy heeft dat ter volcomenheyt ghebracht,

+ A

2

Ende hy heeft ooc ghetimmert dat huys van dat bosch Libanus, hondert cubitus lanck, ende vijftich cubitus breedt, ende dertich cubitus hooghe, vier wandelplaetsen tusschen cederen columnen, want hy hadde cederen boomen tot columnen doen houwen,

3

ende hy becleede alle dat welfsel met cedren berderen, het welck onderhouden worde van vijfenveertich columnen, ende die een rije hadde vijfthien columnen

4

teghen malcanderen ghestelt,

5

ende recht teghen ouer malcanderen siende, also datter ghelijkcke ruymte was tusschen die columnen, ende op die columnen viercantighe balcken in alles ghelijck,

6

Ende hy heeft een portael der columnen ghemaect vijftich cubitus lanck ende dertich cubitus breedt, ende een ander portael aen dat vorste van dat meeste portael, ende columnen ende capiteelen op die columnen,

7

Oock heeft hy ghemaect dat portael van die consistorie daer den rechters stoel was, ende hy heeft dat bescut met cederen houte van dat pauiment tot dat opperste toe,

8

Ende het huysken daermen te recht sadt, ⁺was int midden van dat portael van ghelijcken wercke, Ooc heeft hi een huys ghemaect voor die dochter van Pharao (die welcke Salomon tot een huysvrouwe ghenomen hadde) van sulcken wercke als dit portael was,

+ B

9

Dese waren al van costelijcken steenen, die welcke al nae een rije ende mate soo wel van binnen als van buyten ghesaecht waren, van dat fundament aen tot dat hoochste vanden mueren toe, ende van binnen tot dat grootste voorhof,

10

Maer die fundamenten waren van costelijcken steenen, van steenen die thien oft acht cubitus groot waren,

11

Ende daer bouen waren costelijcke steenen van ghelijcker maten ghesaecht, ende desghelijcs oock vanden ceder hout,

12

Ende dat grootste ront voorhof was van drij rijen van ghesneden steenen, ende van eender rijen van ghescaefden cederen houte, Alsoo waert ooc in dat binnenste voorhof van des Heeren huys, ende in des huys portael,

13

Ende Salomon heeft wtghesonden, ende doen halen Hiram van Tyro

14

een der weduwen sone van Nephthaluns gheslachte, wiens vader was een Tyrier eenen constighen wercman int metael, ende vol wijsheden ende verstants ende leeringhen om alderhande werck van metael te maken Die welcke (als hy by den coninck Salomon comen was) heeft alle sijn werck ghemaect,

15

Ende hy heeft ghegoten twee metalen columnen, elcke columne was achthien cubitus hooghe, ende een coordeken van twaelf cubitus ghinck rontsomme beyde die columnen,

16

⁺Hi maecte oock twee capiteelen, die welcke men stellen soude op die hoofden van die columnen van metael ghegoten, dat een capiteel was vijf cubitus hooghe, ende dat ander capiteel oock vijf cubitus hooghe,

+ C

17

ende als op een maniere van een nette ende van ketenen aen malcanderen met een wonderlijc werck gheulochten, beyde die capiteelen der columnen waren ghegoten werck, seuen ommekeeren der nettekens waren aen deen capiteel, ende seuen nettekens aen dat ander capiteel, Ende hy heeft die columnen volmaeckt,

18

ende hy heeft ghemaeckt twee rijen van granaet appelen int ronde aen beyde die nettekens, dat sij die capiteelen bedecken souden die op dalder hoochste stonden, ende op die selue maniere heeft hy aen dat tweede capiteel oock ghemaeckt,

19

Maer die capiteelkens die op die hoofden van die columnen waren, die waren constelijck ghemaeckt ghelijck een lilien werck in dat portael vier cubitus groot,

20

ende noch ander capiteelkens opt hoochste van die columnen daer bouen ghestelt nae die mate vander columnen, teghen die nettekens, ende daer waren twee hondert rijen van granaet appelen, rontsomme dat tweede capiteel,

21

Ende hy heeft twee columnen ghestelt int portael des tempels, Ende als hi die columne ter rechter hant ghestelt hadde, soo heeft hi haer den naem Iachin ghegheuen, desghelijcs heeft hy die tweede columne opghericht, ende hi noemde den naem van die Booz,

22

Ende op der columnen hoofden heeft hy een werck ghestelt nae die maniere van eender lelien, ende dat werck der columnen is volmaect gheweest.

23

⁺Hy heeft oock een ghegoten zee ghemaect, thien cubitus wijdt van den eenen cant tot aen den anderen cant al omme ront, die hoochde van die was van vijf cubitus, ende een coordeken van dertich cubitus, liep daer al rontsomme ouer,

+ D

24

Ende onder den cant ghinc een ghesneden werck rontsomme die zee van thien cubitus, die twee rijen van die wtghegroefde wercken waren ghegoten,

25

Ende stonden op twaelf ossen, waer af die drije waren ghekeert noortwaerts, ende drije westwaerts, ende drij suytwaerts, ende drij oostwaerts ende die zee was bouen op die ossen, alsoo dat alle haer achtersten binnenwaerts verborghen waren,

26

Ende die dicte des ketels was van drij vncien, ende sijnen wtersten cant was ghelijck den boort van eenen kelck ende ghelijck dat blat van een open lelie, ende hy hiel twee duysent baten, ende drij duysent metreten,

27

Ende hy heeft ghemaect thien metalen basementen elck basement vier cubitus lanck, ende vier cubitus breedt, ende drij cubitus hooghe,

28

Ende alle het werc vanden basementen was wtghesneden, ende daer was een ghesneden werck tusschen die voechselen,

29

Ende tusschen die croonkens ende vlechten, waren leeuwen ende ossen, ende Cherubims, ende desghelijcs oock bouen in die voechselen, ende onder die leeuwen ende ossen waren ghelijck banden van metale wthanghende

30

ende vier raders aen elck basement ende metalen assen, ende aen die vier hoecken waren ghelijck scouderkens ghegoten onder dat waschuat teghen malcanderen siende,

31

⁺Ende den mont van dat waschuat van binnen was int opperste vanden hoofde, ende datmen van buyten sach was eenen cubitus groot heel ront, ende het hadde tsamen oock onderhaluen cubitus, maer in die hoecken van die columnen waren versceyden ghesneden wercken, ende die middelplaetsen tusschen die columnen waren viercantich ende niet ront,

+ E

32

Ende die vier raderen die aen die vier hoecken des basements waren die waren vast aen een onder dat basement, een radt was onderhalf cubitus hooghe,

33

Ende het waren alsulcken raderen ghelijcmen aen die waghenen pleech te maken, ende haer assen, ende speeken, ende nauen, ende velghen, waren alle ghegoten,

34

Want die scouderkens aen die vier hoecken van den eenen basemente, waren wt dat basement gheghoten, ende daer vast aen ghemaeckt,

35

Maer in dat opperste van dat basement was eenderhande rontheyt van onderhalf cubitus groot, alsoo ghemaect dat het waschvat daer bouen op ghestelt mocht worden, hebbende sijn ghesneden wercken ende versceyden ghehoelt werck wt sij seluen ghewracht,

36

Ende hy heeft ooc ghesneden in die tafelen die van metael waren ende in die hoecken Cherubims ende leeuwen, ende palmboomen, by nae tot die

[p. *272]

ghelijckenisse van eenen staenden mensch, alsoo dattet scheen dat sij niet en waren daer wtghesneden, maer rontsomme daer aen ghesedt,

37

Op dese maniere heeft hy thien basementen ghemaeckt met eenen ghietsel, ende nae een mate, ende met ghelijcken ghesneden beeltwerck,

38

Hy heeft ooc ghemaect thien metalen wasch vaten, veertich baten hiel een wasch vat ende het was van vier cubitus, ende hy heeft elc wasch vat besonder op een besonder basement ghestelt, te weten van dien thien basementen,

39

Ende hy heeft thien basementen ghestelt, vijue ter rechter sijden vanden tempel, ende vijue aen die slincke sijde, Maer die zee heeft hy ghestelt aen die rechte sijde des tempels teghen ouer den oosten aen dat suyden,

40

Aldus heeft Hiram ghemaect ketelen, ronde scotelen, beckens, ende heeft alle Salomons des conincs werc inden tempel des Heeren volmaect,

41

Twee columnen, ende twee cordekens vanden capiteelkens op die capiteelen der columnen, ende twee nettekens dat sij die twee coordekens bedecken souden, die op die hoofden der columnen waren,

42

Ende vier hondert granaet appelen in die twee nettekens, twee rijen van granaet appelen, aen elck netteken, om die coordekens der capiteelen te bedecken, die op der culumnen hoofden waren,

43

⁺Ende thien basementen ende thien beckens op die basementen,

+ G

44

Ende een zee, ende twaelf ossen onder die zee,

45

Ende ketelen ende scotelen ende beckens, alle die vaten die Hiram voor Salomon maecte in des Heeren huys, waren vanden fijnsten metael,

46

In dat plat lant der iordanen heeftse die coninck ghegoten in leemachtighe aerde tusschen Sochot ende Sarthan,

47

Ende Salomon heeft alle die vaten ghestelt, maer om die seer groote menichte, soo en was daer gheen seker ghewicht vanden metale,

48

Oock maecte Salomon alle die ghereetscap in des Heeren huys, den gulden outaer, ende die gulden tafelen daermen die brooden der voorlegghinghen op legghen soude,

49

ende die gulden candelaren vijue ter rechter sijden, ende vijue aen die slincke sijde teghen ouer dat oratorie van pueren goude, ende ghelijck lelien bloemen ende lampen daerbouen gulden, ende gulden scutters,

50

ende watercruycken, ende crauwelkens, ende fiolen, ende mortierkens, ende wieroocvaten vanden alder fijnsten goude, ende die herren der dueren van dat binnenste huys dat heylich der heylighen, ende van die dueren des tempels huys waren van goude,

51

Ende hy heeft volmaect alle dat werck welck Salomon maecte in des Heeren huys, ende hy heeft daer binnen ghedraghen alle dat sijn vader Dauid gheheylicht hadde, siluer ende gout ende vaten, ende hy heeft wech die gheleydt in die scatten van des Heeren huys.