Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vi. Capittel.

1

⁺ALdus soo eest ghesciet in dat vierhonderste ende tachtentichste iaer nae dat die kinderen van Israel wt dat lant van Egipten comen waren, int vierde iaer van Salomons coninckrijck ouer Israel (in die maent Sio welck is die tweede maent) dat hy heeft begonnen des Heeren huys te timmeren

+ A

2

Ende het huys dat die coninck Salomon den Heere timmerde hadde tsestich cubitus in die lengde, ende twintich cubitus in die breyde, ende dertich cubitus in die hoochde,

3

Ende daer was een portael voor den tempel twintich cubitus lanck nae die mate van des tempels breydde, ende het hadde thien cubitus van breydden, voor dat aenschijn des tempels,

4

Ende hy heeft inden tempel cromme vensteren ghemaect,

5

Ende hy heeft opden muer des tempels ghetimmert galerien rontsomme, aen die mueren des huys rontsomme den tempel ende die heylichste plaetse, ende hy heeft daer sijde scutsels rontsomme aen gemaect,

6

Die galerie die onder was hadde vijf cubitus in die breydde, ende die middelste galerie was van ses cubitus in die breyde, ende die derde galerie hebbende seuen cubitus in die breyde, Ende hi heeft int huys balcken gestelt rontsomme van buyten, dat die aen des tempels mueren niet en hielden,

7

Maer doen dat huys ghetimmert worde, so is dat van gheeffende ende volmaecte steenen ghemetst, ende doen men dat huys timmerde, soo en hoordemen daer in noch hamer noch bijl noch gheenderhande yseren instrument,

8

Die duere van der middelster sijden was inden muer des huys ter rechter sijden ende door eenen wendelgraet ghinckmen tot op die middelste camer, ende van die middelste tot op die derde.

9

⁺Ende hy heeft dat huys ghetimmert ende volmaect Oock heeft hy het huys ghedekt met haenbalcken van cederboomen,

+ B

10

ende hy heeft een solderinghe ouer dat gheheel huys ghetimmert vijf cubitus hooghe, ende hy heeft dat huys ghedect met cederen houten,

11

Ende het woort des Heeren is tot Salomon gheschiet segghende.

12

Dit huys welck ghy timmert, eest dat ghy in mijn gheboden wandelt ende mijn vonnissen doet ende alle mijn beuelinghen onderhoudt daer door wandelende, soo sal ick mijn woort met v vast maken, het welck ick tot Dauid uwen vader ghesproken hebbe,

13

Ende ick sal int midden der kinderen van Israel woonen, ende mijn volck van Israel niet verlaten,

14

Hierom soo heeft Salomon dat huys ghetimmert ende volmaect,

15

Ende hy heeft die mueren des huys van binnen bescudt met cederen berderen van dat plaueytsel des huys tot dat opperste vanden mueren, ende tot aen die haenbalcken, ende hy heeft die van binnen heel ouerdect met cederen hout, ende het pauiment des huys heeft hy ouerdect met abeelen plancken,

16

Ende hy heeft aen dat achterste deel des tempels ghetimmert van twintich cubitus onderslaghen van cederen hout, van dat plaueytsel tot dat opperste toe, ende hy heeft dat binnenste huys van dat oratorie, ghemaect tot een heylich der heylighen,

17

Maer den tempel was van veertich cubitus voor die duere van dat oratorie,

18

Ende dat gheheel huys was van binnen met cederen hout becleedt hebbende sijn draeyende wercken ende toeuoechsels constelijck ghemaect, ende verhauen ghesneden werck, het worde al met berderen van cederen hout becleedt, alsoo datmen gheenen steen inden muer sien en mocht,

19

Maer die plaetse van dat oratorie hadde hy int midden des huys ghemaect in dat binnenste deel, dat hy die arcke van des Heeren verbont daer stellen soude

20

⁺Ende dat oratorie hadde twintich cubitus in sijn lengde ende twintich cubitus in sijn breydde, ende twintich cubitus in sijn hoochde, ende hy heeft dat bedect ende becleedt metten alder puersten goude, Ende den outaer heeft hy ooc met cederen hout becleedt,

+ C

21

Ooc heeft hy dat huys voor dat oratorie met dat alder suyuerste gout becleedt, ende hy heeft die platen vast ghemaect met gulden naghelen,

22

Ende daer en was niet inden tempel dat met goude niet bedect en was, maer oock heeft hy den gheheelen outaer van dat oratorie met goude bedect,

23

Ende hy heeft in dat oratorie twee Cherubims ghemaect van olijfboomen hout thien cubitus hooghe,

24

Den eenen vloghel vanden Cherub was van vijf cubitus, ende den anderen vloghel vanden Cherub was oock van vijf cubitus, dat is tsamen hebbende thien cubitus van dat wterste vanden eenen vloghel, tot dat wterste des anderen vloghels,

25

Ende den tweeden Cherub was oock van thien cubitus hooghe in ghelijcker maten, ende in beyde die Cherubims was een werck,

26

dat is den eenen Cherub hadde die hoochde van thien cubitus ende desghelijcs ooc den tweeden Cherub,

27

Ende hi heeft die Cherubims ghestelt int midden vanden binnensten tempel, ende die Cherubim strecten haer vloghelen wt, ende den eenen vloghel raecte den eenen muer enden den vloghel van den tweeden Cherub raecte den anderen muer, maer die ander vloghelen die raecten aen malcanderen int midden des tempels.

28

⁺Ende hy heeft die Cherubims oock met goude ouerdect,

+ D

29

Ende alle die mueren des templs rontsomme heeft hi ghegroeft met versceyden ghesneden ende ghedraeyde wercken, ende hy heeft daer in ghemaect Cherubims ende palmboomen ende versceyden scilderien, recht oft sij wt den muer ghehanghen ende ghesproten hadden,

30

Ende oock heeft hy dat paueytsel des huys met goude ouerdect binnen ende buyten,

31

Ende inden inganck der oratorien heeft hy twee cleyn dueren van olijfboomen houdt ghemaect, ende vijfcantighe stijlen,

32

Ende die twee dueren waren van olijfboom hout, ende hy sneedt daer inne die ghelijckenisse van Cherubims ende die ghedaenten van palmboomen, ende seer wtstekende beeltwerck, ende hy heeft die met goude ouerdect, ende soo wel die Cherubims als die palmboomen, ende die andere heeft hy met goude ouerdect,

33

Ende hy heeft inden inganck des tempels stijlen ghemaect van olijfboomen hout viercantich,

34

ende twee dueren van abeelen houte teghen malcanderen, ende beyde die dueren waren dobbel, ende sij ghinghen open houdende aen malcanderen,

35

Ende hy sneedt daer op Cherubims ende palmboomen, ende ghesneden werck seer verre wtstekende, ende hy heeft die alle met gouden platen bedect, bequamelijck ghewracht op die rije,

36

Ende hi heeft ghetimmert het binnenste voorhof, van drij rijen ghehouwender steenen, ende van een rije cederen houten,

37

In dat vierde iaer is des Heeren huys ghefundeert in die maent Sio,

38

ende in dat elfste iaer in die maent Bul, welck is die achtste maent, is dat huys volmaect in alle sijn werck, ende in alle sijnen huysraet, ende hi heeft dat ghetimmert seuen iaren lanc.