Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .v. Capittel.

1

⁺ENde Hiram die coninck Tyri heeft sijn knechten aen Salomon ghesonden, want hi heeft ghehoort dat sij hem ghesalft hadden tot eenen coninck voor sijnen vader, want Hiram altijt Dauids vrient gheweest hadde,

+ A

2

Ende Salomon sandt tot Hiram segghende.

3

Ghy weet den wille van mijnen vader Dauid, ende dat hy niet en heeft moghen timmeren dat huys vanden naem des Heeren sijns Gods, om der orloghen wille rontsomme, tot datse [afbeelding] die Heere onder die voetstappen van sijnen voeten ghegheuen soude hebben,

4

Maer nv heeft mi die Heere mijn Godt rust ghegheuen al rontsomme, ende daer en is gheenen Sathan oft quaden oploop,

5

Waerom dat ick dencke den naeme des Heeren mijns Godts eenen tempel te timmeren, ghelijc die heere mijnen vader Dauid ghesproken heeft segghende. V sone denwelcken ick gheuen sal voor v op uwen coninclijcken stoel, die sal mijnen naem een huys timmeren,

6

⁺Hierom beueelt uwen knechten dat sij my cederboomen afhouwen van Libano, ende laet mijn knechten met uwen knechten sijn, ende ick sal uwen knechten loon gheuen sulck als ghy eysschen sult, Want ghy weet wel datter gheen man onder mijn volc en is, die boomen houwen can ghelijck die van Sidonien,

+ B

7

Aldus doen Hiram Salomons woorden ghehoort hadde, soo heeft hy hem seer verblyt ende heeft gheseyt. Ghebenedijt sij heden die Heere die Godt die Dauiden eenen alderwijsten sone ghegheuen heeft ouer dit groot volck,

8

Ende Hiram heeft aen Salomon ghesonden, seggende. Ic heb ghehoort alle dat ghy my beuolen hebt, ic sal alle uwen wille doen in cederboomen ende abeelbomen,

9

Mijn knechten sullen die afbrenghen van Libano tot aen die zee, ende ic sal die aen een vast maken tot vloten in die zee totter plaetsen die ghi mi sult te kennen gheuen, ende ick sal v die aenbrenghen, ⁺ende ghi sultse halen, ende ghi sult mi gheuen dat mi van noode is, op dat mijn huys mach teten hebben,

+ C

10

Ende aldus soo gaf Hiram Salomon cederen houten ende abeel houten nae alle sijnen wille,

11

Maer Salomon gaf Hiram twintich duysent choren tarwe tot victalie van sijnen huyse, ende twintich choren van die suyuerste olie, Dese dinghen gaf Salomon Hiram alle iaer,

12

Ooc so heeft die Heere Salomon wijsheyt ghegheuen ghelijck hy hem gheseyt hadde, ende het was paeys tusschen Hiram ende Salomon, ende sij hebben beyde een verbont ghemaect,

13

Ende die coninck Salomon heeft wercluyden ghecosen wt gheheel Israel, die taxe was van dertich duysent mannen

14

ende hi heeft die ghesonden tot Labanun, tot elcker maent thien duysent mannen bi buerten, alsoo dat sij twee maenden in haerlieden huysen waren, Ende Adoniram was ghestelt ouer desen coese

15

Salomon hadder tseuentich duysent mannen die lasten droeghen, ende tachtentich duysent steenhouwers int geberchte,

16

sonder die ouerste officiers die ouer alle die wercken besonder ghestelt waren, drij duysent ende drij hondert in ghetale, die ghebodt hadden ouer tvolc ende ouer die ghene die het werck deden,

17

Ende die coninck heeft beuolen dat sij groote steenen souden

[p. *270]

nemen costelijcke steenen tot des tempels fundament ende dat sij die souden viercantich maken,

18

die welcke Salomons metsers, ende Hirams metsers effen ghemaect hebben, Maer die Giblijters hebben houten ende steenen bereyt om dat huys te timmeren.