Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iiij. Capittel.

1

⁺ALdus was die coninck Salomon regnerende ouer gheheel Israel,

+ A

2

ende dit waren die princen die hy hadde, Azarias Sadocs des priesters sone,

3

Elihoreph ende Ahia die sonen waren van Sisa den scrijuer, Iosaphat Ahiluds sone was greffier,

4

Banaias die sone van Ioiada was opperveltheere, maer Sadoc ende Abiathar waren priesters,

5

Azarias Nathans sone was ouer, die gene die bi den coninc stonden, Zabud Nathans sone was priester des conincs vrient,

6

Ende Ahisar was douerste des huys, ende Adoniram die sone van Abda was rintmeester ouer die tribuyten.

7

Oock hadde Salomon twaelf officiers ouer gheheel Israel, die den coninck prouande leuerden, ende sijnen huyse, Want tot elcker maent vanden iare besonder, soo leuerden sij elck besonder datter van noode was,

8

Ende dit waren haerlieden namen, Benhur int gheberchte van Ephraim,

9

Bendecar in Macces, ende in Salebim, ende in Beth-sames, ende in Elon, ende in Beth-hanan,

10

Beth-hesed in Arubod ende hem behoorde oock toe Socho, ende alle dlant van Epher,

11

Ben-abinadab wiens was gheheel Nephath-dor, hy hadde Tapheth Salomons dochter tot een huysvrouwe,

12

⁺Bana Ahiluds sone die regeerde Thanach ende Maggeddo, ende gheheel Beth-san welck is omtrent Sarthana beneden Iezrahel, van Bethsan, tot Abel-mehula teghen ouer Iecmaan,

+ B

13

Bengabar in Ramoth-galaad hadde Auoth-iair des soons van Manasse in Galaad, hy hadde regiment

[p. *269]

ouer alle dlantschap van Argob, welck is in Basan ouer tsestich groote ende bemuerde steden, die metalen sloten hadden,

14

Ahinadad die sone van Addo was ouerste in Manaim,

15

Achimaas in Nephtali, Ende dese hadde oock Basemath Salomons dochter ten houwelijcke,

16

Baana die sone Husi in Aser ende in Baloch,

17

Iosaphat Pharues sone in Issachar,

18

Semei die sone Ela in Beniamin,

19

Gaber die sone van Vri in dlant van Galaad, in dlant van Sehon der Amorrhiters coninck, ende Og des conincks van Basan, ouer alle dat in dat lant was,

20

Iuda ende Israel waren ontellijcken ghelijck tsant vander zee in menichten etende ende drinckende ende vrolijc sijnde,

21

⁺Maer Salomon was in sijn heerscappie hebbende, alle die conincrijcken met hem vander vloet des lants vanden Philistijnen tot die palen van Egipten, die welcke hem ghiften brachten, ende hem dienden alle die dagen sijns leuens,

+ C

22

Ende Salomons spijse was telckendaghe besonder, dertich choren ghemeste bloeme van tarwen mele, ende tsestich choren grof meel,

23

thien ghemeste ossen, ende twintich gheweydde ossen, ende hondert rammen wtghenomen dat wiltbraet van herten, capretten, ende buffelen, ende ghemeste voghelen,

24

Want hy besadt alle dlantscap dat ouer den vloet was, als van Thaphsa tot Gaza toe, ende alle die coninghen van dien lantscappen, ende hy hadde vrede van alle sijden int ronde,

25

Ende Iuda ende Israel woonden sonder eenighe vreese, een yeghelijck onder sijnen wijngaert ende onder sijnen vijchboom, van Dan tot Bersabee toe, alle die daghen van Salomon,

26

Ende Salomon hadde veertich duysent cribben van waghen peerden, ende twaelf duysent reysegher peerden,

27

⁺Ende die voorseyde officiers des conincs voedden dese, Maer dat desconincs Salomons tafele van noode was leuerden sij oock met grooter naersticheyt te sijnen tijde,

+ D

28

Daer toe brachten sij oock gherste ende stroo voor die peerden ende voor tgrootvee, ter plaetsen daer die coninck was, nae dat hen ghesteldt was,

29

Oock soo heeft Godt Salomon wijsheyt ende voorsienicheyt ghegheuen seer veel bouen maten, ende breetheyt des herten, ghelijck dat sant welck aen den oeuer der zee is,

30

Ende Salomons wijsheyt ghinck te bouen die wijsheyt van alle die Oosterschen ende der Egiptenaren,

31

ende hy was wijser dan alle die menschen, wijser dan Ethan die Ezrahiter ende Heman ende Chalcol, ende Dorda Mahols sonen, ende hy was vernaemt onder alle die heydenen int ronde,

32

Ende Salomon heeft oock ghesprocken drij duysent parabolen, ende sijn ghedichte sanghen waren vijf duysent,

33

Ende hy disputeerde van die boomen vanden cederboom die in Libano is, totter hysopen toe die wten muer spruyt ende hy sprack wijselijck vanden vee ende vanden voghelen ende van dat cruypende ghedierte ende vanden visschen,

34

Ende sij quamen wt allen volcken om Salomons wijsheyt te hooren, ende van alle die coninghen des lants die sijn wijsheyt hoorden.